Read Tzeltal Deuteronomio 28 Bible Online

Deuteronomio 28 - Tzeltal bible

Deuteronomio 28

¹Teme yac awa'iybe sc'op te Jehová te Dios awu'un soc teme jun awo'tan yac apasbe spisil te mandariletic yu'un te yac calbelat ta ora ini, ha nix hich te Jehová te Dios awu'un ya me yac' te toyol ya xc'ohat yu'un spisil te nacionetic ta bahlumilal.

²Ya me xhul ta atojol spisil te bendicionetic ini, ya me stahat teme yac awa'iybe sc'op te Jehová te Dios awu'une.

³Bayel me yutsil ac'oblal ta pueblo soc bayel me yutsil ac'oblal ta q'uinal.

⁴Bayel me yutsil sc'oblal awal-anich'nab, te sit ats'unub-awawal, te yalatac chambahlametic awu'un, te yalatac awacax, tuminchijetic soc tentsunetic awu'un.

⁵Bayel me yutsil sc'oblal te amoch soc te swots'ojibal harina awu'un.

⁶Bayel me awutsilal c'alal ya x'ochat tal soc bayel me awutsilal c'alal ya xloc'at bahel.

⁷Te Jehová ya me stsal te acontra te ya xhahch scontrahinat. Ta jch'ix nax be ya xloq'uic tal stahat, pero huc-ch'ix be ya xloq'uic bahel ta ahnel ta atojol.

⁸Te Jehová ya me sticon tal bendición ta stojol te snahul sit ats'unub-awawal soc ta stojol spisil te bintic yac apas; ya ya'bat bendición tey ta q'uinal ya ya'bat te Jehová te Dios awu'une.

⁹Te Jehová ya me yac' te ha ch'ul pueblo ya xc'ohat yu'un, hich te bin ut'il jc'axel yalbeyejat ta jamal, teme yac ach'uhun te mandariletic yu'un Jehová te Dios awu'un soc te yac at'umbe te behetic yu'une.

¹⁰Spisil te nacionetic ta bahlumilal ya me yilic te awich'ojbe sbihil te Jehová, soc ya me xi'at.

¹¹Te Jehová ya me yac' te c'ax bayel bin ay awu'un, ha te awal-anich'nab, te yalatac chamblahlametic awu'un, soc te sit ats'unub-awawal tey ta q'uinal te jc'axel la yal ta jamal te Jehová ta stojol ame'atat te ya ya'bate.

¹²Te Jehová ya sjambat te yawil lequil c'ulejalil yu'un, ha te ch'ulchan, scuenta yu'un ya yac' tal ha'al ta aq'uinal ta yorahil, soc yu'un ya ya'be bendición spisil te a'tel yac apas. Yac awa'be smajan abiluc bayel nacionetic, pero te ha'ate mayuc bin yac amajambe stuquel.

¹³Te Jehová ya me yac'at ta jolal, ma ba c'ax peq'uel ya yac'at; ha'at toyol ya xc'ohat yu'un te yantic, ma ba peq'uel ya xc'ohat yu'unic, teme yac ach'uhumbe te mandariletic yu'un te Jehová te Dios awu'un, te yac jpasbelat ta mandar ta ora ini, yu'un yac ach'uhun spasel,

¹⁴soc teme ma ba yac awihquitay spasel ta wa'el o ta q'uexam spisil te bin yac jpasbelat ta mandar ta ora ini, yu'un yac at'un bahel yantic diosetic soc yac awac' aba ta a'batinel yu'unique.

¹⁵Pero teme ma ba yac awa'iybe sc'op te Jehová te Dios awu'un, teme ma ba yac ac'ohtes ta pasel spisil te mandariletic soc te bintic chapal yu'un te yac calbelat ta ora ini, ya me xtal ta atojol soc ya me stahat spisil te chopol c'oblaliletic ini:

¹⁶Chopol ac'oblal ya xc'ohat ta pueblo soc chopol ac'oblal ya xc'ohat ta q'uinal.

¹⁷Chopol sc'oblal amoch soc te swots'ojibal harina awu'un.

¹⁸Chopol sc'oblal awal-anich'nab, te sit ats'unub-awawal, te yalatac wacaxetic, tuminchijetic soc tentsunetic awu'un.

¹⁹Chopol ac'oblal c'alal ya x'ochat tal soc chopol ac'oblal c'alal ya loc'at bahel.

²⁰Te Jehová ya me sticon tal te chopol c'oblalil ta atojol, ma xana' bin yac apas, soc ay awocol yu'un spisil bintic yac apas, ha to c'alal jc'axel yac awich' lajinel soc te ora nax ya xch'ayat bahel ta scaj te schopolil awa'tel te la awihquitayon yu'une.

²¹Te Jehová ya me sticombat tal jmilawal-chamel ta atojol ha to c'alal ya slajinat tey ta q'uinal te banti ya x'ochat yu'un yac awu'untay.

²²Te Jehová ya me sticombat tal sac-obal, c'ahc', siht'el, sc'uxul c'ahc'al, taquin q'uinal, wocol te repente nax ya xtal, soc stotol ats'unub-awawal; ya me snutsat ha to c'alal ya xch'ayat bahel.

²³Te ch'ulchan ay ta yahc'olal ajol ha bronce ya xc'oht, soc te lum ay ta ye'tal awoc ha hierro ya xc'oht.

²⁴Te Jehová ya me yac' cohel tal ts'ubil lum soc hi' scuenta sjelol ha'al ta aq'uinal; ya me xco tal ta ch'ulchan ha to c'alal ya xch'ayat bahel.

²⁵Te Jehová ya me yac' te ya stsalat te acontra; ta ch'ix nax be ya xloc'at bahel ta ya'beyel guerra, ta huc-ch'ix be ya me x'ahnat bahel ta stojolic; xiweltic aba ya xc'ohat ta stojol spisil te nacionetic ta bahlumilal.

²⁶Te achamen baq'uetalic ya me xtuhun yu'un swe'elic spisil te mutetic ta ye'tal ch'ulchan soc te ti'awal chambahlametic ta q'uinal, mayuc mach'a ya stijticlan bahel.

²⁷Te Jehová ya me ya'bat te c'ahc'al chin yu'un Egipto, soc chacaletic, sal soc bayel sac'al te ma xhu' ya xlecubat yu'une.

²⁸Te Jehová ya me yac' sohcuc ajol, ya xmahc asit soc sonso ya xbahat;

²⁹soc xmaxlajan ya xbehenat ta ohlil c'ahc'al hich te bin ut'il ts'o'sit ta yihc'al q'uinal, soc ma ba lec ya xc'oht te bintic yac apas; spisil ora ayat ta uts'inel soc ya x'elc'anot abiluc, mayuc mach'a ya scoltayat.

³⁰Yac achap te ya xnuhpunat, pero yan winic ya xway soc te ach'ixe. Yac apas ana, pero ma ba yac anahin. Yac ats'un ats'usubil, pero ma ba yac atuhumbe te site.

³¹Ya yich' milel ta atojol te toro awu'un, pero ha'at ma ba yac awe'. Ya xpojbotat aburro ta atojol, ma ba ya sutbotatix. Te tuminchijetic awu'un ya yic'bat te acontra, pero mayuc mach'a ya scoltayat ta spojel talel.

³²Te aquerem-nich'nab soc te awantsil-nich'nab ya x'ac'otic ta sc'ab jyanlumetic, yac awil ta asit soc ya xlaj awip yu'un mel-o'tan ta stojolic ta spisil ora, pero mayuc bin ya xhu' awu'un spasel.

³³Te sit ats'unub-awawal ta aq'uinal soc spisil te bintic yac ata ta scuenta awa'tel, ha ya swe'ic te mach'atic ma xana'be sba; ayat ta uts'inel soc jimbil ya xc'ohat spisil ora.

³⁴Jsohquejolat ya xc'ohat yu'un te bin yac awil ta asit.

³⁵Te Jehová ya me yac' c'axuc awocol ta scuenta c'ahc'al chin ta sjol awacan soc ta sbaq'uetal awa', c'alal ta stahn awoc c'alal ta ajol, ma me xlecubat ta poxtayel.

³⁶Te Jehová ya me yic'at bahel soc te ajwalil awac'oj scuentahinat ta jun nación te ma xana'be sba, ni ha'uc la sna'be sba te ame'atat; tey yac awac' aba ta a'batinel yu'un yantic diosetic te pasticlambilic ta te' soc ta ton.

³⁷Xiweltic aba ya x'ilotat soc tsahbil-c'op soc labanel ya yalic ta acuenta ta spisil te pueblohetic banti ya yic'at bahel te Jehová.

³⁸Yac ats'un bayel awawal ta aq'uinal, pero jteb nax yac atsob, como ya xlajinot yu'un c'ulub.

³⁹Yac ats'un ats'usubil soc yac achahpan, pero ma ba yac awuch' vino, ma ba yac atulbe sit, como ya xwe'ot yu'un bic'tal chanetic.

⁴⁰Aunque ay olivohetic awu'un ta spahmal aq'uinal, ma ba yac ajax aba ta aceite yu'un, como ya xluhbaj cohel te site.

⁴¹Aunque ay ach'ix-queremetic awu'un, ma awu'unuc ya xc'oht, como ya x'ic'ot bahel ta chuquel.

⁴²Spisil te te'etic awu'un soc te sit ats'unub-awawal te ya xloc' tey ta aq'uinal, ya xlaj ta c'ulub.

⁴³Te jyanlum ay ta awohlil, behbe tohyel xan awu'un, yan te ha'ate behbe pehc'ajelat.

⁴⁴Ay bin ya ya'bat amajan, yan te ha'ate mayuc bin yac awa'be smajan stuquel; ha jolal ya xc'oht, ha'at c'ax peq'uel ya xc'ohat.

⁴⁵Spisil te chopol c'oblaliletic ini ya me xtal ta atojol, ya me snutsat soc ya me stahat ha to teme ya xch'ayat bahel, ta scaj te ma ba la awa'iybe sc'op te Jehová te Dios awu'un, ma ba la ach'uhun spasel spisil te mandariletic te la yalbat ta mandar.

⁴⁶Ha seña soc te bin jchahp ta ilel ya xc'ohtic ta atojol soc ta stojol te ats'umbal ta spisil ora.

⁴⁷Te bin ut'il ma ba la awac' aba ta a'batinel soc yutsil awo'tan ta stojol Jehová te Dios awu'un te c'alal bayel bintic ay awu'un,

⁴⁸ha yu'un ya me awac' aba ta a'batinel yu'un acontra te ya sticon tal ta atojol te Jehová, ha yac apas soc awi'nal, taquinti'il, mayuc ac'u' apac' soc mayuc bin ay awu'un a. Ha ya ya'bat ta anuc' jun yugo pasbil ta taq'uin, ha to c'alal jc'axel ya slajinat.

⁴⁹Te Jehová ya me yic' tal scontrahinat jun nación te namal ay, te ay ta sti'il te q'uinal, te ya xwihl tal hich te bin ut'il jxic, jun nación te ma xana'be sc'op;

⁵⁰ha ants-winiquetic te xiweltic sba yelawic, te mayuc sc'oblal ta yo'tanic me'el mamaletic soc ma sna'beyic yo'bolil sba alaletic.

⁵¹Ya me swe'bat te yalatac achanabahlam soc te sit ats'unub-awawal ta aq'uinal, ha to c'alal ya xch'ayat bahel. Ma ba ya yihquitaybat hilel trigo o vino, aceite, o te yalatac wacaxetic, tuminchijetic o tentsunetic awu'un, ha to c'alal ya slajinat.

⁵²Ya me sjoytaylan ta ya'beyel guerra spisil te pueblohetic awu'un ha to c'alal ya xhemts'uj cohel ta spisil aq'uinal te ts'ahquetic te ha toyol soc te ay yipic, te ha smuc'ulinej awo'tan. Ya sjoytaylan ta ya'beyel guerra spisil te pueblohetic ayic ta aq'uinal te la ya'bat Jehová te Dios awu'une.

⁵³Ya me awe'be sbaq'uetal te ach'ix-queremetic awu'un te la ya'bat Jehová te Dios awu'un, te c'alal joytaybilat soc te ay awocol yu'un a te acontrahe.

⁵⁴Te winic te ay ta awohlil te mero lec yo'tan soc te buen lec ay ta q'uinal, ya me xbohlob ta sit te yermano, te yihnam te bayel c'ux ta yo'tan, soc te snich'nab ay to hilem,

⁵⁵ma xya'be swe'be sbaq'uetal snich'nab te yac swe'bel, scaj te mayuquix bin ay yu'un ta yorahil te joytaybil ta ya'beyel guerra soc ta scaj te tulan wocol ya ya'bat acontra ta spisil te pueblohetic awu'une.

⁵⁶Te ants te ay ta awohlil te mero lec yo'tan soc te lec ay ta q'uinal, te hich slequil ay te ma sc'an ya stec' lum ta yoc te mayuc step, ya me xbohlob ta sit te smamalal te bayel c'ux ta yo'tan soc te squerem-al soc yantsil-al;

⁵⁷te sme'alal ya xloc' tal ta yohlil te yacan soc te alaletic ya yalatay, ya swe' ta muquen, ta scaj te mayuc bin ay yu'un ta yorahil te joytaybil ta ya'beyel guerra soc ta scaj te tulan wocol ya ya'bat te acontra ta pueblohetic awu'une.

⁵⁸Teme ma ba yac apas spisil te c'opetic ya yal ta Ley te ts'ihbabil hilel ta hun ini, teme ma ba yac awich' ta muc' te bihilil te ay yutsilal soc te xiweltic sba yu'un te Jehová te Dios awu'une,

⁵⁹te Jehová jc'axel ya stohytesbat awocol soc swocol te ats'umbal, ha tulan wocol te ma xch'ay soc tulan chamel te ya xhalaj;

⁶⁰ya me yac' tal ta atojol spisil te tulan wocol te chicnaj ta Egipto, te la ya'bat axiwel soc te ma ba ya yihquitayat.

⁶¹Soc xan te Jehová ya me sticombat tal spisil chameletic soc spisil wocol te ma ba ts'ihbabil ta hun yu'un te Ley ini, ha to c'alal ya xlajat yu'un.

⁶²Aunque sc'oblal hich yipal ya xc'ohex te bin ut'il eq'uetic ta ch'ulchan, mayuc tsobol ya xhilex, ta scaj te ma ba la ach'uhumbe sc'op te Jehová te Dios awu'une.

⁶³Hich te bin ut'il tse'el yo'tan Jehová te la ya'beyex awutsilalic soc te la yac' p'ohluquex, ha nix hich tse'el yo'tan ya sjinex soc ya slajinex; yac awich'ic bulel loq'uel tey ta q'uinal banti ya x'och awu'untayic.

⁶⁴Te Jehová ya spucat bahel ta stojol spisil nacionetic, ta jun sti'il c'alal ta yan sti'il te q'uinale. Tey ya xc'oht awac' aba ta a'batinel a yu'un yantic diosetic te pasbilic ta te' soc ta ton, te ni ha'ucat soc ni ha'uc te ame'atat la sna'beyic sba.

⁶⁵Ta yohlil te nacionetic ma ba yac acux awo'tan, soc ma ba ya scux yo'tan te stahn awoc. Te Jehová tey ya ya'bat xiwel ta awo'tan, ya xlaj yip asit soc yac amel awo'tan a.

⁶⁶Quechelat ta lajel yac awa'iy, ya xiwat ta c'ahc'alel soc ta ahc'abal, soc ma xana' teme ya to xcuxajat bahele.

⁶⁷Ta sacubel q'uinal hich yac awal: ¡Ay, yacuc ni laj x'ihc'ubix q'uinal! xchihat; ta tibiltic hich yac awal: ¡Ay, yacuc ni laj sacubix q'uinal! xchihat, ta scaj te xiwel ya ya'iy te awo'tan soc te bin ya yil te asite.

⁶⁸Te Jehová ya me yac' suhtat bahel ta barcohetic ta Egipto, tey nix ta be te hich la yalbe sc'oblal: Ma jaymehl ya suhtat xan bahel tey a, te xchihe. Tey yac awac' abahic ta chonel ta stojol a te acontrahic scuenta mosohil winiquetic antsetic, pero mayuc mach'a ya smanex, xchi te Moisés.