Read Tzeltal Deuteronomio 24 Bible Online

Deuteronomio 24 - Tzeltal bible

Deuteronomio 24

¹Teme ay mach'a ya xnuhpun soc ants, teme ma ba ya smulanix yu'un ay bin chopol la stahbe, ya me sts'ihbabe hun scuenta ihquitayel, ya ya'be ta sc'ab soc ya sticon loq'uel ta sna.

²Te c'alal loq'uix ta sna a, ya xhu' ya xnuhpun soc yan winic te antse.

³Pero teme ha nix hich ma ba mulanot yu'un te schebal smamalal, teme ya sts'ihbabe hun scuenta ihquitayel, ya ya'be ta sc'ab soc ya sticon loq'uel ta sna; o teme cham te schebal smamalale,

⁴te sba mamalal te ihquitayot hilel yu'une, ma xhu' ya yic' xan yihnamin, te bohlobenix sc'oblal; ha ihlaybil yu'un Jehová te hich ya yich' pasele. Ma me xawac' bohlobuc te q'uinal ya ya'bat te Jehová te Dios awu'une.

⁵Teme ay mach'a nuhpunel to, ma me xbaht ta guerra soc ma me ayuc bin a'telil ya x'a'bot spas, hich nax ac'a ayinuc ta sna junuc ha'bil, scuenta yu'un buen tse'el yo'tan ya x'ayin soc te yihname.

⁶Ma me xawich' hilel scuenta prenda te molino, ni ha'uc te sc'abe; yu'un ha pajal c'ohem soc te yac ac'ambe hilel te scuxlejale.

⁷Teme ya xchicnaj te ay mach'a la yelc'an bahel jtuhl yermano Israel, teme la smosohin o la schon, ya me yich' milel te j'elec'. Hich me yac aloq'ues te bin chopol ta awohlil.

⁸Te banti te c'a'el-chamel, buen tsahtaybiluc me awu'unic yac apasic spisil te bin ya yalbeyex apasic te sacerdote-levitahetique; hich te bin ut'il la jpasex ta mandar, hich ni me xapasic.

⁹Na'a me te bin la spas Jehová te Dios awu'un ta stojol María te c'alal ayex ta be a, te c'alal loq'uelex to tal a ta Egipto.

¹⁰Teme ay bin yac awa'be smajan te apat-axuhc, ma me x'ochat ta yutil sna yu'un ay bin yac awich'be bahel ta prenda.

¹¹Ya me xhilat ta fuera, te winic te ay bin la awa'be smajan ha ya sloq'uesbat tal te prenda.

¹²Teme pobre te winique, ma me xbahat ta wayel te awich'oj to te bin ya'beyejat bahele.

¹³Ya me asutbe c'alal ya xmahl te c'ahc'ale, scuenta yu'un ya xhu' ya xway soc te sc'u' soc ya ya'bat bendición. Ha stojil ta pasel ta stojol te Jehová te Dios awu'une.

¹⁴Ma me xawa'be swocol te jle-a'tel te pobre ay te mayuc bin ay yu'une, teme ha nix awermanotac o jyanlumetic te nahinemic ta aq'uinal ta pueblohetic awu'un.

¹⁵Ta sc'ahc'alel nix ya me atojbe te ya'tele, ma me mahluquix c'ahc'al a te yac atoj, como pobre, ha ya xcuxaj a; scuenta yu'un ma ba ya x'awon ta stojol Jehová ta acontra, te hich yac ata amul a.

¹⁶Te tatiletic ma me xlajic yu'un smul te al-nich'aniletic, soc te al-nich'aniletic ma me xlajic yu'un smul te tatiletique; jujutuhl ya xlaj yu'un te smule.

¹⁷Ma me xayanijtes bin stojil ta pasel ta stojol te jyanlum o te me'ba' alaletic, soc ma me xawich'be hilel sc'u'-spac' te me'ba' antse;

¹⁸ya me ana' te c'axat ta mosohil ta Egipto, te tey la sloq'uesat tal a te Jehová te Dios awu'une; ha scuentahil te ya jpasat ta mandar te hich yac apas.

¹⁹Te c'alal yac atsobe te sit ats'unub awawal ta aq'uinal, teme ay jtohmuc ma ba la ana' tal, ma me suhtat ta slehel tal, ha yu'unix te jyanlum, me'ba' alal soc te me'ba' ants; scuenta yu'un ya ya'bat bendición a te Jehová te Dios awu'un ta spisil te bin yac apase.

²⁰Te c'alal yac ayuc'be cohel sit te olivohetic awu'un, ma me xc'ax acha'le xan sit banti c'axematix, ha me yu'unix te jyanlum, me'ba' alal soc te me'ba' antse.

²¹Te c'alal yac atulbe sit te ats'usubil, ma me xc'ax acha'le xan te site, ha yu'unix te jyanlum, me'ba' alal soc te me'ba' antse.

²²Na'a me te c'axat ta mosohil ta sq'uinal Egipto; ha scuentahil te ya jpasat ta mandar te hich yac apase.