Read Tzeltal Deuteronomio 26 Bible Online

Deuteronomio 26 - Tzeltal bible

Deuteronomio 26

¹Te c'alal ochematix a tey ta q'uinal ya ya'bat te Jehová te Dios awu'un soc te yac awu'untay te q'uinal soc ya xnahinat tey a,

²ya me awac' ta moch spisil te sba sit ats'unub-awawal te yac aloq'ues tey ta q'uinal ya ya'bat te Jehová te Dios awu'un, ya me xbahat tey ta lugar ya stsa te Jehová te Dios awu'un banti ya yac' te sbihile.

³Ya xc'ohat ta stojol te sacerdote te ha yorahil ay ya'tel a, hich yac awalbe: Yo'tic ya calbe te Jehová te Dios awu'un te ochemonix ta q'uinal te jc'axel la yalbe ta jamal te jme'jtatic te ya ya'botic, xchihat.

⁴Te sacerdote ya stsacbat te moch ay ta ac'ab, ya yac' ta stojol te scajtajib ta chiq'uel mahtanil yu'un Jehová te Dios awu'une.

⁵Hich yac awal ta stojol te Jehová te Dios awu'un: Jbehyomal arameo te jtat te co bahel ta Egipto banti c'oht ta nahinel, mayuc tsobolic a. Tey c'atp'uj ta muc'ul nación a te bayel yip soc tsobolic.

⁶Te egipciohetic la yuts'inotcotic, la ya'botcotic bayel jwocolcotic, la yac' jcuchcotic tulan mosohinel.

⁷Hich awonotcotic ta stojol Jehová te Dios yu'un te jme'jtatic; te Jehová la ya'iybotcotic jc'opcotic soc la yilbotic te jwocolcotic, te tulan ca'telcotic soc te uts'inel te ay jwocolcotic yu'une.

⁸Te Jehová la yic'otcotic loq'uel tal ta Egipto ta scuenta yu'el sc'ab shachoj, ta scuenta te bin mero xiweltic sba soc ta scuenta señahiletic soc jchahp a'teliletic;

⁹la yic'otcotic tal li' ta lugar ini soc la ya'botcotic te q'uinal ini te banti ya x'oquin leche soc chab.

¹⁰Yo'tic, Jehová, la jquich' tal te sba sit te jts'unub-cawal te loc' tal ta q'uinal la awa'bon, xchihat. Ya me apahchambe ta stojol Jehová te Dios awu'un soc ya me aquejan aba ta stojol.

¹¹Tse'eluc me awo'tan yu'un spisil te bintic ya'beyejat te Jehová te Dios awu'un soc te mach'atic ay awu'un ta ana, soc nix te levita soc jyanlum te ay ta awohlil.

¹²Te c'alal parte awac'ojix a te jun ta slajunebal ta spisil te sit ats'unub-awawal ta yoxebal ha'bil, ha te ha'bil yu'un ya yich' aq'uel te jun ta slajunebal, ha nix hich ya me awa'be te levita, jyanlum, me'ba' alal soc te me'ba' ants, scuenta yu'un ya swe'ic ta tut pueblohetic awu'un soc hich ya xnoj sch'uhtic a.

¹³Hich me xawal ta stojol te Jehová te Dios awu'un: La jloq'uesix tal ta jna te bin ch'ultesbil soc la jca'beyix ta stojol te levita, jyanlum, me'ba' alal soc te me'ba' ants, hich te bin ut'il apasojon ta mandar; ma ba la jc'axuntay te mandariletic awu'un soc ma ba ch'ayem ta co'tan.

¹⁴Mayuc jwe'oj te bin ch'ultesbil te c'alal yacon ta mel-o'tan yu'un a te mach'a cham, mayuc jwe'oj te c'alal ma lecuquix jc'oblal, soc mayuc ca'beyej smahtanin te mach'atic chamenique. La jch'uhumbe sc'op te Jehová te Dios cu'un, jpasojix spisil te bintic apasojon ta mandar.

¹⁵Ila tal awil c'alal ta ch'ul na awu'un, c'alal ta ch'ulchan, a'beya bendición te pueblo Israel awu'un soc te q'uinal la awa'botcotic, hich te bin ut'il jc'axel la awalbe ta jamal te jme'jtatcotic, ha te q'uinal te banti ya x'oquin leche soc chab, xchihat.

¹⁶Te Jehová te Dios awu'un ya spasat ta mandar yo'tic te yac apas spisil te bintic chapal soc te bintic halbil ta mandar; tsahtaya aba te yac awac' c'ohtuc ta pasel ta spisil awo'tan soc ta spisil ach'uhlel.

¹⁷Yo'tic la awalix ta jamal te ha Dios awu'un te Jehová, te ya xbehenat ta behetic yu'un, te yac ach'uhun te mandariletic soc spisil te bin halbil ta mandar, soc te yac awa'iybe te sc'ope.

¹⁸Te Jehová la yalix ta jamal yo'tic te ha'at pueblohat yu'un, te ha mero yu'unat stuquel, hich te bin ut'il la yalbatix ta jamal, scuenta yu'un yac ach'uhumbe spisil te mandariletic yu'une;

¹⁹scuenta yu'un c'ax hich muc' ac'oblal ya xc'oht a te bin ut'il te yantic nacionetic spasoj, yu'un ya xchicnaj yutsil ac'oblal, ya xpuhc lec ac'oblal soc ya x'ich'otat ta muc', soc te ch'ul pueblo ya xc'ohat yu'un te Jehová te Dios awu'un, hich te bin ut'il yaloj, xchi te Moisés.