Read Tzeltal Deuteronomio 20 Bible Online

Deuteronomio 20 - Tzeltal bible

Deuteronomio 20

¹Te c'alal ya xloc'at ta ya'beyel guerra te acontrahic, teme yac awil cawuhetic soc carretahetic, soc jun pueblo te c'ax hich smuc'ul a te bin ut'il te ha'ate, ma me xaxi', como ha sjoquinejat te Jehová te Dios awu'un, ha te la sloq'uesat tal ta sq'uinal Egipto.

²Te c'alal ya xnohpojex bahel ta yaq'uel guerra, ya me stehc'an sba te sacerdote, ya sc'opon te soldadohetic awu'unic,

³hich me ya yal: A'iya awa'iyic, Israel, la atsobix abahic ta ya'beyel guerra te acontrahique; ma me xpehc'aj awo'tanic, ma xiwex, ma xamel awo'tanic, ma me tulanuc xawa'iy xiwel ta stojolic,

⁴como te Jehová te Dios awu'unic ya me sjoquinex yu'un ya ya'be guerra te acontrahic, yu'un hich ya scoltayex a.

⁵Patil te jcuentahinwanejetic ya me sc'oponic te soldadohetic, hich me ya yalic: ¿Mach'a spasojix yach'il sna te ma to ba nahinem tey a? Ac'a suhtuc ta sna, teme repente ya xlaj ta guerra, yanix mach'a ya xnahin tey a.

⁶¿Mach'a sts'unoj sts'usubil te ma to ba smulambeyej te site? Ac'a suhtuc ta sna, teme repente ya xlaj ta guerra, yanix mach'a ya smulambe a te site.

⁷¿Mach'a quechel ya xnuhpun te ma to ba yic'oj a te antse? Ac'a suhtuc ta sna, teme repente ya xlaj ta guerra, yanix mach'a ya yic' a, xchihic.

⁸Te jcuentahinwanejetic ya me sc'oponic xan te soldadohetic, hich ya yalic: ¿Mach'a a te ya xiw soc te mayuc yip yo'tan? Ac'a suhtuc ta sna scuenta yu'un hich ma sjuc ta xiwel a te yantic yermanotac, xchihic me.

⁹Te c'alal ya xlaj ta c'op te jcuentahinwanejetic, te capitanetic ya xnahilijic bahel yu'un te soldadohetique.

¹⁰Te c'alal ya xnohpojat bahel ta stojol jun pueblo yu'un yac awa'be guerra, ya me awalbe teme ya sc'anic lamaluc q'uinal ta stojolic.

¹¹Teme ya sc'anic lamal q'uinal, teme ya sjambat te yochibal te pueblo, spisil te mach'atic tey ayic a yac awa'batin, yac awac' te ya x'a'tejic ta atojol.

¹²Yan teme ma sc'anic te lamal q'uinal awu'unic soc, teme ya ya'beyex guerra, ya me ajoytayic ta ya'beyel querra.

¹³Te c'alal la ya'batix ta ac'ab a te Jehová te Dios awu'un, ya me amilticlan ta espada spisil te winiquetique.

¹⁴Yan te antsetic, alaletic, chambahlametic soc spisil te bintic ay ta pueblo, ha awu'un ya xc'oht; yac awe'be te bintic ay yu'un te acontratac te a'botat ta ac'ab yu'un te Jehová te Dios awu'une.

¹⁵Hich me yac apasbe spisil te pueblohetic te namal ayic, te ma ha'uc yu'un te nacionetic te nopol ayique.

¹⁶Yan te pueblohetic yu'un te nacionetic te li' ayic te ya ya'bat awich' te Jehová te Dios awu'un, ma me ayuc mach'a cuxul ya xhil awu'un,

¹⁷jc'axel me xalajinlan, ha te heteo, amorreo, cananeo, ferezeo, heveo, jebuseo, hich te bin ut'il la spasat ta mandar te Jehová te Dios awu'un,

¹⁸scuenta yu'un ma ba ya ya'beyex anopic spasel te bintic ilobtic sba spasojiquix ta stojol te diosetic yu'unic, te hich yac ata amulic a ta stojol te Jehová te Dios awu'unique.

¹⁹Te c'alal yac ajoytay ta ya'beyel guerra jun pueblo, teme bayel c'ahc'al yac awa'be guerra yu'un yac awu'untay, ma me xatojol ts'et ta echej te te'etic yu'unic te ya yac' sit, yu'un ya xhu' yac alo'be te site. Ma me xats'eticlan, como te te'etic ay ta ha'mal ma winicuc te ya xtal scontrahinate.

²⁰Yan te te' ana'oj te ma xyac' sit, ya xhu' yac alajin ta ts'etel yu'un yac apas amahquilic ta sti'il te pueblo te ya ya'bat guerra, ha to c'alal ya x'och ta ac'ab.