Read Tzeltal Deuteronomio 23 Bible Online

Deuteronomio 23 - Tzeltal bible

Deuteronomio 23

¹Ma xhu' ya x'och ta tsoblej yu'un Jehová te mach'a t'usbil stomutil sbac', o teme xot'bil loq'uel ste'el.

²Te al-nich'anil te hich nax tahbil ma xhu' ya x'och ta tsoblej yu'un Jehová, ni ha'uc ta slajuncajal sts'umbal ma xhu' ya x'och ta tsoblej yu'un Jehová.

³Ma xhu' ya x'ochic amonetic soc moabetic ta tsoblej yu'un Jehová, ni ha'uc ta slajuncajal sts'umbal; stalel mayuc bin ora ya x'ochic ta tsoblej yu'un Jehová,

⁴ta scaj te ma ba loc' ya'beyex we'elil soc ha' ta be c'alal loq'uex tal ta Egipto, soc ta scaj te la stojic te Balaam snich'an Beor, te talem ta Petor ta Mesopotamia, scuenta yu'un ya sbohlobtesbeyex ac'oblalic.

⁵Pero te Jehová te Dios awu'un ma ba la yich'be ta cuenta te sc'op Balaam. Te Jehová te Dios awu'un la sc'atp'umbat ta bendición te chopol c'oblalil c'anot ta atojol, como c'uxat ta yo'tan te Jehová te Dios awu'une.

⁶Ma me xalehbe yutsil slequilic soc ma me xawac' lahmajuc q'uinal ta stojolic te jayeb c'ahc'al cuxulic ta q'uinal.

⁷Ma me xawihlay te edometic, como awermanotac stuquelic. Ma me xawihlay te egipciohetic, como ha jyanlum ayinat ta sq'uinal.

⁸Te yoxcajal patil al-nich'anetic yu'unic ya xhu' ya x'ochic ta tsoblej yu'un Jehová.

⁹Te c'alal ya xloc'at ta ya'beyel guerra acontratac, ya me atsahtay aba yu'un spisil bintic chopol.

¹⁰Teme ay mach'a ay ta awohlil te bohloben sc'oblal yu'un ay bin mal loq'uel yu'un ta ahc'abal, ya me xloc' bahel ta campamento, ma ba ya suht ochel.

¹¹Pero ta xtibiltay ya x'atin, soc te c'alal mahlix c'ahc'al a ya xhu' ya x'och yan buelta ta campamento.

¹²Ya sc'an te ay jun lugar ta sti'il te campamento banti ya xbahat ta tsa'nel.

¹³Soc ya me awich' bahel jch'ixuc te', yu'un te c'alal ya xbahat ta tsa'nel yac ahot ch'en soc; c'alal ya suhtat tal, yac amuc hilel ta lum.

¹⁴Como te Jehová te Dios awu'un ya xbehen ta yohlil te acampamento yu'un ya scoltayat soc ya ya'bat ta ac'ab te acontratac; ha scuentahil te ya sc'an ch'ultesbil te campamento awu'un, scuenta yu'un ma ba ya yil tey a te bin ma lecuc, te hich ya yihquitayat hilel.

¹⁵Ma me xawac' xan ta stojol yajwal te a'bat te ahn loq'uel tal ta atojol.

¹⁶Ya me sjoquinat ta nahinel ta awohlil, ta lugar ya sle ta bayuc pueblohil te banti ya smulan; ma me xawuts'in.

¹⁷Ma me ayuc j'antsinel-ants ta yohlil te yantsil-nich'nab Israel, soc ma me ayuc ta yohlil Israel winic te ya xway soc yan winic.

¹⁸Ma me xawich' tal ta sna Jehová te Dios awu'un te stojol jtuhl j'antsinel-ants o te stojol winic sjel ta ts'i'[10] ta stojel biluc a te bin achapoje, como schebalic ihlaybilic yu'un Jehová te Dios awu'une.

¹⁹Ma me xac'ambe sjol ataq'uin te awermano, o sjol we'elil, o yantic biluquetic te ya xhu' ta c'ambeyel sjol.

²⁰Yan te jyanlum ya xhu' yac ac'ambe sjol stuquel, pero te awermano ma xhu' yac ac'ambe, scuenta yu'un hich ya ya'bat bendición a te Jehová te Dios awu'un ta spisil bintic yac apas tey ta q'uinal banti yac awu'untay.

²¹Te c'alal yac achap ac'op ta stojol Jehová te Dios awu'un, ma me xhalajat ta stojel; como ya me sc'ambat te Jehová te Dios awu'un, ha amul ya xc'oht teme ma ba yac awaq'ue.

²²Yan teme mayuc bin awaloj, mayuc amul yu'un.

²³Pero te bin awaloj ta awe', ya me ac'ohtes ta pasel, hich te bin ut'il la awal ta jamal ta stojol Jehová te Dios awu'un, hich yac awac' te mahtanil scuenta sc'anojel awo'tan te la awal ta awe' te yac awaq'ue.

²⁴Teme ya x'ochat ta sts'unubil apat-axuhc, ya xhu' yac alo'be sit jayeb ya sc'an awo'tan, pero ma me xawac' ta amoch.

²⁵Teme ya x'ochat ta awal-ts'unubil yu'un apat-axuhc, ya xhu' yac atuch'ticlambe sit ta ac'ab, pero ma me xaboj ta hoz te bin ay tey a.