Read Tzeltal Deuteronomio 30 Bible Online

Deuteronomio 30 - Tzeltal bible

Deuteronomio 30

¹Te c'alal c'ohemix ta atojol spisil ini, ha te bendición soc te chopol c'oblalil te la jca'batix atsa, teme yac ana'ulan xan tey ta nacionetic te banti la sch'ojat bahel te Jehová te Dios awu'un,

²teme ya suhtat ta stojol te Jehová te Dios awu'un, soc teme ha'at soc awal-anich'nab, ta spisil awo'tan soc ta spisil ach'uhlel hich yac ach'uhumbe sc'op te bin ut'il spisil bintic yac jpasbelat ta mandar ta ora ini,

³hich te Jehová ya me yic' suhtel tal te mach'atic chucajtic bahel awu'un, ya sna'bat yo'bolil aba, ya scha'tsobat loq'uel tal ta yohlil te nacionetic ta banti la spucat bahel te Jehová te Dios awu'une.

⁴Te mach'atic ch'ojotic bahel, aunque ayic ta banti c'ax namal ta ye'tal ch'ulchan, tey ya stsobat xan tal a te Jehová te Dios awu'un, tey ya yic'at tal a.

⁵Te Jehová te Dios awu'un ya yac' te ya suhtat xan tal tey ta q'uinal la yich'ic hilel te ame'atatique, ha awu'un ya xc'oht. Lec bin ya spasbat, c'ax hich ya yac' p'ohlucat a te bin ut'il te ame'atatique.

⁶Te Jehová te Dios awu'un ya ya'bat circuncisión ta awo'tan soc ta yo'tanic te patil al-nich'aniletic awu'un, scuenta yu'un c'ux yac awa'iy ta awo'tan te Jehová te Dios awu'un ta spisil awo'tan soc ta spisil ach'uhlel, scuenta yu'un hich ya xcuxajat a.

⁷Te Jehová te Dios awu'un ya me yac' c'ohtuc ta stojol acontra spisil te chopol c'oblaliletic ini soc ta stojol te mach'atic la sp'ajat soc la ya'bat awocol.

⁸Te ha'at yac awa'iybe xan sc'op te Jehová soc yac apas spisil te mandariletic yac jpasbelat ta mandar ta ora ini.

⁹Hich te Jehová te Dios awu'un ya yac' te lec ya xc'oht spisil te bintic yac apas, te ya xp'ohl te awal-anich'nab, yalatac achanabahlam soc te sit ats'unub-awawal. Como te Jehová tse'el yo'tan yan buelta ta atojol yu'un ya spasbat te bin lec, hich te bin ut'il tse'el yo'tan ta stojol te ame'atatic,

¹⁰te c'alal yac ach'uhumbe sc'op te Jehová te Dios awu'un soc te yac ach'uhun spisil te mandariletic te ts'ihbabil ta hun ini; te c'alal ya suhtat ta stojol Jehová te Dios awu'un ta spisil awo'tan soc ta spisil ach'uhlel.

¹¹Como te mandaril ya ca'bat ta ora ini, ma ba c'ax chuhcul ta pasel awu'un soc ma ba namal ay.

¹²Ma ba ay ta ch'ulchan, te hich yac awal yu'un: ¿Mach'a ya xmo bahel ta ch'ulchan cu'untic scuenta yu'un ya yich'botic tal yu'un ya yalbotic ca'iytic scuenta yu'un ya jpastic? te xchihate.

¹³Soc ma ba ay ta jehch mar, te hich yac awal yu'un: ¿Mach'a ya sohl bahel cu'untic ta mar scuenta yu'un ya yich'botic tal yu'un ya yalbotic ca'iytic scuenta yu'un ya jpastic? te xchihate.

¹⁴Como mero nopol ta atojol te c'ope, ay ta awe soc ay ta awo'tan scuenta yu'un ya xhu' awu'un spasel.

¹⁵Ilawil, yo'tic la jca'bat atsa cuxlejal soc te bin lec, te lajel soc te bin chopol,

¹⁶yu'un ya jpasat ta mandar yo'tic te c'ux me xawa'iy ta awo'tan te Jehová te Dios awu'un, te yacuc xbehenat ta behetic yu'un, te yacuc ach'uhun spasel te mandariletic, te bin chapal yu'un soc te bin halbil ta mandar, scuenta yu'un ya xcuxajat soc ya xp'ohlat, hich te Jehová te Dios awu'un ya ya'bat bendición tey ta q'uinal banti ya x'ochat yu'un yac awu'untay.

¹⁷Yan teme q'uejel ya xbaht awo'tan soc ma ba yac ach'uhun, teme yac awac' aba ta howiytesel, teme yac aquejan aba ta stojol yantic diosetic soc yac awac' aba ta a'batinel yu'unic,

¹⁸ya calbeyex ta jamal yo'tic te ya me xlajex; ma ba ya xhalajex bayel c'ahc'al tey ta q'uinal te banti ya sohlex bahel ta muc'ul-ha' Jordán yu'un yac awu'untay.

¹⁹Yo'tic ya cac' ta testigo ta atojolic te ch'ulchan soc te bahlumilal te la jca'beyex atsahic te cuxlejal soc te lajel, te bendición soc te chopol c'oblalil. Tsaha hiche te cuxlejal, scuenta yu'un ya xcuxajat soc te patil al-nich'aniletic awu'un,

²⁰te c'ux yac awa'iy ta awo'tan te Jehová te Dios awu'un, te yac awich'be ta muc' sc'op soc te yac at'un bahel, como ha cuxlejal awu'un te Jehová soc ya yac' te hal c'ahc'al ya xcuxajat, scuenta yu'un ya xnahinat tey ta q'uinal te jc'axel la yal ta jamal te Jehová ta stojol te atatic Abraham, Isaac soc Jacob te ya ya'be, xchi te Moisés.