Read Tzeltal Deuteronomio 7 Bible Online

Deuteronomio 7 - Tzeltal bible

Deuteronomio 7

¹Te c'alal la yic'atix ochel a te Jehová te Dios awu'un ta q'uinal te yac awu'untay, soc te c'alal la stenticlan loq'uel ta atojol tsobol nacionetic, ha te heteo, gergeseo, amorreo, cananeo, ferezeo, heveo soc te jebuseo, huqueb nacionetic te c'ax bayelic soc c'ax hich yipic a te bin ut'il ha'ate,

²soc te c'alal la ya'batix ta ac'ab te Jehová te Dios awu'un te nacionetic soc te la atsalix a, jc'axel me xajinticlan; ma me ayuc bin yac achap ac'op soc, ma me xana'be yo'bolil sbahic.

³Ma me xnuhpunat soc, ma me xawa'be yic'bat awantsil-nich'nab te squerem-nich'nabic soc ma me xawa'be yic'bat aquerem-nich'nab te yantsil-nich'nabic,

⁴como ya me yac' te ya yihquitayon hilel te aquerem-nich'an, te ya sch'uhuntay yantic diosetic. Hich ya xtihl hahchel yilimba ta atojolic te Jehová, jts'ihn nax me ya slajinex.

⁵Pero hich ya sc'an yac apasbeyic: ya me ajinticlambeyic te scajtajib ta chiq'uel mahtanil yu'unic, ya me awuyticlambeyic te yahcananic, ya me ats'eticlambeyic te sloc'ombahil Asera soc ya me achic'ticlambeyic ta c'ahc' te loc'ombahetic yu'unique.

⁶Como te ha'ate, ch'ul pueblohat yu'un Jehová te Dios awu'une. Ha la stsahat ta yohlil spisil te pueblohetic ta swohlol bahlumilal scuenta yu'un mero pueblohat yu'un ya xc'ohat.

⁷Ma yu'unuc te c'ax muq'uex yu'un te yantic nacionetic te la sc'uxultayex te Jehová soc te la stsahexe, ha'ex c'ax tutex yu'un spisil te nacionetique.

⁸Pero ha ta scaj te c'uxex ta yo'tan te Jehová soc la sc'an te la sc'ohtes ta pasel te bin jc'axel la yalbe ta jamal te ame'atatique; hich la sloq'uesex tal ta scuenta yu'el sc'ab soc la scoltayex loq'uel ta mosohil ta sc'ab faraón te ajwalil yu'un Egipto.

⁹Na'a me hiche te ha Dios stuquel te Jehová te Dios awu'un; ha Dios te stalel jun yo'tan ta atojol, te ya sc'ohtes ta pasel te chapbil-c'op soc c'ux ya ya'iy ta yo'tan mil ta caj sts'umbalic te mach'atic c'ux ya x'a'iyot ta yo'tan soc te ya sch'uhunic spasel te mandariletic yu'une;

¹⁰pero ya ya'be stoj stuquel te mach'a ya x'ihlayot yu'un, jc'axel ya slajin; ma ba ya xhalaj te ya ya'be castigo te mach'a ya x'ihlayot yu'une.

¹¹Ha yu'un ch'uhuna te mandariletic, te bintic chapal soc te bintic halbil ta mandar te yac jpasbelat ta mandar yo'tic te yac apase.

¹²Teme yac awa'iy te bintic halbil ta mandar ini, teme yac acanantay soc yac apase, te Jehová te Dios awu'un ya me yac' c'ohtuc ta pasel ta atojol te chapbil-c'op soc ya ya'bat awil te sc'uxul yo'tan te jc'axel la yalbe ta jamal te ame'atatique.

¹³C'ux me ya ya'iyat ta yo'tan, ya ya'bat bendición, ya yac' ya xp'ohlat, soc ya ya'be bendición te alal yac awalatay soc te sit ats'unub awawal, te trigo, vino soc te aceite awu'un, te yalatac awacax soc yalatac atuminchij soc atentsun. Hich ya spasbat ta q'uinal te jc'axel la yalbe ta jamal te ame'atatic te ya ya'bate.

¹⁴C'ax hich bendición yac awich' a te bin ut'il spisil te yantic pueblohetic; mayuc jtuhluc winic ta awohlil te ma xnich'naj soc mayuc jtuhluc ants te ma x'alaj, ha nix hich te chambahlametic awu'unique.

¹⁵Te Jehová ya me sloq'uesbat spisil chameletic; soc spisil te jmilawal-chameletic yu'un Egipto te la awile, ma ba ya yac' c'ohtuc ta atojol, ha ya ya'be ta stojol spisil mach'atic ya yihlayat.

¹⁶Yac alajinlan spisil te pueblohetic te ya ya'bat te Jehová te Dios awu'une; ma me xana'be yo'bolil sbahic soc ma me xach'uhuntay te diosetic yu'unic, como ha c'ohchinojibal awu'un ya xc'oht.

¹⁷Teme hich yac awal ta awo'tan: Te nacionetic ini ha c'ax tsobolic a te bin ut'il te ho'one, ¿bin ut'il ya xhu' ya jtenticlan loq'uel? teme xchihate,

¹⁸ma me xaxi'. Na'a me ta lec te bin la spas Jehová te Dios awu'un ta stojol faraón soc spisil Egipto;

¹⁹ha te muc'ul pruebahetic te la awil ta asit, te señahiletic soc jchahp a'teliletic, soc te smuc'ul yu'el sc'ab Jehová te Dios awu'un te la sloq'uesat tal a. Hich ya spas te Jehová te Dios awu'un ta stojol spisil te pueblohetic yac axi'e.

²⁰Soc te Jehová te Dios awu'un ya me sticombe tal xuxetic ta stojolic ha to c'alal ya xlajic te mach'atic hilemic soc te mach'atic la snac' sbahic ta atojol.

²¹Ma me xlaj awip yu'un xiwel ta stojolic, como ay ta awohlil te Jehová te Dios awu'une; ha Dios te mero muc' soc te ay ta xi'el.

²²Te Jehová c'unc'un ya sloq'ues bahel ta atojol te nacionetic, ma xhu' awu'un slajinel spisilic ta ora nax, scuenta yu'un ma ba bayel ya x'esmaj ta atojol a te jti'awal chambahlametic te ya scontrahinat.

²³Pero te Jehová te Dios awu'un ya ya'bat ta ac'ab te nacionetic, ya sjimbe sjolic ha to c'alal jc'axel ya xlajic.

²⁴Ya ya'bat ta ac'ab te ajwaliletic yu'unic, ha'at yac alajimbe sbihilic ta ye'tal ch'ulchan; mayuc mach'a ya xhu' ya scomat ha to c'alal jc'axel yac alajinlan.

²⁵Ya me achic'ticlambe te sloc'omba diosetic yu'unique. Ma me xbic'taj awo'tan yu'un te plata o te oro te yich'ojic, ma me xawich', scuenta yu'un ma ba yac ac'ohchin a, como ha ihlaybil yu'un te Jehová.

²⁶Soc ma me xawich' bahel ta ana te bin ihlaybil, scuenta yu'un ma ba jc'axel ya xbohlob ac'oblal a. Spisil me xap'aj soc xawihlay, como jc'axel bohloben sc'oblal stuquel.