Read Tzeltal Deuteronomio 25 Bible Online

Deuteronomio 25 - Tzeltal bible

Deuteronomio 25

¹Teme ay mach'atic ay c'op yu'unic, teme ya xbahtic ta meltsajibal yu'un te juecetic yu'un ya schahpanic, ha'ic ya yalic te mach'a mayuc smul soc te mach'a ay smule.

²Teme ya sc'an ya yich' majel te mach'a ay smule, te juez ya ya'be spahcan sba ta lum soc ya yac' te ya yich' majel ta stojol. Ha chican bin ut'il ay te smule, hich yipal ya yich' majel.

³Ya xhu' ya yich' cha'winic (40) ta yahlel te majele, pero ma xhu' ya xc'ax a; yu'un teme c'ax hich ya yich' majel a, c'ax peq'uel sc'oblal ya ya'iy ya xc'oht yu'un ta atojol te awermanohe.

⁴Ma me xawa'be sbolsahil sni' te j'a'tel-wacax te c'alal yac ta sp'uyel trigo o cebada.

⁵Teme ay cheb winiquetic te yermano sbahic te junax na banti nahinemic, teme ay jtuhl ya xcham, teme mayuc ya xhil jtuhluc snich'ane, te me'ba' ants te cham smamalal ma xhu' ya xnuhpun soc yan winic te yan sbihile; ha nix ya x'ic'ot yu'un te smu'e, yu'un tey ya xchicnaj sts'umbal a te yermano.[11]

⁶Te sba-al te ants, teme querem, ha sjelol ya xc'oht te yermano chame, scuenta yu'un hich ma xch'ay sbihil ta Israel a.

⁷Yan teme ma sc'an te winic te ya yic' te smu'e, hich te smu' ya me xbaht ta yochibal te pueblo, ta stojol te mamaletic, hich ya xc'oht yalbe: Te jmu' ma sc'an ya ya'be hilel sbihil te yermano ta Israel; ma sc'an ya yic'on te bin ut'il ha jmu', xchi ya xc'oht.

⁸Ha yu'un te mamaletic yu'un te pueblo ya me sticonic ta iq'uel tal te winic, ya xc'opojic soc. Teme hich ya yal te winic: Ma jc'an ya quic' te ants, teme xchihe,

⁹hich te smu' ya me xnohpoj tal ta sts'ehl ta stojol te mamaletic, ya sloq'uesbe step ta yoc te winic, ya stuhbataybe yelaw soc hich ya yalbe: Hich ya yich' pasbeyel te winic te ma sc'an ya ya'be sts'umbal te yermano, ya me yut.

¹⁰Hich ya x'a'bot sbihilin te sts'umbal ta Israel: Ha sts'umbal te mach'a loq'uesbil step, xchi sc'oblal.

¹¹Teme ay mach'atic yac smajbel sbahic, teme ya xnohpoj tal yihnam te jtuhle yu'un ya scoltay te smamalal yac yich'bel majel yu'un te yane, teme ya stsacbe te banti sc'unil te yane,

¹²ya me axot'be sc'ab; ma me xana'be yo'bolil sba.

¹³Ma me ayuc muc' soc tut sp'isol yalal ta abolsa,

¹⁴soc ma me ayuc ta ana muc' soc tut efa.

¹⁵Ya sc'an te mero stojil soc ts'acal sp'isol yalal soc efa, scuenta yu'un hich me hal c'ahc'al ya xcuxajat ta q'uinal te ya ya'bat te Jehová te Dios awu'une.

¹⁶Como ihlaybil yu'un Jehová te Dios awu'un mach'ayuc a te hich ya spas soc mach'ayuc a te ya spas te bin ma stojiluc ta pasele.

¹⁷Ya me ana' te bin la spasbat te Amalec te c'alal ayat ta be, te c'alal loc'atix tal ta Egipto a;

¹⁸ha te bin ut'il loc' tal stahat ta be soc te la slajinlan te mach'atic pehc'ajem yipic te patil yacalic ta talel awu'un, te c'alal ay aluhbel soc lajem awip a; jc'axel ma ba la xi' te Diose.

¹⁹Ha yu'un te c'alal Jehová te Dios awu'un la ya'batix acux awo'tan yu'un spisil acontratac ta ajoyobal tey ta q'uinal ya ya'bat ta acuenta yu'un yac awu'untay, jc'axel me xatup'be sc'oblal Amalec ta ye'tal ch'ulchan; ma me xch'ay ta awo'tan.