Read Tzeltal Deuteronomio 19 Bible Online

Deuteronomio 19 - Tzeltal bible

Deuteronomio 19

¹Te Jehová te Dios awu'un c'alal ya slajinlan te nacionetic te ya ya'bat awu'untay te sq'uinalic, te c'alal yac awich' soc ya xnahinat ta pueblohetic soc ta nahetic yu'unic,

²parte me xawac' oxeb pueblohetic ta yohlil te q'uinal ya ya'bat awu'untay te Jehová te Dios awu'une.

³Ya me achahpan te behetic soc oxeb parte yac awac' te q'uinal ya ya'bat ta acuenta te Jehová te Dios awu'un, scuenta yu'un tey ya xbahtic ta ahnel a te jmilawe.

⁴Hich ay sc'oblal te jmilaw te ya xbaht ta ahnel tey a scuenta yu'un cuxul ya xhil: ha te mach'a ma hichuc snopoj te ya smil te spat-xuhc, soc te ma ba scontrahinej sba soc ta nahil to.

⁵Teme ay baht ta ha'mal soc spat-xuhc ta ch'uy-si', te c'alal yac ta sch'uyel si' a te bots' bahel ta ste'el te yechej soc te la yehchentes a te spat-xuhc, te hich laj yu'une; tey ya xhu' ya xbaht ta ahnel a ta bayuc ta yoxebal te pueblohetic ini, hich cuxul ya xhil;

⁶scuenta yu'un ma hichuc ya xc'oht ta pasel te ay mach'a ya sutbe spacol te ch'ich' ta scaj ilinem, ya snuts bahel te jmilaw soc ya sta ta scaj te namal te behel, hich ya smil, aunque ma sc'an ya yich' milel como ma ba scontrahinej sba soc ta nahil to te spat-xuhque.

⁷Ha yu'un ya jpasat ta mandar: Parte me xawac' oxeb pueblohetic.

⁸Teme ya smuc'ubtesbat aq'uinal te Jehová te Dios awu'un, hich te bin ut'il jc'axel la yalbe ta jamal te ame'atatic, teme ya ya'bat spisil te q'uinal te la yalbe te ame'atatic te ya ya'be,

⁹(teme spisil ora yac acanantay spisil te mandariletic ya calbat ta ora ini yu'un yac apas: ha te c'ux yac awa'iy ta awo'tan te Jehová te Dios awu'un soc te spisil ora yac at'un te behetic yu'une), ta hich ora ya me ale oxeb xan pueblohetic,

¹⁰scuenta yu'un ma ba ya yich' malbeyel sch'ich'el te mach'a mayuc smul tey ta q'uinal te ya ya'bat awu'untay te Jehová te Dios awu'un, soc scuenta yu'un hich ma ba yac amulin malbil ch'ich'.

¹¹Yan teme ay mach'a ya yilintay te spat-xuhc soc ya spac'mucultay, ya xhahch scontrahin soc ya smil, patil ya xbaht ta ahnel ta bayuc pueblohetic ini,

¹²te mamaletic ta pueblo yu'un ya me sticonic ta iq'uel tal tey a, ya me ya'beyic ta sc'ab te mach'a ay ta scuenta sutbeyel spacol te ch'ich', scuenta yu'un ya xlaj.

¹³Ma me xana'be yo'bolil sba; ya me aloq'ues ta Israel te mach'a ya smalbe sch'ich'el te mach'a mayuc smul; hich lec ya xc'ohat a.

¹⁴Tey ta q'uinal te banti ya ya'bat te Jehová te Dios awu'un ma me xatembe ochel sq'uinal te apat-axuhc te chahpambil yu'un te mamaletic ta namey.

¹⁵Ma me x'ich'ot ta cuenta te bin ya yal jtuhl nax testigo ta scontrahinel yan te stahoj biluc falta o biluc mulil. Ha nax ta scuenta cha'tuhl u oxtuhl testigohetic te ya x'ich'ot ta cuenta bin ya yalique.

¹⁶Teme ya stehc'an sba jtuhl lotil testigo ta slehbeyel smul yan,

¹⁷ta schebalic te mach'atic ayic ta pleito ya me stehc'an sbahic ta stojol Jehová, ta stojol sacerdotehetic soc ta stojol juecetic te ha ya'telic ta hich ora.

¹⁸Te juecetic ya stsahtayic ta lec bin ut'il ay te c'ope; teme ya xchicnaj te ha lotil testigo, te ha slot bin la yal ta slehbeyel smul te yane,

¹⁹hich yac apasbe te bin snopoj ya spasbe te yermano. Hich yac aloq'ues a te bin chopol ta awohlil.

²⁰Te yantic ya me ya'iyic, ya me xiwic yu'un, hich ma ba ya spasiquix ta awohlilic a te bin chopol ay ta pasele.

²¹Ma me xana'be yo'bolil sba; te mach'a ya slajimbe scuxlejal yan, ac'a stoj ta scuxlejal; teme ta sit, ta sit nix; teme ta ye, ta ye nix; teme ta sc'ab, ta sc'ab nix; teme ta yoc, ta yoc nix ya yich'.