Read Tzeltal Deuteronomio 27 Bible Online

Deuteronomio 27 - Tzeltal bible

Deuteronomio 27

¹Te Moisés soc te mamaletic yu'un Israel la spasic ta mandar te pueblo, hich la yalic: Ch'uhunahic spasel spisil te mandariletic te ya calbeyex yo'tic.

²Te bin c'ahc'alil ya sohlex bahel ta muc'ul-ha' Jordán ta q'uinal ya ya'bat te Jehová te Dios awu'un, ya me atehc'an niwac tonetic soc ya me abonic ta tan;

³ya me ats'ihbay tey a spisil te c'opetic yu'un te Ley ini, te c'alal sohlematix ochel tey ta q'uinal ya ya'bat te Jehová te Dios awu'un, ha te q'uinal banti ya x'oquin leche soc chab, hich te bin ut'il yalbeyejat te Jehová te Dios yu'un te ame'atatique.

⁴Te c'alal sohlematix bahel ta Jordán a, ya me atehc'anlan tey ta wits Ebal te tonetic la jcalbatix, ya me abon ta tan,

⁵soc tey yac apasbe scajtajib ta chiq'uel mahtanil a te Jehová te Dios awu'un, ha scajtajib pasbil ta tonetic; ma me xawaluy ta taq'uin a'tejibaletic te tonetique.

⁶Ya me apas te scajtajib ta chiq'uel mahtanil yu'un Jehová te Dios awu'un ta tonetic te ma ba walubilic, soc tey yac awa'be scohtol chic'bil mahtaniletic a te Jehová te Dios awu'une.

⁷Yac awac' milbil smahtan scuenta lamal q'uinal, tey ya xwe'at a soc tse'eluc me awo'tan ta stojol te Jehová te Dios awu'une.

⁸Soc buen jamal me xats'ihbay ta tonetic spisil te c'opetic yu'un te Ley ini, xchihic.

⁹Patil te Moisés soc te sacerdote-levitahetic hich la yalbeyic spisil Israel: Ch'abanic soc a'iya me awa'iyic, Israel, yo'tic pueblohatix yu'un Jehová te Dios awu'une.

¹⁰A'iya me awa'iy hiche te sc'op Jehová te Dios awu'un, ya me apas spisil te mandariletic soc te bintic chapal yu'un, te yo'tic yac jpasbelat ta mandar, xchihic.

¹¹Ta hich ora te Moisés la spas ta mandar te pueblo, hich la yalbe:

¹²Te c'alal sohlematix ta muc'ul-ha' Jordán a, ha'ic ini te ya stehc'an sbahic ta wits Gerizim scuenta c'ambeyel bendición ta stojol te pueblo: ha te Simeón, Leví, Judá, Isacar, José soc Benjamín.

¹³Soc ha'ic ini te ya stehc'an sbahic ta wits Ebal scuenta c'ambeyel chopol c'oblalil: ha te Rubén, Gad, Aser, Zabulón, Dan soc Neftalí.

¹⁴Tulan me ya xc'opojic te levitahetic te hich ya yalbeyic spisil winiquetic yu'un Israel:

¹⁵Chopol sc'oblal te mach'a ya spas te bin lop'taylambil, o loc'omba pasbil ta uhltesbil taq'uin, ha ya'tel te mach'a ya sna' spasel, te muquen ya stehc'an, ha ihlaybil yu'un Jehová, xchihic. Hichuc, xchihic me spisil te pueblo.

¹⁶Chopol sc'oblal te mach'a ya sjimbe sc'oblal te sme'stat, xchihic. Hichuc, xchihic me spisil te pueblo.

¹⁷Chopol sc'oblal te mach'a ya sjeltaybe yawil te mojon yu'un sq'uinal te spat-xuhc, xchihic. Hichuc, xchihic me spisil te pueblo.

¹⁸Chopol sc'oblal te mach'a ya showiytes ta be te ts'o'sit, xchihic. Hichuc, xchihic me spisil te pueblo.

¹⁹Chopol sc'oblal te mach'a ya sjimbe te bin stojil ay ta pasel ta stojol jyanlum, me'ba' alal o me'ba' ants, xchihic. Hichuc, xchihic me spisil te pueblo.

²⁰Chopol sc'oblal te mach'a ya xway soc yihnam stat, te bin ut'il la sbohlobtesbe sc'oblal te state, xchihic. Hichuc, xchihic me spisil te pueblo.

²¹Chopol sc'oblal te mach'a ya scuch sba soc biluc chambahlamil, xchihic. Hichuc, xchihic me spisil te pueblo.

²²Chopol sc'oblal te mach'a ya xway soc swix o yihts'in, teme ha yantsil-nich'an stat o ha yantsil-al snan, xchihic. Hichuc, xchihic me spisil te pueblo.

²³Chopol sc'oblal te mach'a ya xway soc snihalme'el, xchihic. Hichuc, xchihic me spisil te pueblo.

²⁴Chopol sc'oblal te mach'a ya smuquen mil te spat-xuhc, xchihic. Hichuc, xchihic me spisil te pueblo.

²⁵Chopol sc'oblal te mach'a ya yich' taq'uin yu'un smilel te mach'a mayuc smul, xchihic. Hichuc, xchihic me spisil te pueblo.

²⁶Chopol sc'oblal te mach'a ma ba ya sch'uhun spasel te mandariletic ini, xchihic. Hichuc, xchihic me spisil te pueblo.