Read Tzeltal Deuteronomio 18 Bible Online

Deuteronomio 18 - Tzeltal bible

Deuteronomio 18

¹Te sacerdote-levitahetic, ha spisil te jchahp sts'umbal Leví, mayuc bin ya x'a'bot yu'untayic ta Israel; ha ya swe'ic te bin ay yu'unic ta banti te mahtaniletic ya yich'ic chiq'uel ta stojol Jehová.

²Mayuc bin ya x'a'bot yu'untayic ta yohlil te yermanotac; ha sq'uinalic c'ohem te Jehová, hich te bin ut'il halbotic yu'un.

³Hich ay te bin ay ta scuenta yich'el te sacerdotehetic ta banti te milbil mahtanil wacax o tuminchij te ya yaq'uic te pueblo: ha ya ya'beyic te sacerdote te spech baquel sc'ab, yahlan-e soc te stsucum.

⁴Ya me awa'be te sba sit trigo, vino soc aceite awu'un, soc te sba stsotsel tuminchijetic awu'un te ya yich' loq'uesbeyel,

⁵como ha tsahbilic yu'un Jehová te Dios awu'un ta yohlil spisil te jchahp ts'umbalil awu'un, scuenta yu'un spisil ora ya x'a'tejic soc yal-snich'nabic ta scuenta sbihil te Jehová.

⁶Teme ay jtuhl levita te ya xloc' bahel te banti nahinem ta bayuc pueblohil awu'un ta spahmal sq'uinal Israel, teme spisil yo'tan ya xbaht ta lugar te ya stsa te Jehová,

⁷ya xhu' ya x'a'tej ta scuenta sbihil Jehová te Dios yu'un, hich te bin ut'il spisil te yantic yermanotac levitahetic te tey ayic a ta stojol Jehová.

⁸Pajal me ya x'a'bot swe'el soc te yantique, soc nix te bin ya x'a'bot yich' yu'un te state.

⁹Te c'alal ya x'ochat bahel ta q'uinal te ya ya'bat Jehová te Dios awu'un, ma me xanop spasel te bin ihlaybil ya spasic te nacionetic tey a.

¹⁰Ma me xchicnaj ta awohlilic te mach'a ya yac' c'axel ta c'ahc' te squerem o yantsil-nich'an, o te mach'a ya x'a'tej ta jna'ojel, te mach'a ya spasbe seña sna'el te bin chopol ya xc'oht ta pasel, te mach'a ya sna' spasel chopol señahetic, j'ac'-chamel,

¹¹jyahaltaywanej, te mach'a ya sc'opon ch'uhlelal, jpas señahiletic, o te mach'a ya sc'opon te mach'a chamene.

¹²Como ihlaybil yu'un Jehová mach'ayuc a te hich ya spas; soc ta scuenta te bintic ihlaybilic ini, te Jehová te Dios awu'un ya sten loq'uel ta atojol te nacionetic ini.

¹³Tojuc me ya x'ayinat ta stojol Jehová te Dios awu'un.

¹⁴Como te nacionetic te yac awu'untay, ya sch'uhunic te mach'atic ya spasbe seña sna'el te bin chopol ya xc'oht ta pasel, soc te jna'ojeletic; pero te ha'ate ma sc'an Jehová te Dios awu'un te hich yac apase.

¹⁵Te Jehová te Dios awu'un ya me yac' chicnajuc ta yohlil awermanotac jtuhl jalwanej hich te bin ut'il ho'on; ha me xawa'iy te bin ya yal.

¹⁶Como hich la ac'ambe te Jehová te Dios awu'un ta wits Horeb te bin ora ay te tsoblej, te hich la awal: Ma jc'an ya ca'iybeyix xan sc'op te Jehová te Dios cu'un soc te ya quil yan buelta te muc'ul c'ahc' ini, scuenta yu'un ma ba ya xchamon a, xchihat.

¹⁷Te Jehová hich la yalbon: Lec te bin yalojic.

¹⁸Ya cac' chicnajuc jalwanej yu'unic ta yohlil te yermanotac, hich te bin ut'il te ha'ate; ya ca'be ta ye te jc'op soc ha ya yalbe ya'iyic spisil te bintic ya calbe.

¹⁹Pero mach'ayuc a te ma xyich' ta cuenta te jc'op ya yal ta scuenta te jbihile, ya me quich' ta c'op yu'un.

²⁰Te jalwanej te ta scuenta stoybahil ay bin ya yal ta scuenta jbihil te ma ba calbeyej ta mandar te hich ya yal, o teme ya xc'opoj ta scuenta sbihil yantic diosetic, ya me xlaj, xchi.

²¹Ya wan awal ta awo'tan: ¿Bin ut'il ya jna'tic teme ma ha'uc sc'op te Jehová? xchihat.

²²Teme ya xc'opoj ta scuenta sbihil Jehová te jalwanej, teme ma ba ya xc'oht ta pasel te bin la yal, yu'un nix ma ha'uc te bin yaloj te Jehová. Ta scuenta stoybahil te hich la yal te jalwanej; ma me xiwat ta stojol.