Read Tzeltal Deuteronomio 22 Bible Online

Deuteronomio 22 - Tzeltal bible

Deuteronomio 22

¹Teme ay yac awil te ch'ayem swacax o stuminchij te awermano, ma me xawil nax, ya me awic'be bahel ta stojol.

²Teme ma nopoluc ay ana soc, o teme ma xana'be sba, ya me awic' tal ta ana, ya xhil ta ana ha to c'alal ya xtal ta slehel, ya me awa'be suhtel.

³Hich nix yac apasbe te sburro, te sc'u' spac', soc spisil bintic ay yu'un awermano te ch'ay, te la ata ha'at; coltaya, ma me xawil nax.

⁴Teme ay yac awil te puch'em ta be te sburro o swacax te awermano, ma me q'uejeluc xbahat, ya me acoltay ta shachel.

⁵Te ants ma me slapbe sc'u' spac' winic; soc te winic ma me slapbe sc'u' spac' ants, como mero ihlaybil yu'un Jehová te Dios awu'un mach'ayuc a te hich ya spase.

⁶Teme ay yac ata ta be spechech ha'mal mut, teme ay ta te' o ay ta lum, teme ay sbic'tal-al o ay ston tey a, teme luts'bil yu'un te sme'e, ma me xawic' bahel soc sme' te yalatac.

⁷Ya me acoltay bahel te sme', pero ya xhu' yac awic' bahel te yalatac. Hich yac apas scuenta yu'un lec ya xc'ohat soc bayel c'ahc'al ya xcuxajat.

⁸Te c'alal yac apas yach'il ana, ya me awa'be sts'ahcul ta sjoyobal ta sba, scuenta yu'un teme ay mach'a ya xch'ay cohel tey a, ma ba yac ata mulil yu'un ch'ich' a ha'at soc te mach'atic awu'un ta ana.

⁹Ma me capaluc ta yan awalil te awalil ts'usub yac awaw, scuenta yu'un ma xch'ay awu'un spisil a te awalil te la ats'un soc te sit te ts'usubile.

¹⁰Ma me xawa'be snuhp'in sba ta tuclum te wacax soc te burro.

¹¹Ma me xalap c'u'ul te jalbil ta tsotsel tuminchij soc ta lino.

¹²Ya me ajihpambe stsihtsimal ta schanebal schiquin te amehyil pac'.

¹³Teme ay mach'a ya yic' ants, teme way soc pero patil la yihlay,

¹⁴teme ya slehbe smul soc ya sbohlobtesbe sc'oblal, te hich ya yal: Nuhpunon soc ha ants ini, pero te c'alal wayon soc, ma ach'ixuquix a la jta, teme xchihe,

¹⁵hich te sme'stat te ants ya me yich'ic bahel te señahil te yach'ixlel, ya me yaq'uic ta ilel ta stojol te mamaletic ta yochibal te pueblo.

¹⁶Te stat te ants hich ya xc'oht yalbe te mamaletic: La jca'be yihnamin cantsil-nich'an ha winic ini, pero ya yihlayix,

¹⁷la slehbeyix smul, hich ya yal: Ma ach'ixuquix a la jta te awantsil-nich'an, xchi. Pero ilawil, li' ay te seña te yach'ixlel te cantsil-nich'an, xchi me te state. Ya me slimic ta ilel te c'u'ul ta stojol te mamaletic yu'un te pueblo.

¹⁸Ha yu'un te mamaletic ya me stsaquic te winic, ya me ya'beyic castigo.

¹⁹Soc ya me ya'beyic stoj ho'winic (100) ta sehp plata scuenta multa, te ya ya'be te stat te ach'ix, como la sbohlobtesbe sc'oblal jtuhl ach'ix ta Israel. Soc ha yihnam ya xhil, ma xhu' ya yihquitay hilel te jayeb c'ahc'al cuxule.

²⁰Pero teme melel nix a te ma ach'ixuquix a tahot te antse,

²¹ya me sloq'uesic bahel ta sti'il sna stat, te winiquetic ta pueblo yu'un ya me smilic ta ch'ojel ta ton, como la spas te bin chopol ta Israel, la yac' sba ta antsinel ta sna stat. Hich me yac aloq'ues te bin chopol ta awohlil.

²²Teme ay ya yich' tahel winic te wayal soc ants te ay smamalal, schebalic me ya yich'ic milel, te winic soc te antse. Hich me yac aloq'ues a te bin chopol ta Israel.

²³Teme ay jtuhl ach'ix te quechelix ta nuhpunel, teme ya xtahot yu'un yan winic ta yutil te pueblo, teme ya xway soc,

²⁴ya me aloq'uesic bahel schebalic ta sti'il te pueblo, ya me amilic ta ch'ojel ta ton; te ach'ix, yu'un ma ba awon ta sc'anel coltayel te bin ut'il ay ta yutil pueblo; te winic, yu'un la sbohlobtesbe sc'oblal te yihnam spat-xuhc. Hich me yac aloq'ues te bin chopol ta awohlile.

²⁵Yan teme ay winic te ya sta ta yohl q'uinal jtuhl ach'ix te quechelix ta nuhpunel, teme ya stsac, ya xway soc, ha nax ya yich' milel stuquel te winic te way soc;

²⁶mayuc bin yac apasbe stuquel te ach'ix, mayuc mulil spasoj te ya xhu' ya xlaj yu'une. Ha ini ha pajal c'ohem soc te mach'a ya scontrahin spat-xuhc soc ya smil.

²⁷Como te winic la stsac te ach'ix ta yohl q'uinal; aunque awon te ach'ix, mayuc mach'a coltayot yu'un.

²⁸Teme ay jtuhl winic te ya sta jtuhl ach'ix te ma ba quechel ta nuhpunel, teme ya stsac, ya xway soc, teme chicnaje,

²⁹te winic te way soc te ach'ix ya me ya'be lajuneb yoxwinic (50) ta sehp plata te stat te ach'ix, ha yihnam ya xc'oht, como la spehc'ambe sc'oblal te ach'ixe; ma xhu' ya yihquitay te jayeb c'ahc'al cuxule.

³⁰Ma me ayuc mach'a ya yic'be yihnam stat, ma me sbohlobtesbe sc'oblal te state.