Read Tzeltal Deuteronomio 8 Bible Online

Deuteronomio 8 - Tzeltal bible

Deuteronomio 8

¹Tsahtaybiluc me awu'unic ta spasel spisil te mandariletic yacon ta yalel ta atojolic ta ora ini, scuenta yu'un hich ya xcuxajex, ya xp'ohlex soc ya x'och awu'untayic a te q'uinal te jc'axel la yal ta jamal te Jehová te ya ya'be te ame'atatique.

²Ya me ana' spisil te be banti la yic'at tal te Jehová te Dios awu'un te cha'winic (40) ha'bil ta jochol taquin q'uinal yu'un la ya'bat apehc'an aba, la yilbat awo'tan, yu'un hich ya sna' a te bin ay ta awo'tan, teme yac apas o ma ba yac apas te mandariletic yu'une.

³La ya'bat apehc'an aba, la ya'bat awi'nal soc la smac'linat ta maná, ha te we'elil te ma ba ana'beyej sba, ni ha'uc la sna'beyic sba te ame'atatic, scuenta yu'un ya ya'bat ana' te ma ha'uc nax ya xcuxaj ants-winic yu'un te pan, ha ya xcuxaj yu'un spisil te c'op ya xloc' ta ye te Jehová.

⁴Ma ba laj ac'u' apac' soc ma ba siht' awoc te cha'winic (40) ha'bil ini.

⁵Na'a me ta awo'tan te hich te bin ut'il ya stojobtes snich'an te winique, ha nix hich ya stojobtesat te Jehová te Dios awu'une.

⁶Ch'uhuna me hiche te mandariletic yu'un te Jehová te Dios awu'un, ich'a ta muc' soc behenan ta be yu'un.

⁷Como te Jehová te Dios awu'un ya yic'at ochel ta lequil q'uinal te ay uc'umetic, muc'ul-ha'etic, sloq'uib-ha'etic soc lequil ha'etic te ya xbehenic ta spamlejetic soc ta witsiltic;

⁸ha q'uinal te banti ya xcol trigo, cebada, ts'usubiletic, higuerahetic, soc granadohetic, te banti ya yac' aceite te olivohetic soc te ya xloc' chab;

⁹te banti ma jtebuc nax pan yac awe', mayuc bin ya spasat falta tey a; te banti ya xloc' taq'uin ta tonetic soc te yac aloq'ues cobre ta witsiltic yu'une.

¹⁰Ya me xwe'at, ya xnoj ach'uht yu'un, soc ya me awalbe yutsil sc'oblal te Jehová te Dios awu'un yu'un te lequil q'uinal te la ya'bate.

¹¹Tsahtaya me te ma ba ya xch'ay ta awo'tan te Jehová te Dios awu'une; c'ohtuc me ta pasel awu'un spisil te mandariletic, te bintic halbil ta mandar soc te bintic chapal yu'un, te yacon ta yalel ta atojolic ta ora ini.

¹²Ma me hichuc ya xc'oht ta pasel awu'un te c'alal ya xwe'at soc te ya xnoj ach'uht, te yac apas buen lequil nahetic te banti ya xnahinat,

¹³te ya xp'ohl awacax, atuminchij soc atentsun, ya xp'ohl te plata soc oro awu'un, soc spisil te bintic ay awu'un ya xp'ohl;

¹⁴te hich ya xhahchat ta toybahil yu'un soc ya xch'ay ta awo'tan te Jehová te Dios awu'un te la sloq'uesat tal ta Egipto ta mosohil;

¹⁵te la yic'at bahel ta muc'ul jochol taquin q'uinal te xiweltic sba, te nojel ta ti'awal chanetic soc tsequetic; te ta q'uinal banti ay taquinti'il soc te mayuc ha' la sloq'uesbat tal ha' ta buen tulan ton;

¹⁶te la smac'linat ta maná ta jochol taquin q'uinal, ha te we'elil te ma ba la sna'beyic sba te ame'atatic, te la ya'bat apehc'an aba soc la yilbat awo'tan, scuenta awutsil alequil ya xc'ohat yu'un;

¹⁷te yac awal ta awo'tan: Ta scuenta quip soc ta scuenta yip jc'ab la jta te c'ulejalil ini, te xchihate.

¹⁸Pero ya me ana' te Jehová te Dios awu'un, como ha nax stuquel te ya ya'bat awip ta stahel te c'ulejaliletic, scuenta yu'un hich ya xc'oht ta pasel yu'un a te chapbil-c'op te jc'axel la yalbe ta jamal te ame'atatic, hich te bin ut'il ta ora ini.

¹⁹Yan teme yac ach'ay ta awo'tan te Jehová te Dios awu'un, teme ha yac at'un yantic diosetic, teme yac ach'uhuntay soc yac aquejan aba ta stojolic, jamal ya calbeyex yo'tic te jc'axel me ya xlajex.

²⁰Hich te bin ut'il Jehová ya slajinlan te nacionetic ta atojolic, ha nix hich ya xlajex, ta scaj te ma ba la ach'uhumbeyic sc'op te Jehová te Dios awu'unique.