Read Tzeltal Deuteronomio 2 Bible Online

Deuteronomio 2 - Tzeltal bible

Deuteronomio 2

¹Patil suhtotic bahel, bohotic ta jochol taquin q'uinal ta sbehlal Mar Rojo, hich te bin ut'il la yalbon te Jehová. Bayel c'ahc'al behenotic ta sjoyobal te witsiltic yu'un Seir.

²Patil la yalbon te Jehová:

³Bayelix c'ahc'al yaquex joyetel ta wits ini, bahanic me ta stojol norte.

⁴Halbeya te pueblo: Te c'alal ya xc'axex ta sq'uinal te awermanotac, ha te snich'nab Esaú te nahinemic ta Seir, ya me xi'ex, pero tsahtaya me abahic te ha'exe.

⁵Ma me xawa'beyic guerra, yu'un ma ba ya ca'beyex te sq'uinalic, ni jxuht'uc ta banti ya xc'oht stahn awoc; como la jca'be yich' Esaú te witsiltic yu'un Seir.

⁶Ya me amambeyic te we'elil yac awe'ic, soc ya me amambeyic te ha' yac awuch'ic, xchi.

⁷Como te Jehová te Dios awu'unic ya'beyejex bendición a ta spisil bintic apasojic; sna'oj te yaquex ta behel ta muc'ul jochol taquin q'uinal ini. Te cha'winic (40) ha'bil ini sjoquinejex te Jehová te Dios awu'unic, mayuc bin la spasex falta.

⁸Hich namal hil cu'untic te sq'uinal te quermanotactic, ha te snich'nab Esaú te nahinemic ta witsiltic Seir; hil cu'untic te sbehlal Arabá te talem ta Elat soc Ezión-geber, la jcac'tic buelta, la jtsactic te be yu'un te jochol taquin q'uinal yu'un Moab.

⁹Hich la yalbon te Jehová: Ma me xawuts'in te Moab, ma me xawa'be guerra, yu'un ma ba ya ca'beyex awich'ic te sq'uinalic, yu'un ca'beyej yich'ic te Ar te snich'nab Lot, xchi.

¹⁰(Ha nahil nahinic tey a te emetic, ay yip te pueblo soc bayelic, hich snahtilic te bin ut'il sts'umbal Anac.

¹¹Nahtil winiquetic, xchi sc'oblalic, pajal soc te sts'umbal Anac, pero te moabetic la ya'beyic sbihilin emetic.

¹²Soc ta Seir nahil nahinic tey a te horeo te tenotic loq'uel yu'un te snich'nab Esaú, la stenic loq'uel ta stojolic, ha hilic ta nahinel tey a, hich te bin ut'il la spas Israel ta q'uinal te a'bot yich'ic yu'un Jehová.)

¹³Yo'tic hahchanic me, sohlanic bahel ta uc'um Zered, xchi te Jehová. Hich sohlotic ta uc'um Zered.

¹⁴Te jayeb ha'bil loc'otic hahchel ta Cades-barnea ha to c'alal sohlotic ta uc'um Zered, waxaclajuneb scha'winic (38) ha'bil, ha to c'alal chamic ta campamento spisil te winiquetic te ya yaq'uic guerra, hich te bin ut'il jc'axel halbotic ta jamal yu'un Jehová.

¹⁵Te sc'ab Jehová tal ta stojolic yu'un ya slajinlan ta yohlil te campamento ha to c'alal cham spisilic.

¹⁶Te c'alal cham spisil te winiquetic te ya yaq'uic guerra,

¹⁷hich la yalbon te Jehová:

¹⁸Yo'tic ya me xc'axat bahel ta sq'uinal Moab ta banti Ar.

¹⁹Te c'alal ya xnohpojat ta banti ay te snich'nab Amón, ma me xawuts'inic soc ma me xawa'beyic guerra, yu'un ma ba ya ca'bat te sq'uinal te snich'nab Amón, como ha la jca'be yich'ic te snich'nab Lot.

²⁰(Ha nix na'bot sba te ha sq'uinal nahtil winiquetic ta nahil to; nahinic tey a te nahtil winiquetic, pero te amonetic la ya'beyic sbihilin zomzomeohetic.

²¹Ay yip te pueblo soc bayelic, hich snahtilic te bin ut'il te sts'umbal Anac te lajinotic yu'un Jehová ta stojol te amonetique. La stenic loq'uel, ha hilic ta nahinel tey a,

²²hich te bin ut'il te Jehová la spasbe te snich'nab Esaú te nahinemic ta Seir, ha te la slajinic te horeohetic ta stojolic; ha'ic la stenic loq'uel soc hilic ta nahinel tey a c'alal ora.

²³Soc te heveohetic te nahinemic ta tut pueblohetic c'alal ta Gaza, lajinotic yu'un te caftoretic te talemic ta Caftor, soc ha'ic hilic ta nahinel tey a.)

²⁴Hahchanic, sohlanic bahel ta sjuclej Arnón. Ilawil, la jca'beyex ta ac'abic te Sehón te amorreo-winic, ajwalil yu'un Hesbón, soc te sq'uinale. Hahchanic ta yu'untayel te q'uinal soc a'beyahic guerra.

²⁵Yo'tic ya cac' xi'at spisil te pueblohetic ayic ta ye'tal ch'ulchan. Te c'alal ya ya'iybat ac'oblal ya me xnihquic soc ya me x'u'untaybot yo'tanic yu'un mel-o'tan ta acuentahic, xchi.

²⁶Ta jochol taquin q'uinal yu'un Cademot la jticon bahel winiquetic ta stojol Sehón ajwalil yu'un Hesbón, ta halbeyel te c'op ini scuenta lamal-o'tanil:

²⁷Ac'a sohlucon bahel ta aq'uinal; ya jt'un bahel te muc'ul be, ma ba ya xbohon ta wa'el o ta q'uexam.

²⁸Chombon te we'elil te ya jwe' soc te ha' te ya cuch'. Ha nax ac'a sohlucon bahel ta coc,

²⁹hich te bin ut'il la spasbon te snich'nab Esaú te nahinemic ta Seir, soc te moabetic nahinemic ta Ar, ha to c'alal ya sohlon bahel ta muc'ul-ha' Jordán ta q'uinal ya ya'botcotic Jehová te Dios cu'uncotic, xchihon ta stojol.

³⁰Pero te Sehón, ajwalil yu'un Hesbón, ma ba la sc'an ya yac'otic c'axel ta sq'uinal, como te Jehová te Dios awu'unic la stulantesbe yo'tan scuenta yu'un ya ya'beyex ta ac'abic, hich te bin ut'il c'alal ora.

³¹Hich la yalbon te Jehová: Ilawil, hahchemonix ta yaq'uel ta ac'ab te Sehón soc te sq'uinale. Hahchan me ta yu'untaybeyel te sq'uinal scuenta yu'un awu'un ya xc'oht a, xchi.

³²Te Sehón loc' tal stahotic soc spisil te pueblo yu'un, tal ya'botic guerra ta Jahaza.

³³Pero te Jehová te Dios cu'untic la ya'botic ta jc'abtic, la jtsaltic te Sehón, te snich'nab soc spisil te pueblo yu'une.

³⁴La jtsaltic spisil te pueblohetic yu'un, jc'axel la jlajintic, ha te winiquetic, antsetic soc alaletic; mayuc mach'a cuxul hil cu'untic.

³⁵Ha nax la jquich'tic te chambahlametic soc te biluquetic ta pueblohetic te la cu'untaytic.

³⁶Mayuc junuc pueblo col cu'untic c'alal ta Aroer, te nopol ay ta sjuclej Arnón, soc te pueblo ay ta sti'il te muc'ul-ha', c'alal ta Galaad, spisil la ya'botic ta jc'abtic te Jehová te Dios cu'untic.

³⁷Ha nax ma ba ochotic ta sq'uinal te snich'nab Amón, ta spisil te q'uinal ay ta sti'il te uc'um Jaboc, ta pueblohetic ta witsiltic, ni ta bayuc te ma ba la yac' ya x'ochotic te Jehová te Dios cu'untique.