Read Tzeltal San Juan 14 Bible Online

San Juan 14 - Tzeltal bible

San Juan 14

¹La yal te Jesús: Ma me xamel awo'tanic; yac ach'uhunic te Diose,[6] ch'uhunawonic ec.

²Ta banti sna te Jtate ay bayel ta jtsahl banti ya xnahinex; te yu'unuc ma hichuc aye, la jcalbeyex te hichuque. Ha yu'un ya xbaht jchahpambeyex awawilic tey a.

³Teme bohon soc teme chahpaj awawilic cu'une, ya xcha'talon xan, ya xtal quiq'uex bahel scuenta yu'un te banti ayon ha nix hich tey ya x'ayinex a.

⁴Ana'ojic te banti ya xbohon soc ana'beyejic sbehlal, xchi.

⁵La yal te Tomás: Cajwal, ma ba jna'ojcotic banti ya xbahat; ¿bin ut'il c'an jna'becotic sbehlal? xchi.

⁶La yal te Jesús: Ho'on te behon, ho'on te smelelil-c'opon, soc ho'on te cuxlejalon; mayuc mach'a ya xtal ta stojol te Tatil teme ma ha'ucon ta jcuenta.

⁷Te lajuc ana'bonic jba, ha nix hich yac ana'beyic sba te Jtat te hichuque. Yo'tic yac ana'beyic sba soc awilojiquix, xchi.

⁸La yal te Felipe: Cajwal, ac'a quilcotic te Tatil, tey ya xlaj co'tancotic a, xchi.

⁹Halbot yu'un te Jesús: Ayix ora joquimbelex, ¿ma to xana'bon jba, Felipe? Te mach'a yilojonix, ha nix yilojix te Tatile. ¿Bin yu'unix a hiche te hich yac awal: Ac'a quilcotic te Tatil, te xchihate?

¹⁰¿Yu'un bal ma ba ach'uhunej te jun ayon soc te Tatil, soc te ha joc te Tatil? Te jc'op yac calbelex, ma jtuquel-o'tanuc nax yac calbel, pero te Tatil, te jun ayon soc, ha yac spasbel te a'tele.

¹¹Ch'uhunawonic te jun ayon soc te Tatil soc te ha joc te Tatile; o ch'uhunawonic yu'un te ca'tele.

¹²Tulan sc'oblal ya calbeyex, te mach'a ya sch'uhunon, te bin a'telil yac jpasbel, ha nix hich ya me spas; soc c'axem to xan hich ya spas a, como ya xbohon ta banti ay te Tatile.

¹³Spisil te bin yac ac'ambeyic te Tatil ta scuenta jbihil, ya jpasbeyex, scuenta yu'un hich ya x'ich'ot ta muc' a te Tatil ta scuenta te Nich'anile.

¹⁴Teme ay bin yac ac'ambeyic Dios ta scuenta jbihil, ya jpasbeyex, xchi.

¹⁵Teme c'uxon ta awo'tanic, ch'uhumbonic te mandariletic cu'une.

¹⁶Ho'on ya jc'ambe te Tatil, hich ya ya'beyex yan Joquinwanej awu'unic te sbahtel q'uinal ya sjoquinex,

¹⁷ha te Espíritu yu'un smelelil, ha te ma xhu' ya yich' te mach'atic ayic ta scuenta bahlumilal, como ma ba ya yilic soc ma sna'beyic sba; yan te ha'exe, yac ana'beyic sba, como ay ta awo'tanic soc spisil ora ya sjoquinex.

¹⁸Ma ba ya quihquitayex ta me'bahil; ya xtal joquinex.

¹⁹Jts'ihn xanix ya sc'an ya xch'ayon ta sit te mach'atic ayic ta bahlumilal, pero te ha'exe, ya me awilonic. Te bin ut'il cuxulon, ha nix hich ya xcuxajex.

²⁰Ta patil ya me ana'ic te jun ayon soc te Jtat, soc te ayex ta jtojol soc ayon ta atojolic.

²¹Te mach'a yich'oj te mandariletic cu'un soc te ya sch'uhun spasel, ha me te c'uxon ta yo'tan abi. Te mach'a c'uxon ta yo'tan, c'ux me ya x'a'iyot yu'un te Jtate, soc ha nix hichon, c'ux me ya ca'iy ta co'tan soc ya cac' jba ta na'el yu'un, xchi.

²²La yal te Judas, (ma ha'uc te Iscariote): Cajwal, ¿bin yu'un te ho'otcotic nax yac awac' jna'batcotic aba, te ma ha'uc yac awac' aba ta na'el yu'un te mach'atic ayic ta bahlumilal? xchi.

²³La sjac' te Jesús: Te mach'a c'uxon ta yo'tan, ya sch'uhumbon jc'op; c'ux ya x'a'iyot yu'un te Jtate, soc ya xtal cac' jbahcotic ta yo'tan soc ya jnahimbecotic yo'tan.

²⁴Te mach'a ma ba c'uxon ta yo'tan ma ba ya sch'uhumbon jc'op. Te c'op yac awa'iyic ma ho'ucon, ha sc'op te Tatil te sticonejon tale.

²⁵Hich la jcalbeyex awa'iyic te c'alal joquex to a.

²⁶Pero te Joquinwanej, ha te Ch'ul Espíritu, te ya xticonot yu'un te Tatil ta scuenta jbihil, ha ya ya'beyex anopic soc ya ya'beyex ana'ic spisil te bin la jcalbeyexe.

²⁷Ya ca'beyex hilel lamal q'uinal; ya ca'beyex te lamal q'uinal cu'un; ma hichuc ya ca'beyex te bin ut'il ya yaq'uic te mach'atic ayic ta bahlumilal. Ma me xamel awo'tanic soc ma me xiwex.

²⁸La awa'iyiquix te la jcalbeyex: Ya xbohon, pero ya xcha'talon ta atojolic, te xchihone. Te ha'uc c'uxon ta awo'tanic, tse'el awo'tanic yu'un te ya xbohon ta banti ay te Jtate, como ha toyol cu'un te Jtate.

²⁹La jcalbeyexix ini te c'alal ma to c'ohemuc ta pasel a, scuenta yu'un te c'alal ya xc'oht ta pasel, ya me ach'uhunic.

³⁰Mayuquix bayel c'ahc'al ya jc'oponex, como yaquix ta talel te principal yu'un te bahlumilal. Mayuc bin yochelon a;

³¹pero ya jpas te bin la spason tal ta mandar te Tatil scuenta yu'un ya sna'ic te mach'atic ayic ta bahlumilal te c'ux ta co'tan te Tatile. Hahchanic, ya xbohotiquix.