Read Tzeltal Deuteronomio 33 Bible Online

Deuteronomio 33 - Tzeltal bible

Deuteronomio 33

¹Hich ay te bendición la yal Moisés, te winic yu'un Dios, ta stojol te snich'nab Israel te c'alal ma to xcham a.

²Hich la yal: Te Jehová tal ta Sinaí; c'alal ta Seir yac'oj tal sts'anabul; la sacubtes tal q'uinal c'alal ta wits Parán, hahchem tal soc tsobol ta mil mach'atic ch'uhltesbilic, ta swa'el-c'ab yich'oj tal te ley te ay sts'anabul.[15]

³C'ux ta yo'tan te pueblo yu'un; ay ta sc'ab spisil te mach'atic yac'oj sbahic ta stojol; la spahcan sbahic ta atojol, la yich'ic p'ijubtesel awu'un,

⁴te c'alal Moisés la ya'botic te Ley, te ha c'oht yu'un te pueblo yu'un Jacob.

⁵Ay ajwalil ta Jesurún te c'alal la stsob sbahic te jtsobawetic yu'un te pueblo, soc spisil te jchahp yu'un Israel.

⁶Ac'a cuxajuc te Rubén, ma me xcham, soc ma me jtebuc nax te winiquetic yu'une, xchi.

⁷Soc hich la yalbe sc'oblal Judá: A'iybeya, Jehová, te aw yu'un Judá; ic'a bahel ta pueblo yu'un. Ya scoltay sba ta scuenta sc'ab,[16] coltaya ta scontrahinel te scontratac, xchi.

⁸Hich la yalbe sc'oblal Leví: Te Tumim soc Urim awu'un, ha'ic yu'un te winic te jun yo'tan ta atojol,[17] ha te la apas ta prueba ta Masah, te mach'a la awut aba soc ta ha'etic yu'un Meriba;

⁹te mach'a hich la yalbe sc'oblal te sme'static: Jc'axel mayuc xquil, xchi. Ma ba la yich' ta cuenta te yermanotac, soc ma ba la sna'be sba te yal-snich'nab. Pero ha'ic la sch'uhunic spasel ac'op, ts'acal la spasic te chapbil-c'op awu'une.

¹⁰Ha'ic ya ya'be snopic ac'op te Jacob, soc ya ya'be snopic te Ley awu'un te Israel. Ya yaq'uic pom ta atojol soc scohtol chic'bil mahtanil ta scajtajib ta chiq'uel mahtanil awu'un.

¹¹A'beya bendición, Jehová, te bin ya spasic, soc tse'eluc me awo'tan yac awich'be ta cuenta te ya'tel sc'abic. C'ajbeya sch'ixpat te scontrahic, soc te mach'a ya yilintayic, scuenta yu'un jc'axel ma xhahchiquix, xchi.

¹²Hich la yalbe sc'oblal Benjamín: Te mach'a c'ux ta yo'tan Jehová jun me yo'tan ya xnahin ta stojol; spisil ora ya xluts'ot yu'un, ya me xnahin ta snehquel, xchi.

¹³Hich la yalbe sc'oblal José: Ac'a yich' bendición yu'un Jehová te sq'uinal, ac'a yich' te buen t'ujbil sts'ujulel ch'ulchan, soc te ha' ay ta sc'ubulil ta ye'tal,

¹⁴te tsahbil sit ts'unub-awalil yu'un c'ahc'al, soc te slequil sit ts'unub-awalil yu'un te u,

¹⁵te c'ax t'ujbil sit ts'unub-awalil yu'un te antiguo witsiltic, te bayel bin ya yac' te tsehltsehltic te sbahtel q'uinal ay,

¹⁶soc te c'ax lequil mahtaniletic yu'un te q'uinal soc spisil bintic ya yac', soc te yutsil yo'tan te mach'a nahinem ta jpeht ch'ix; ac'a taluc ta sjol te José, soc ta sti'ba te mach'a príncipe ta yohlil te yermanotaque.

¹⁷Te yutsilal ha pajal soc sba-nich'an toro, te xulubil yu'un pajal soc xulub ha'mal-toro. Ha ya scujticlan a te nacionetic c'alal ta sti'il te bahlumilal; hich ay te bayel ta lajlajunmil yu'un Efraín, hich ay te bayel ta mil yu'un Manasés, xchi.

¹⁸Hich la yalbe sc'oblal Zabulón: ¡Tse'eluc me awo'tan, Zabulón, te c'alal ya xloc'at bahel; ha nix hichat, Isacar, ta nahilpaq'uetic awu'un!

¹⁹Ya me yiq'uic tal nacionetic ta wits yu'unic, tey ya xc'oht yaq'uic milbil mahtaniletic te toj ayic; ya me smulanic te bin bayel ya yac' te maretic, soc te c'ulejalil nac'al ta hi'ileltic, xchi.

²⁰Hich la yalbe sc'oblal Gad: ¡Bayel me yutsil te mach'a ya yac' muc'ubuc sq'uinal te Gad! Te Gad pacal hich te bin ut'il muc'ul choj, tulan ya stuch' c'abal soc jolal.

²¹La sle te mero lequil q'uinal yu'un stuquel, yu'un tey q'uejbil te q'uinal yu'un te mach'a tulan ya'tel. Nahilij bahel te pueblo; ha la spas soc Israel te mandariletic soc te stojil bin yaloj ta mandar te Jehová, xchi.

²²Hich la yalbe sc'oblal Dan: Ha yal choj te Dan te ya xwihl tal c'alal ta Basán, xchi.

²³Hich la yalbe sc'oblal Neftalí: Te Neftalí ha nojel a te bintic lec yu'un Jehová, nojel ta bendición yu'un; ich'a te q'uinal ta stojol smahlib c'ahc'al soc ta stojol sur, xchi.

²⁴Hich la yalbe sc'oblal Aser: Te Aser c'ax hich yutsilal a te bin ut'il yantic querem al-nich'aniletic; lecuc me ta o'tanil yu'un yermanotac, soc ac'a yahts'es yoc ta aceite.

²⁵Ha hierro soc bronce ya xc'oht te smahquil apuerta, soc te jayeb c'ahc'al cuxulat hich me ay awip, xchi.

²⁶Mayuc mach'a pajal soc te Dios yu'un Jesurún, te cajal ta cawu ya xbehen tal ta ch'ulchan yu'un ya scoltayat, te ya xtal soc yutsilal ta sba tocal.

²⁷Ha ahnibal awu'un te Dios te sbahtel q'uinal ay, soc ta awe'tal ay te sc'ab te sbahtel q'uinal ay. Ha la sch'oj loq'uel ta atojol te contra, soc la yal: ¡Lajina! xchi.

²⁸Hich te Israel jun yo'tan ya xnahin, te sloq'uib ha' yu'un Jacob stuquel ya xnahin ta q'uinal banti ay trigo soc vino, te banti ya yac' cohuc tal ts'ujul te ch'ulchane.

²⁹¡Bayel me awutsil, ha'at Israel! ¿Mach'a pajalat soc, ha'at pueblohat te coltaybilat yu'un Jehová? Te Dios ha amahquil te ya xcoltaywan, ha espada te yac awa'iy tsalaw yu'un. Hich peq'uel ya xc'oht te acontratac, ha'at yac atec'be te toyol q'uinal yu'unic, xchi te Moisés.