Read Tzeltal Deuteronomio 16 Bible Online

Deuteronomio 16 - Tzeltal bible

Deuteronomio 16

¹Ya me acanantay te u Abib, ya me apas te Q'uin Pascua yu'un Jehová te Dios awu'un, como ta u Abib, ta ahc'abal, la yic'at loq'uel tal ta sq'uinal Egipto te Jehová te Dios awu'une.

²Yac atsa ta yohlil te tuminchijetic, tentsunetic o wacaxetic awu'un, yac awa'be scuenta milbil mahtanil yu'un Pascua te Jehová te Dios awu'un tey ta lugar banti ya stsa Jehová te ya x'ayin te sbihile.

³Ma me xawe' soc pan te yich'oj levadura. Huqueb c'ahc'al yac awe' soc pan te ma ba yich'oj levadura, ha te pan scuenta wocolijel, como ahnimal loc'at tal ta sq'uinal Egipto; scuenta yu'un te jayeb c'ahc'al cuxulat ya me ana' te bin c'ahc'alil loc'at tal ta Egipto.

⁴Huqueb c'ahc'al ma me xchicnaj levadura ta spahmal aq'uinal. Te chambahlam yac amil ta tibiltic ta sba c'ahc'alil, ma me ayuc bin ya xhil yu'un pajel.

⁵Ma xhu' yac awac' te milbil mahtanil yu'un te Pascua ta bayuc nax pueblohil te ya ya'bat Jehová te Dios awu'un,

⁶ha nax te banti ya stsa te Jehová te Dios awu'un te ya x'ayin te sbihile, tey yac awac' a te milbil mahtanil yu'un te Pascua ta tibiltic, ta hich ora te loc'at tal ta Egipto.

⁷Yac ata'ajtes soc yac awe' tey ta lugar banti stsahoj te Jehová te Dios awu'une. Ta sab ta yan c'ahc'al ya suhtat bahel ta ana.

⁸Waqueb c'ahc'al yac awe' pan te ma ba yich'oj levadura; ta shuquebal c'ahc'al ay me ch'ul tsoblej ta stojol te Jehová te Dios awu'un; ma me x'a'tejat a.

⁹Ya me awahtay huqueb semana; ya xhahch awahtay te huqueb semana te c'alal ya xhahch ta bojel te cebada.

¹⁰Ya me apas te Q'uin yu'un Semanahetic ta scuenta yich'el ta muc' te Jehová te Dios awu'un; a'beya mahtaniletic yu'un sc'anojel awo'tan, chican te jayeb bendición ya'beyejat Jehová te Dios awu'une.

¹¹Tse'eluc me awo'tan ta stojol Jehová te Dios awu'un, ha'at, awal-anich'nab, awa'bat, acriada, te levita ya xnahin ta pueblohetic awu'un, te jyanlum, me'ba' soc me'ba' ants ay ta awohlil, tey ta lugar banti stsahoj Jehová te Dios awu'un te ya yac' ayinuc te sbihile.

¹²Na'a me te c'axat ta mosohil ta Egipto; ha yu'un ya me acanantay soc ya me apas te bintic chapal ini.

¹³Ya me apas huqueb c'ahc'al te Q'uin yu'un Yaxnahetic, te c'alal lajix awo'tan ta sbojel a te atrigo soc ta spits'el ats'usub.

¹⁴Tse'eluc me awo'tan xapas te q'uinetic, ha'at, awal-anich'nab, awa'bat, acriada, te levita, jyanlum, me'ba' soc me'ba' ants te ya xnahin ta pueblohetic awu'un.

¹⁵Huqueb c'ahc'al yac apasbe sq'uin te Jehová te Dios awu'un tey ta lugar tsahbil yu'un, como te Jehová te Dios awu'un ya ya'bat bendición ta spisil sit ats'unub awawal soc ta spisil awa'tel, buen tse'el me awo'tan yu'un.

¹⁶Oxeb buelta ta jujun ha'bil spisil winiquetic ya me xtal ta stojol Jehová te Dios awu'un tey ta lugar tsahbil yu'un: ha te Q'uin yu'un Pan ma ba yich'oj levadura, te Q'uin yu'un Semanahetic soc te Q'uin yu'un Yaxna. Ma me ayuc jtuhluc te jochol sc'ab ya xtal stehc'an sba ta stojol te Jehová;

¹⁷tuhlultuhl me ya yac' smahtan Dios, chican te jayeb a'bot bendición yu'un Jehová te Dios awu'une.

¹⁸Ta spisil te pueblohetic ya ya'bat te Jehová te Dios awu'un a'beya yich' ya'tel juecetic soc jcuentahinwanejetic scuenta chahpalchahp ats'umbal, te stojil ya schahpanic te pueblo.

¹⁹Ma me xahowiytes te bin stojil ta pasel; ma me tsahbiluc nax mach'a yac awich' ta cuenta, ma me xatsac taq'uin teme ya x'a'botat, como te taq'uin ya smacbe sit te mach'atic ay sp'ijilic soc ya showiytesbe sc'opic te mach'atic toj yo'tanique.

²⁰Te stojil chahpanel, ha nax me xat'un te stojil chahpanel, scuenta yu'un hich ya xcuxajat soc yac awich' a te q'uinal ya ya'bat te Jehová te Dios awu'une.

²¹Ma me xats'ap junuc ste'el Asera nopol ta scajtajib ta chiq'uel mahtanil yu'un Jehová te Dios awu'un te apasoj,

²²soc ma me xatehc'an ch'ultesbil ton, como ihlaybil yu'un Jehová te Dios awu'une.