Read Tzeltal Deuteronomio 17 Bible Online

Deuteronomio 17 - Tzeltal bible

Deuteronomio 17

¹Ma me xawa'be ta milbil smahtan Jehová te Dios awu'un wacax o tuminchij te ay bin jihnem yu'un, o te ay bin bohloben yu'une, como ha ihlaybil yu'un Jehová te Dios awu'une.

²Ta bayuc pueblohetic awu'unic te ya ya'bat te Jehová te Dios awu'un, teme ay ya xchicnaj winic o ants ta awohlilic te ay bin chopol la spas ta stojol Jehová te Dios awu'un, te ya sc'axuntaybe te chapbil-c'op yu'une,

³teme baht sch'uhuntay yantic diosetic soc la squejan sba ta stojolic, o ta stojol te c'ahc'al, u, o spisil bintic ay ta ch'ulchan, ha te la jcal te ma hichuc ay ta pasele;

⁴teme ay halbotat awa'iy, ya me ajoc'oy ta lec. Teme chicnaj te melel c'ohtix ta pasel ta Israel te bin ilobtic sba,

⁵ya me aloq'ues bahel ta yochibal te pueblo awu'un te winic o ants te la spas te bin chopol ini, ya me ach'oj ta ton ha to ya xlaj.

⁶Ta scuenta sc'op cheb o ta sc'op oxeb testigohetic ya xlaj te mach'a ya sc'an ya yich' milele; ma ba ya yich' milel ta scuenta sc'op jtuhl nax testigo.

⁷Ha nahil ya xhahch sc'abic ta milaw te testigohetic, patil ya xhahch sc'abic spisil te pueblo; hich yac aloq'ues a te bin chopol ta awohlile.

⁸Teme ay bin chuhcul ta chahpanel yac awa'iy, teme milaw, pleito, ehchenteswanej, chican biluc c'opil ay ta pueblohetic awu'un, ya me xbahat ta lugar te banti stsahoj te Jehová te Dios awu'une.

⁹Ya xtalat ta stojol te sacerdote-levitahetic soc te juez te yich'oj ya'tel ta hich ora, ha yac ajoc'obe. Ha'ic ya ya'bat ana' te bin snopojique.

¹⁰Ya me apas te bin ya yalbat te mach'atic ay ta lugar tsahbil yu'un Jehová; tsahtaybil me xapas spisil te bintic ya yalbate.

¹¹Hich me xapas te bin ya ya'bat anop soc te bin schapojic; ma me xhowiyat ta wa'el o ta q'uexam ta spasel te bin snopojic te ya yalbate.

¹²Te mach'a ya stoy sba, te ma ba ya sch'uhun spasel te bin ya yal te sacerdote te yac ta a'tel tey a ta stojol te Jehová te Dios awu'un, o ha te bin ya yal te juez, ya me yich' milel yu'un. Hich yac aloq'ues a te bin chopol ta yohlil Israel.

¹³C'alal ya ya'iy spisil te pueblo ya me xi' soc hich ma ba ya stoy sbahic yan buelta a.

¹⁴Te c'alal ochematix bahel a ta q'uinal te ya ya'bat te Jehová te Dios awu'un, te la awu'untayix soc te ya xnahinatix tey a, teme hich yac awal: Ya cac' scuentahinon jtuhl ajwalil, hich te bin ut'il spisil nacionetic ta joyobal, teme xchihate,

¹⁵ya me awac' scuentahinat te ajwalil te ya stsa te Jehová te Dios awu'une. Ha nix alumal yac awotses ta ajwalil te ya scuentahinat; ma me xawac' scuentahinat jtuhl jyanlum winic te ma ha'uc alumal.

¹⁶Pero te ajwalil ma sc'an te ay bayel cawuhetic yu'un, soc ma me xyac' suhtel te pueblo ta Egipto yu'un ya yich'be xan tal cawuhetic; como hich yalbeyejex te Jehová: Ma jaymehl xan ya suhtex bahel ta be ini, xchi.

¹⁷Soc ma me xyic' tsobol antsetic, scuenta yu'un ma xhowiy yo'tan a; soc ma me sbusan bayel oro soc plata yu'un.

¹⁸Te c'alal ya shuhcan sba ta shuctajib te banti ya xpasawan ta mandar, ya me sc'ases ta sts'ihbayel ta yan hun te mandariletic ini, te ha yu'un ya xc'oht, tey ya yich' loq'uesel tal a ta spasbenal te scanantayejic te sacerdote-levitahetique.

¹⁹Spisil me ora ay ta stojol soc ya me yil te jayeb c'ahc'al cuxul ta q'uinal, scuenta yu'un ya snop te ya yich' ta muc' te Jehová te Dios yu'un, te ya sch'uhun spasel spisil bin ya yal te ley soc te mandariletic ini.

²⁰Hich ma ba ya scuy sba a te ha toyol yu'un te slumal, soc ma ba ya xhowiy bahel ta wa'el o ta q'uexam ta stojol te mandariletic ini; scuenta yu'un te ajwalil soc te snich'nab ya yaq'uic te bayel c'ahc'al ya xhalaj te cuentahinel yu'unic ta Israel.