Read Tzeltal Deuteronomio 32 Bible Online

Deuteronomio 32 - Tzeltal bible

Deuteronomio 32

¹A'iya awa'iy, ch'ulchan, ya xc'opojon; a'iya awa'iy, bahlumilal, te bintic ya cal.

²Te snopojibal cu'un ya me xt'uhlaj cohel hich te bin ut'il ha'al, te c'opetic cu'un ya me xco tal hich te bin ut'il ts'ujul, hich te bin ut'il c'unil ha'al te ya xco tal ta sba te ac, hich te bin ut'il ha' te xt'ulajan ya xc'oht ta sba te ha'male.

³Ya calbe sbihil te Jehová. ¡Halbeyahic sc'oblal smuc'ul te Dios cu'untic!

⁴Ha Muc'ul Ton stuquel, c'ax lec te ya'tel, como toj spisil te behetic yu'une. Ha Dios te stalel jun yo'tan soc mayuc schopolil; ha toj soc lec stuquel.

⁵Pero chopol bin la spasbeyic, ma ha'uquix yal-snich'nab ta scaj te bin chopol spasojic; ha jcaj ts'umbalil te ma ba toj soc chopol yo'tanic.[13]

⁶¿Hich bal yac atojic a te Jehová, jsohquejol pueblohex te mayuc sp'ijil awo'tanic? ¿Ma bal ha'uc atat te la spasat? Ha la spasat soc la yac' ayinucat.

⁷Na'a me te namey tal, ayuc me ta awo'tan te ha'biletic yu'un bayel ta jcaj ts'umbaliletic; joc'obeya atat, ha ya yalbat, joc'obeya te mamaletic awu'un, ha'ic ya ya'bat ana'.

⁸Te Mach'a Toyol, c'alal la ya'be sq'uinalic te nacionetic, c'alal la ya'be sjat sbahic te yal-snich'nab ants-winiquetic, la yac'ticlambe smojonil te pueblohetic, chican hich yipalic te snich'nab Israel.

⁹Como te bin ay yu'un Jehová, ha te pueblo yu'un, ha te Jacob, te ha yu'un c'oht.

¹⁰La sta ta jochol taquin q'uinal, ta mero taquin q'uinal te majbil ta tulan ic'. La sjoyobtay, la sp'ijubtes, hich la scanantay te bin ut'il sch'uhlel sit.

¹¹Hich te bin ut'il jxic te ya stij hahchel te spechech, te ya sjoyobtay ta wihlel ta yahc'olal te yalatac, hich la sjam xic', la scuch bahel, la yic'ticlan bahel ta sc'uc'umal.

¹²Te Jehová la stojobtes bahel stuquel, mayuc yan dios joquinot yu'un.

¹³La yac' mohuc bahel ta stoyolil q'uinal, la swe' te bintic sitin ta q'uinal, la ya'be yuch' chab te loc' ta tontiquil, soc aceite te loq'uem ta tulan tonetic;

¹⁴la ya'be swe' mantequilla yu'un wacaxetic soc leche yu'un me' tuminchijetic, te sjuhp'el jcolel tuminchijetic soc tat tuminchijetic yu'un Basán soc tat tentsunetic, buen lequil trigo, soc la awuch' vino te ha sch'ich'el te ts'usube.

¹⁵Pero juhp' te Jesurún,[14] soc pujawan ta teq'uel, (c'ax juhp'at, mero bayel ajuhp'el). Ha yu'un la sch'ay ta yo'tan te Dios te pasot yu'une; la yihlay te Muc'ul Ton te ya xcoltayot yu'un.

¹⁶La shachbeyic xut'et yo'tan ta scaj te yantic diosetic; la stijbeyic yilimba yu'un te bintic ilobtic sba.

¹⁷La ya'beyic milbil smahtan pucujetic, ma ha'uc te Diose, ha diosetic te ma ba sna'beyejic sba, ha diosetic te ach' to nax chicnaj, te ma ba ich'bilic ta muc' yu'un te ame'atatique.

¹⁸Ch'ay ta awo'tan te Muc'ul Ton te la spasat, ch'ay ta awo'tan te Dios te jpaswanej awu'une.

¹⁹La yil te Jehová, tihl hahchel yilimba, tijbot hahchel yilimba yu'un te ach'ix queremetic yu'une.

²⁰Hich la yal: Ya jnac' jsit ta stojolic, ya quil bin slajibal ya xc'ohtic; como ha jcaj ts'umbalil te mero chopol, ha al-nich'aniletic te ma junuc yo'tanic ta jtojol.

²¹La yaq'uic xut'etuc co'tan ta scaj te bin ma diosuc, la yaq'uic ilinuc co'tan ta scaj te loc'ombahetic yu'unique. Ha nix ya cac' xut'etuc yo'tanic ta scuenta mach'atic ma pueblohuc, ya cac' ilinuc yo'tanic ta scuenta jun nación te mayuc sp'ijil.

²²Como tihlix hahchel sc'ahc'al quilimba, ya me schic' c'alal ta sc'ubulil yawil mach'atic chamenic; ya slajin te q'uinal soc te bintic ya sitin tey a, ya yac'ticlambe sc'ahc'al te yich'o-ip te witsiltique.

²³Ya jbusambe ta sbahic te bintic chopol, ya jt'imbe bahel te ya'tejibal jt'ihmalte'.

²⁴Ya xlajic yu'un wi'nal, ya xlajinotic yu'un tulan c'ahc' soc jmilawal-chamel; soc ya jticon sbaquel ye jti'awal chambahlametic ta stojolic, soc veneno yu'un chanetic ayic ta q'uinal.

²⁵Ta fuera ya me xlajic ta espada, ta yutil nahnatic ya x'ayin xiwel; ya xlajic querem soc ach'ix, chu'alal soc mach'a saquix sjol.

²⁶La jcal te namal ya jpucticlan bahel, te ya jtup'be sna'ojibalic ta stojol ants-winiquetic;

²⁷pero ma ba la jc'an te labanel yu'un te contra, te yanuc ya xc'oht ta yo'tan te scontratac, te hichuc ya yalic: Ta scuenta quiptic la jpastic spisil ini; ma ha'uc la spas te Jehová, te xchihuquic.

²⁸Como te Israel ha jun nación te mayuc sp'ijil yo'tan, ma ba ya sna' q'uinal.

²⁹¡Te ayuc sp'ijilic, te yacuc xc'oht ta yo'tanic ini, te yacuc sna'ic banti ya xc'ohtic ta loq'uel!

³⁰¿Bin ut'il ya xhu' te jtuhl nax ya snuts bahel jmil ta tuhl, soc te cha'tuhl nax ya yac' ahnuc lajunmil, te manchuc chonotic yu'un te Muc'ul Ton, soc te ihquitayotic yu'un te Jehová?

³¹Como te muc'ul ton yu'unic ma pajaluc soc te Muc'ul Ton cu'untic, hich nix sna'oj te jcontrahetique.

³²Como ta sch'oxal Sodoma talem te sch'oxalic, soc ta sq'uinal Gomorra; te ts'usubetic yu'unic ya xmilawan, mero ch'a te jchejelchej yu'unic.

³³Ha svenenohil chanetic te vino yu'unic, mero jmilawal veneno yu'un ti'awal chanetic.

³⁴¿Ma bal q'uejbiluc cu'un ini, macal ta banti ay te jc'ulejale?

³⁵Ho'on ay ta jcuenta sutbeyel spacol soc te ya ca'be stoj; ya me sta yorahil te ya xbilts'uj yoc, como nopolix ya xhahch swocolic, ahnimal ya xtal te bin chapal ya yich'ique.

³⁶Te Jehová ya me schahpan te pueblo yu'un, soc ya me sna'be yo'bolil sbahic te a'batetic yu'un c'alal ya yil te lajix yipic, soc te mayuquix hilem a'bat o te mach'a libre aye.

³⁷Hich ya yal: ¿Banti ay te diosetic yu'unic, te muc'ul ton te banti la snac' sbahic,

³⁸te la swe'beyic sjuhp'el te milbil mahtaniletic yu'unic, soc te la yuch'beyic te vino yu'un te malbil mahtanil yu'unique? ¡Ac'a hahchuquic, ac'a scoltayex! ¡Ac'a tal scanantayex!

³⁹Ilawilic te ho'on jtuquel ayon, mayuc yan diosetic ta jtojol. Ho'on ya cac' lajel soc ho'on ya cac' cuxlejal; ho'on ya cac' ehchen soc ho'on ya jlamajtes; mayuc mach'a ya xhu' ya xcol loq'uel ta jc'ab.

⁴⁰Como ya jtoy mohel jc'ab ta ch'ulchan soc ya cal ta jamal: ¡Jtalel cuxulon sbahtel q'uinal!

⁴¹Te c'alal ya juxbe ye te espada cu'un te mero xlipet soc te ya xhahchon ta stojil chahpanwanej, ya me ca'be spacol te jcontra, soc ya ca'be stojic te mach'atic ya yihlayonique.

⁴²Ya jyacubtes ta ch'ich' te ya'tejibalul jt'ihmalte', ya slajin baq'uet te espada cu'un; ha te sch'ich'el mach'atic lajic soc te jchuqueletic, te sjolic te jtsobawetic yu'un jcontrahinwanejetic, xchi te Jehová.

⁴³¡Nacionetic, tse'eluc me awo'tanic soc te pueblo yu'un Dios, yu'un ha ya ya'be spacol te sch'ich'el te a'batetic yu'une, ya ya'be spacol te scontratac, soc ya spasbe te stojel mulil yu'un te sq'uinal te pueblo yu'une! xchi ta c'ayoj te Moisés.

⁴⁴Tal te Moisés, soc joquimbil yu'un Josué te snich'an Nun, la yalbe te pueblo spisil te bin ya yal te c'ayoj ini.

⁴⁵C'alal laj yo'tan te Moisés ta yalel spisil te c'opetic ini ta stojol spisil Israel,

⁴⁶hich la yalbe: Ac'a ta awo'tanic spisil te bin yac calbelex ta ora ini, scuenta yu'un yac apasic ta mandar te awal-anich'nabic te tsahtaybiluc me ya spasic spisil te bin ya yal te mandariletic ini.

⁴⁷Como ma ha'uc te bin mayuc sc'oblal awu'unic, ha me acuxlejalic; ha ta scuenta te mandariletic ini te bayel c'ahc'al ya xcuxajex tey ta q'uinal te ya sohlex bahel ta Jordán ta yu'untayel, xchi.

⁴⁸Ha nix ta yorahil a c'oponot yu'un Jehová te Moisés, hich halbot:

⁴⁹Mohan bahel li' ta wits Abarim, ha te wits Nebo te ay ta sq'uinal Moab, te snuhp'usitayej sba soc Jericó, ila awil te sq'uinal Canaán te ya ca'be yu'untay te snich'nab Israel.

⁵⁰Tey ya xchamat a ta wits te banti ya xmohat bahel, yac atsobix aba soc mach'atic ay awu'un, hich nix te bin ut'il cham te abanquil Aarón ta wits Hor, te baht stsob sba soc mach'atic ay yu'un.

⁵¹Ha ta scaj te achebalic ma junuc awo'tanic la awac' abahic ta jtojol ta stojol te snich'nab Israel, ta ha'etic ta Meriba-cades ta jochol taquin q'uinal Zin, ma ba la awich'onic ta muc' ta yohlil te snich'nab Israel.

⁵²Ha yu'un, namal nax yac awil te q'uinale, ma ba ya x'ochat bahel tey ta q'uinal te ya ca'be te snich'nab Israel, xchi sc'oblal.