Read Tzeltal Deuteronomio 34 Bible Online

Deuteronomio 34 - Tzeltal bible

Deuteronomio 34

¹Te Moisés loc' bahel ta spamlej yu'un Moab, mo bahel ta wits Nebo, ta sba wits Pisga, te snuhp'usitayej sba soc Jericó; tey a'bot yil yu'un Jehová spisil te sq'uinal Galaad c'alal ta Dan,

²spisil te sq'uinal Neftalí, Efraín soc Manasés, spisil te sq'uinal Judá c'alal ta mar ta smahlib c'ahc'al,[18]

³te Neguev, te spamlej yu'un Jericó, ha te pueblo yu'un xanetic, c'alal ta Zoar.

⁴Hich halbot yu'un te Jehová: Ha te q'uinal ini te jc'axel la jcalbe ta jamal te Abraham, Isaac soc Jacob: Ya ca'be ats'umbal, te xchihone. La jca'bat awil ta asit, pero ma ba ya x'ochat bahel tey a, xchi sc'oblal.

⁵Tey cham a ta sq'uinal Moab te Moisés te a'bat yu'un Jehová, hich te bin ut'il halbot yu'un te Jehová.

⁶La smuc ta jun spamlej ta sq'uinal Moab te snuhp'usitayej sba soc Bet-peor; mayuc mach'a ya sna' banti ay smuquenal c'alal ora.

⁷Wacwinic (120) ya'bilal a te cham te Moisés, ma ba jihn te sit soc ma ba laj te yipe.

⁸Te snich'nab Israel lajuneb scha'winic (30) c'ahc'al la yoq'uetayic te Moisés ta spamlej yu'un Moab. Hich ts'acay te jayeb c'ahc'al oq'uel soc mel-o'tan yu'un Moisés.

⁹Te Josué snich'an Nun nojel ta yo'tan p'ijil-o'tanil, como te Moisés la scajambe sc'ab ta sjol. Te snich'nab Israel la sch'uhumbeyic smandar, hich la spasic te bin ut'il pasot ta mandar yu'un Jehová te Moisés.

¹⁰Mayuc yan jalwanej yu'un Dios chicnaj ta Israel hich te bin ut'il Moisés, te mach'a na'bot sba yu'un Jehová ta sit nix;

¹¹mayuc mach'a la spajaltay te señahiletic soc jchahp a'teliletic te ticombil yu'un Jehová ta spasel ta sq'uinal Egipto, ta stojol faraón soc te a'batetic yu'un soc ta stojol spisil sq'uinal,

¹²soc te smuc'ul yip ya'tel soc te spasel te bin muq'uic sc'oblal soc xiweltic sba te la spasticlan Moisés ta stojol spisil Israel.