Read Tzeltal Deuteronomio 31 Bible Online

Deuteronomio 31 - Tzeltal bible

Deuteronomio 31

¹Te Moisés la sc'opon spisil Israel,

²hich la yalbe: Ayix wacwinic (120) ca'bilal, ma xhu'ix cu'un te ya xloc'on bahel soc te ya x'ochon talel. Soc hich la yalbonix te Jehová: Ma ba ya sohlat bahel ta muc'ul-ha' Jordán ini, xchi.

³Te Jehová te Dios awu'un ha me ya xnahilij bahel awu'un; ha ya slajinlan ta atojol te nacionetic ini, ya me awich'be te sq'uinalique. Ha ya xnahilij ta atojol te Josué, hich te bin ut'il la yalix te Jehová.

⁴Te Jehová hich nix ya spasbe te nacionetic te bin ut'il la spasticlambe te Sehón soc te Og, te ajwaliletic yu'un te amorreohetic, te la slajinlan soc te sq'uinalique.

⁵Te Jehová ya me yac' ta ac'abic te nacionetic, ya me apasbeyic spisil te bintic la jcalbeyex.

⁶Ac'a me fuersa soc ayuc me yip awo'tanic, ma me xiwex, ma me xnihc awo'tanic ta stojolic, como ha te Jehová te Dios awu'un te ya sjoquinat bahel; ma ba ya yihquitayat soc ma ba spihtesat, xchi te Moisés.

⁷Patil te Moisés la yic' tal te Josué, hich la yalbe ta stojol spisil Israel: Ac'a me fuersa soc ayuc me yip awo'tan, como ha'at ya x'ochat soc te pueblo ini tey ta q'uinal te jc'axel la yalbe ta jamal te Jehová te ame'atatic te ya ya'beyic, ha'at me yac awa'be yich'ic te q'uinale.

⁸Te Jehová ya xnahilij bahel awu'un, ya sjoquinat, ma ba ya yihquitayat soc ma ba ya spihtesat; ma me xiwat soc ma me xpehc'aj awo'tan, xchi.

⁹Te Moisés la sts'ihbay te Ley ini soc la ya'be te sacerdotehetic, ha te snich'nab Leví, te la sq'uechic te scaxahul te chapbil-c'op yu'un Jehová, soc la ya'be spisil te mamaletic yu'un Israel.

¹⁰Hich la spasticlan ta mandar: Ta slajibal te huc-huqueb ha'bil, ha te ha'bil yu'un sch'ayel betiletic, ta yorahil Q'uin yu'un Yaxna,

¹¹te c'alal stsoboj sbahic a spisil Israel ta stojol Jehová te Dios awu'un tey ta lugar te ya stsa, ya me awilbe ya'iyic spisil Israel te Ley ini.

¹²Tsoba tal te pueblo, winiquetic, antsetic, alaletic soc jyanlumetic te ayic ta pueblohetic awu'un, scuenta yu'un ya ya'iyic soc ya snopic yich'el ta muc' te Jehová te Dios awu'unic, soc tsahtaybil yu'unic ya spasic spisil te bin ya yal te Ley ini.

¹³Soc te yal-snich'nabic te ma ba ya'iybeyejic sc'oblal, ya me ya'iyic soc ya me snopic yich'el ta muc' te Jehová te Dios awu'unic te jayeb c'ahc'al ya xcuxajex tey ta q'uinal te banti ya sohlex bahel ta Jordán yu'un yac awu'untayic, xchi.

¹⁴Te Jehová hich la yalbe te Moisés: Ilawil, nopolix yorahil te ya xchamat. Ic'a tal te Josué, mahliyahic ta Nahilpac' Templo yu'un tahojibal scuenta yu'un ya ca'be yich' ya'tel, xchi. Hich te Moisés soc Josué baht smahliyic ta Nahilpac' Templo yu'un tahojibal.

¹⁵Te Jehová chicnaj ta bahlal tocal ta Nahilpac' Templo. Te bahlal tocal c'oht ta sba te yochibal te Nahilpac' Templo.

¹⁶Te Jehová hich la yalbe te Moisés: Ilawil, ya xchamatix.[12] Te pueblo ini ya me xhahch yac' sbahic ta antsinel c'ohem ta stojol te yantic diosetic yu'un te q'uinal te banti ya xbahtic. Ya me yihquitayon soc ya me sjin te chapbil-c'op jpasoj soc.

¹⁷Ha yorahil a te ya xtihl hahchel sc'ahc'al co'tan ta stojolic; ya me jch'ayic ta co'tan, ya jnac' jsit ta stojolic, hich me ya xlajic. Ya me xtal bayel swocolic soc mel-o'tan ta stojolic, ha me yorahil a te hich ya yalic: ¿Ma bal ha'uc yacon ta wocol yu'un te ma ba sjoquinejonix te Dios cu'un? xchihic.

¹⁸Pero ta smelelil ho'on ya jnac' jsit ta stojolic ta hich ora ta scaj spisil te bin chopol ya spasic, ha te suhtic xan ta stojol yantic diosetic.

¹⁹Ha yu'un ts'ihbaya te c'ayoj ini soc a'beya snopic te snich'nab Israel, a'beya sc'ayotayic scuenta yu'un ha ya xtuhun cu'un ta scuenta testigo ta stojolic.

²⁰Como te c'alal ya cac' ochel tey ta q'uinal te jc'axel la jcalbe ta jamal te sme'static, ha te q'uinal te banti ya x'oquin leche soc chab, ya me xwe'ic, ya xnoj sch'uhtic yu'un soc ya xjuhp'ic, ya suhtic xan ta stojol yantic diosetic soc ya me yac' sbahic ta a'batinel ta stojolic, ya me yilintayonic soc ya me sjinic te chapbil-c'op cu'une.

²¹Te c'alal ya xtal bayel swocolic soc mel-o'tan, hich te c'ayoj ya me sjac' ta scuenta testigo ta stojolic, como ya me xtal ta yo'tanic te sts'umbalique. Como nahil jna'ojix te bin ya snop ta yo'tanic, te c'alal ma to ba cac'oj ochel a tey ta q'uinal te jc'axel la jcalbe ta jamal ya ca'beyic, xchi.

²²Hich te Moisés ta yorahil nix la sts'ihbay te c'ayoj ini, soc la ya'be snopic te snich'nab Israel.

²³Patil te Jehová hich la spas ta mandar te Josué snich'an Nun: Ac'a me fuersa soc ayuc me yip awo'tan, como ha'at yac awic' ochel te snich'nab Israel tey ta q'uinal te jc'axel la jcalbeyic ta jamal te ya ca'beyique. Ho'on me ya joquinat, xchi sc'oblal.

²⁴Te c'alal laj yo'tan te Moisés ta ts'ihbayel ta hun spisil bin ya yal te Ley ini,

²⁵hich la spas ta mandar te levitahetic te sq'uechojic te scaxahul te chapbil-c'op yu'un Jehová:

²⁶Ich'ahic ha'i hun ini yu'un te Ley, ac'ahic ta xuhc te scaxahul te chapbil-c'op yu'un Jehová te Dios awu'unic, tey ya x'ayin a scuenta testigo ta atojolic.

²⁷Como ya jna'bat atoybahil soc te tulan yac awac' aba. Teme yac atoy abahic ta stojol Jehová te cuxulon to ta awohlilic, ¿ha'uc to balix a te c'alal chamenonix ahe?

²⁸Tsobahic tal spisil te mamaletic yu'un te jujuchahpex soc te jtsobawetic awu'unic yu'un ya calbe ya'iyic spisil te c'opetic ini, soc ya cac' ta testigo ta stojolic te ch'ulchan soc te bahlumilal.

²⁹Como jna'oj te c'alal chamenonix a, ya me abohlobtes abahic soc ya me awihquitayic te be te la jca'beyex at'unic, ya me xtal wocol ta atojolic ta patil ta scaj te yac apasic te bintic chopol ta sit te Jehová, yac ahachbeyic yilimba yu'un te bin yac apasic, xchi.

³⁰Ha yu'un te Moisés la yalbe ya'iyic spisil te pueblo Israel te bin ya yal ha'i c'ayoj ini, c'alal shahchibal c'alal slajibal: