Read Tzeltal Deuteronomio 29 Bible Online

Deuteronomio 29 - Tzeltal bible

Deuteronomio 29

¹Hich ay te bin ya yal te chapbil-c'op te Jehová la spas ta mandar Moisés te ya yich' chapel soc te snich'nab Israel ta sq'uinal Moab, ha yan te chapbil-c'op la spas ta stojolic ta wits Horeb.

²Hich te Moisés la stsob tal spisil te snich'nab Israel, hich la yalbe: Ha'ex la awilic spisil te bintic la spas Jehová ta atojolic ta Egipto ta stojol te faraón soc spisil te a'batetic yu'un, soc ta spisil sq'uinal,

³ha te muc'ul pruebahetic, señahiletic soc jchahp a'teliletic te la yil asitic.

⁴Pero c'alal ora yo'tic te Jehová ma ba ya'beyejex sp'ijil awo'tanic ta sna'el, o asitic ta yilel, o achiquinic ta ya'iyel.

⁵Ayix cha'winic (40) ha'bil te quic'ojex ta behel ta jochol taquin q'uinal; ma ba lajem ac'u' apaq'uic soc ma ba lajem atepic.

⁶Ma ba awe'ojic pan soc ma ba awuch'ojic vino o bin pajuben, scuenta yu'un yac ana'ic te ho'on Jehovahon te Dioson awu'unique.

⁷Te c'alal hulex tal li' ta lugar ini, loc' ya'botic guerra te Sehón ajwalil yu'un Hesbón, soc Og te ajwalil yu'un Basán, pero la jtsaltic,

⁸la jquich'betic sq'uinalic, la jca'betic yich'ic te Rubén, Gad soc te j'ohlil sts'umbal Manasés.

⁹Ha yu'un q'ueja ta awo'tanic te bin ya yal te chapbil-c'op ini, soc ac'a c'ohtuc ta pasel awu'unic, scuenta yu'un lec ya xc'ohex a soc spisil te bintic yac apasique.

¹⁰Ha'ex apisilic atsoboj abahic yo'tic ta stojol Jehová te Dios awu'unic: ha te jtsobawetic yu'un te jujuchahp awu'unic, te mamaletic, jcuentahinwanejetic soc spisil te winiquetic yu'un Israel,

¹¹te alaletic soc antsetic awu'unic, soc te jyanlumetic te nahinemic ta yohlil acampamento, soc nix te jle-si'etic soc te jcuch-ha'etic awu'unic,

¹²yu'un ya x'ochat a tey ta chapbil-c'op yu'un Jehová te Dios awu'un te ya schap soc ha'at ta scuenta yalel ta jamal,

¹³yu'un ya yac' ta na'el yo'tic te ha'at pueblohat yu'un soc te ha Dios awu'un ya xc'oht, hich te bin ut'il la yalbat soc hich te bin ut'il jc'axel la yalbe ta jamal te atatic Abraham, Isaac soc Jacob.

¹⁴Ma ha'uquex nax te ya jchahp ta atojolic te c'op ini soc te bin jc'axel ay ta halel ta jamal ini,

¹⁵ha ya jchahp soc te mach'atic li' sjoquinejotic ta stojol te Jehová te Dios cu'untic soc te mach'atic ma ba li' sjoquinejotic ta ora ini.

¹⁶Como ana'ojic bin ut'il nahinotic ta sq'uinal Egipto soc bin ut'il sohlotic tal ta yohlil te nacionetic;

¹⁷soc awilojic te bintic ilobtic sba yu'unic soc te loc'ombahetic yu'unic te spasticlambil ta te' soc ta ton, ta plata soc ta oro, te ayic ta yohlilique.

¹⁸Ma me ayuc ta awohlilic winic o ants, jchahp na, o jchahp ts'umbalil, te hich ay yo'tan te ya yihquitay te Jehová te Dios cu'untic, yu'un ya yac' sba ta a'batinel yu'un te lotil diosetic yu'un te nacionetic ini; ma me ayuc ta awohlilic te hich c'ohem te bin ut'il slohp' te ya yac' te bin ch'a te ya xmilawan,

¹⁹te c'alal ya'iyejix a te bin ya yal te chopol c'oblalil ini, ha nix ya ya'be sba smuc'ul yo'tan, te hich ya yal: Ya me ca'iy lamal q'uinal, aunque ya jt'un bahel te co'tan te tulan ay, teme xchihe, ha ya xjihn spisilic ta scuenta.

²⁰Te Jehová ma ba ya spasbe perdón, ya me xtihl yilimba Jehová soc xut'et yo'tan ta stojol, ya xc'oht ta stojol spisil te bintic chopol halbilix sc'oblal ta hun ini, soc te Jehová ya me stup'be sbihil ta ye'tal ch'ulchan.

²¹Te Jehová ya me sloq'ues ta yohlil spisil ta chahp sts'umbal Israel yu'un ya ya'be swocol, hich te bin ut'il ya yal spisil te chopol c'oblaliletic ta chapbil-c'op te ts'ihbabil ta hun yu'un te Ley ini.

²²Te jaycaj xan awal-anich'nab te ya xchicnaj ta patil, soc te jyanlum te ya xtal ta namal q'uinal, ya me yilic te bintic wocol c'oht ta q'uinal soc te chameletic te a'bot yu'un te Jehová.

²³Spisil te q'uinal ha azufre soc ats'am, c'ahq'uem spisil te lum, mayuc bin ya yich' ts'unel soc mayuc bin ya sitin, ni junuc ha'mal ya xch'ihy tey a, hich te bin ut'il c'oht ta pasel c'alal laj te Sodoma, Gomorra, Adma soc Zeboim, te la slajinlan te Jehová ta scuenta sc'ahc'al yo'tan soc yilimba.

²⁴Spisil te nacionetic hich me ya yalic: ¿Bin yu'un te hich pasbot yu'un Jehová te q'uinal ini? ¿Bin scuentahil te tihl hahchel te tulan ilimba ini? xchihic.

²⁵Hich me ya sjaq'uic: Yu'un la yihquitayic hilel te chapbil-c'op yu'un Jehová te Dios yu'un te sme'static, ha te c'op la schap soc c'alal la sloq'ues tal ta sq'uinal Egipto;

²⁶baht yac' sbahic ta a'batinel yu'un yantic diosetic, la squejan sbahic ta stojol diosetic te ma ba la sna'beyic sba soc te mayuc bin a'botic yu'unic.

²⁷Ha yu'un ilin te Jehová ta stojol te q'uinal ini, la yac' taluc ta stojol spisil te bintic chopol c'oblalil ts'ihbabil ta hun ini.

²⁸Te Jehová, la sbul loq'uel ta sq'uinalic ta scuenta yilimba, sc'ahc'al yo'tan soc smuc'ul yilimba; la sch'ojticlan bahel ta yan q'uinal, hich te bin ut'il ay ta ora ini, xchihic sc'oblalic.

²⁹Te bintic muquen ay, ha ay ta scuenta stuquel te Jehová te Dios cu'untic; yan te bintic ac'ot ta na'el, ha cu'untic soc cal-jnich'antic spisil ora, scuenta yu'un ya jpastic spisil te bintic ya yal te mandariletic ini.