Read Tzeltal Deuteronomio 6 Bible Online

Deuteronomio 6 - Tzeltal bible

Deuteronomio 6

¹Hich ay spisil te mandariletic, te bintic chapal soc te bintic halbil ta mandar, te Jehová te Dios awu'unic la spason ta mandar te ya ca'beyex anopic, scuenta yu'un yac apasic tey ta q'uinal te ya x'och awu'untayic,

²scuenta yu'un yac awich'ic ta muc' te Jehová te Dios awu'unic, te yac apasic spisil bintic chapal soc te mandariletic te ya calbat, ha'at soc awal-anich'nab soc amamatac, te jayeb c'ahc'al ya xcuxajat, scuenta yu'un naht ya xc'oht aworahil a.

³A'iya me awa'iy hiche, Israel, soc tsahtayahic me ta pasel, scuenta yu'un lec ya xc'ohex tey ta q'uinal te banti ya x'oquin leche soc chab soc hich ya xp'ohlex a, hich te bin ut'il la yalbat te Jehová te Dios yu'un te ame'atatique.

⁴A'iya me awa'iy, Israel: te Jehová te Dios cu'untic, jtuhl nax te Jehová.

⁵C'ux me xawa'iy ta awo'tan te Jehová te Dios awu'un, ta spisil awo'tan, ta spisil ach'uhlel soc ta spisil awip.

⁶Ac'a ta awo'tan spisil te bintic la jcalbat awa'iy ta ora ini;

⁷soc ya me awalulambe ya'iyic te awal-anich'nab, soc ya me awalbe sc'oblal c'alal ayat ta ana, c'alal ya xbehenat ta be, c'alal ya x'ochat ta wayel soc te c'alal ya xhahchat.

⁸Ya me achuc ta ac'ab soc ta ati'ba scuenta seña;

⁹ya me ats'ihbay ta ste'el te ti'nahil soc ta sti'il ana.

¹⁰Te c'alal la yac'atix ochel te Jehová te Dios awu'un tey ta q'uinal te jc'axel la yalbe ta jamal te atatic Abraham, Isaac soc Jacob te ya ya'bat, te la yac'atix ochel ta buen t'ujbil muc'ul pueblohetic te ma ha'ucat la apas,

¹¹soc ta nahnatic te nojelic ta bintic buen lec te ma ha'ucat la anojes, soc pozohetic te ma ha'ucat la ajoc', ts'usubiletic soc olivohetic te ma ha'ucat la ats'un, te patil ya xwe' x'uch'at soc ya xnoj ach'uht yu'un,

¹²ma me xch'ay ta awo'tan te Jehová te la sloq'uesat tal ta sq'uinal Egipto te banti ayat ta mosohil.

¹³Ich'a ta muc' te Jehová te Dios awu'un, ha nax me xawac' aba ta a'batinel yu'un, soc ha nax ta scuenta sbihil te jc'axel ay bin yac awal ta jamal.

¹⁴Ma me xat'unic yantic diosetic, ha te diosetic yu'un te pueblohetic te nopol ayat soc,

¹⁵como te Jehová te Dios awu'un ay ta awohlil soc ha xut'et yo'tan; scuenta yu'un ma ba ya yilintayat a te Jehová te Dios awu'un, te jc'axel ya slajinat ta q'uinal.

¹⁶Ma me xapasic ta prueba te Jehová te Dios awu'unic, hich te bin ut'il la apasic ta Masah.

¹⁷Ch'uhunahic ta lec te mandariletic yu'un Jehová te Dios awu'unic, soc te testigo c'op soc te bintic chapal yu'un te la yalbeyex ta mandar.

¹⁸Ha me xapas te bin toj soc te bin lec ta stojol te Jehová, scuenta yu'un hich lec ya xc'ohat soc hich ya x'och awu'untay a te lequil q'uinal te Jehová la yalbe ta jamal te ya ya'be te ame'atatique;

¹⁹soc scuenta yu'un ya sten loq'uel acontrahic ta atojolic, hich te bin ut'il la yal te Jehová.

²⁰Teme patil ya sjoc'obat te anich'an: ¿Bin scuentahil te testigo c'op soc te bintic chapal soc te bintic halbil ta mandar te la spasex ta mandar te Jehová te Dios cu'untic? teme xchihe,

²¹hich me xawalbe te anich'an: Ta nahil to ayotic ta mosohil yu'un faraón, pero te Jehová la sloq'uesotic tal ta Egipto ta scuenta yu'el sc'ab.

²²Te Jehová la spas ta jsitic señahiletic soc jchahp a'teliletic te xiweltic sba ta Egipto, ta stojol faraón soc spisil mach'atic ay yu'un ta sna.

²³La sloq'uesotic tal tey a yu'un ya ya'botic te q'uinal te jc'axel la yalbe ta jamal te jme'jtatic te ya ya'beyique.

²⁴Te Jehová la spasotic ta mandar te yacuc jch'uhuntic spasel spisil bintic chapal yu'un soc te ya quich'tic ta muc' te Jehová te Dios cu'untic, scuenta yu'un hich lec ya xc'ohotic ta spisil ora, soc scuenta yu'un ya scanantaybotic jcuxlejaltic, hich te bin ut'il c'alal ora.

²⁵Ha stojil ta pasel cu'untic teme buen tsahtaybil cu'untic ya jpastic spisil te mandariletic ini ta stojol Jehová te Dios cu'untic, hich te bin ut'il la spasotic ta mandar, xchihan me.