Read Tzeltal Deuteronomio 21 Bible Online

Deuteronomio 21 - Tzeltal bible

Deuteronomio 21

¹Tey ta q'uinal te ya ya'bat awu'untay te Jehová te Dios awu'un, teme ay tahot ta yohl q'uinal mach'a lajem, teme ma chicanuc mach'a milot yu'une,

²te mamaletic soc juecetic awu'un ya me xloq'uic tal, ya sp'is hich snamalil yiloj sba soc te pueblohetic te nopol ayic soc te mach'a lajeme.

³Te mamaletic yu'un te pueblo te nopol ay te banti tahot te mach'a lajem, ya me stsac jcoht jcolel wacax te ma to ba a'tejem, te ma to scuchoj yugo,

⁴ya yiq'uic bahel ta spamlej ta banti ay uc'um te spisil ora ay ya'lel, te ma ba tucbil soc mayuc bin ts'umbil tey a, ya sc'ajbeyic snuc' te jcolel wacax tey ta spamlej.

⁵Patil ya xnohpojic tal te sacerdotehetic, te snich'nab Leví, como ha'ic te tsahbilic yu'un Jehová te Dios awu'un yu'un ya yac' sbahic ta a'batinel yu'un soc ya yaq'uic bendición ta scuenta sbihil Jehová, soc yu'un ya schahpanic spisil ta chahp c'opetic te ya xchicnaje.

⁶Spisil te mamaletic yu'un te pueblo te nopol ay ta banti tahot te mach'a lajem, ya me spoc cohel sc'abic ta sba te jcolel wacax te c'ajbot snuc' ta spamlej,

⁷soc hich me ya yalic ta jamal: Ma ba ho'otcotic la jmalcotic te ch'ich' ini, soc ma ba la jquilcotic.

⁸Jehová, pasbeya perdón te pueblo Israel awu'un te la acoltay loq'uel ta libre; ma me xawa'be smulinic te ch'ich' te pueblo Israel awu'un, xchihic me. Hich ya xpasbotic perdón yu'un te ch'ich'e.

⁹Hich yac aloq'ues ta awohlilic a te mulil yu'un smalbeyel sch'ich'el te mach'a mayuc smul, te c'alal yac apas te bin stojil ay ta pasel ta stojol Jehová.

¹⁰Te c'alal ya xloc'at bahel ta ya'beyel guerra te acontratac, teme ya ya'bat ta ac'ab te Jehová te Dios awu'un soc ay mach'atic yac achuc tal,

¹¹teme yac awil te ay buen t'ujbil ants tey a, teme yac amulan soc teme yac awic' awihnamin,

¹²ya me awic' ochel ta ana. Te ants ya sjoch loq'uel stsotsel sjol soc ya set'ticlan yehch'ac,

¹³ya schol te sc'u' slapoj a te c'alal och ta chuquel, ya xhil ta ana, ya yoq'uetay jun u te sme'stat. Patil ya xhu' ya xwayat soc, ha smamalal ya xc'ohat, ha awihnam ya xc'oht.

¹⁴Teme patil ma ba yac amulan, ya me awac' ta libre; ma xachon ta taq'uin soc ma hichuc ya xc'oht awu'un te bin ut'il moso, como la apehc'ambe sc'oblal.

¹⁵Teme ay winic te cheb yihnam, teme c'ux ta yo'tan te jtuhle, ma ba c'ux ta yo'tan te yane, teme schebal ya yalataybe snich'nab, teme ha querem te sba-al te ants ma ba c'ux ta yo'tan,

¹⁶te c'alal ya sta yorahil te ya spucbe sbiluc te snich'nab, ma xhu' ya ya'be te yal te ants c'ux ta yo'tan te bin scuenta ba-alalil, te hich ma ba ya ya'be te yal te ants ma ba c'ux ta yo'tan, te ha mero ba-alal stuquel.

¹⁷Ya me sna' te ha sba-nich'an te yal te ants ma ba c'ux ta yo'tan, ya me ya'be hilel cheb buelta xan a te bin ut'il ya ya'be te yantic snich'nab, como ha shahchibal sit te yip, soc ha yu'un te ya yich' te bin scuenta ba-alalil.

¹⁸Teme ay mach'a ay squerem-nich'an te tulan yo'tan soc toyol yac'oj sba, te ma ba ya sch'uhun spasel te bin ya yal te sme'stat, ma ba ya sch'uhumbe sc'opic aunque ya x'a'bot castigo yu'unic,

¹⁹hich te sme'stat ya me yiq'uic bahel ta stojol te mamaletic te ayic ta yochibal te pueblo banti nahinem,

²⁰hich ya xc'oht yalbeyic: Ha'i cal-jnich'ancotic ini mero tulan yo'tan soc toyol yac'oj sba, ma ba ya sch'uhun jc'opcotic, ha nax bahem ta yo'tan we'el soc yacubel, xchihic.

²¹Ha yu'un spisil te winiquetic yu'un te pueblo ya me sch'ojic ta ton, hich ya xlaj. Hich yac aloq'ues a te bin chopol ta awohlil, soc spisil Israel ya me ya'iyic soc ya me xi'ic.

²²Teme ay mach'a ay bin chopol la spas te ya yich' milel yu'une, teme yac amilic soc teme yac ajihpanic ta te',

²³ma me xawac' te ya xc'ax ahc'abal jipil ta te' te sbaq'uetal, ya me amuc ta sc'ahc'alel nix, como bohloben sc'oblal yu'un Dios te mach'a jipil ta te'. Hich ma ba yac abohlobtes a te aq'uinal ya ya'bat te Jehová te Dios awu'une.