Read Tzeltal San Juan 15 Bible Online

San Juan 15 - Tzeltal bible

San Juan 15

¹Ho'on te smelelil ch'oxalon ts'usub, soc ha jcanan-ts'usubil te Jtate.

²Spisil sc'ab te ay ta jtojol te ma ba ya yac' sit, ya set' loq'uel; spisil te ya yac'ticlan sit, ya spasticlan ta lec scuenta yu'un c'ax to xan hich ya sitin a.

³Te ha'exe pastaybilexix yu'un te jc'op la jcalbeyexe.

⁴Jc'axel me xawac' abahic ta jtojol, hich jc'axel ya cac' jba ta atojolic. Hich te bin ut'il ma xhu' ya sitin sc'ab ta stuquel teme ma ba jun ay soc te sch'oxale, ha nix hichex teme ma ba jc'axel yac awac' abahic ta jtojole.

⁵Ho'on te sch'oxalon ts'usub, ha'ex te sc'abex; te mach'a jc'axel ya yac' sba ta jtojol soc te ho'on jc'axel ya cac' jba ta stojol, ya me yac' bayel sit, yan teme parte yac awac' abahic, mayuc bin ya xhu' awu'unic spasel.

⁶Te mach'a ma ba jc'axel ya yac' sba ta jtojol, hich c'ohem te bin ut'il sc'ab te ya yich' ch'ayel loq'uel soc ya xtaquij; ya yich' tsobel ochel ta c'ahc', ya xlaj ta c'ahq'uel.

⁷Teme jc'axel yac awac' abahic ta jtojol soc teme ya x'ayin ta awo'tanic te jc'ope, c'anahic spisil bin ya sc'an awo'tanic, ya me x'a'botex.

⁸Ha ya x'ich'ot ta muc' Jtat yu'un teme bayel ya sitinex, hich ya xchicnaj a te ha jnopojelex cu'un.

⁹Hich te bin ut'il c'uxon ta yo'tan te Jtate, ha nix hich c'uxex ta co'tan; jc'axel ayinanic ta stojol te sc'uxul co'tane.

¹⁰Teme yac ach'uhunic spasel te mandariletic cu'un, hich jc'axel ya x'ayinex ta stojol a te sc'uxul co'tan, hich te bin ut'il jch'uhunej spasel te mandariletic yu'un te Jtat soc jc'axel ayon ta stojol te sc'uxul yo'tan.

¹¹Ha la jcalbeyex ini scuenta yu'un hich yac awich'bonic te yutsil co'tan, soc ts'acal ya xc'oht a te yutsil awo'tanic.

¹²Ha mandaril cu'un ini: Talel c'axel c'ux me xawa'iy abahic ta awo'tanic hich te bin ut'il c'ux la jca'iyex ta co'tan.

¹³Mayuc mach'a c'ax hich ay sc'uxul yo'tan a te bin ut'il te mach'a ya yac' scuxlejal ta scuenta te yamigo.

¹⁴Jun me co'tan jbahtic teme yac apasic te bin ya calbeyexe.

¹⁵Ma ba ya calbeyex te ha a'batex cu'un, como te a'bat ma sna' bin ya spas te yajwale; pero la jcalbeyex te jun co'tan jbahtic, como spisil te bin la jca'iy ta stojol te Jtat la jca'beyex ana'ic.

¹⁶Ma ha'uquex la atsahonic, ho'on la jtsahex soc la jcaq'uex yu'un ya xbahex soc ya sitinex, soc te sit yac awaq'uic ma ba ya xch'ay; scuenta yu'un spisil te bin yac ac'ambeyic te Tatil ta scuenta jbihil, ya me ya'beyex.

¹⁷Ya jpasex ta mandar: Talel c'axel c'ux me xawa'iy aba ta awo'tanic.

¹⁸Teme ya sp'ajex te mach'atic yu'un te bahlumilal, na'ahic me te ho'on nahil la sp'ajonic.

¹⁹Te ha'uc yu'unex te bahlumilal, c'ux ya ya'iyex ta yo'tan te hichuque; pero te bin ut'il ma yu'unuquex te bahlumilal, como ho'on la jtsahex loq'uel tal ta yohlil te bahlumilal, ha scuentahil te ya sp'ajex te bahlumilale.

²⁰Na'ahic me te bin la jcalbeyex: Te a'bat ma ha'uc toyol xan ay te bin ut'il te yajwal, te xchihone. Teme ho'on la yuts'inonic, ha nix hich ya me yuts'inex ec. Teme la yich'bonic ta cuenta te jc'ope, ha nix hich ya yich'beyex ta cuenta te ac'opique.

²¹Pero ya me spasbeyex spisil ini ta scaj te jbihile, como ma sna'beyic sba te mach'a la sticonon tale.

²²Te manchuc talucon soc te manchuc la jc'oponic, mayuc smulic te hichuque; pero ta ora ini, ma xwehtix bin ya yalic yu'un te smulique.

²³Te mach'a ya sp'ajon, ha nix hich ya sp'aj te Jtate.

²⁴Te manchuc la jpas jchahp a'teliletic te mayuc mach'a yan hich spasoj, mayuc smulic te hichuque; pero yilojiquix, soc la sp'ajonic soc te Jtate.

²⁵Te bin ut'il hich la spasic, yu'un hich ya xc'oht ta pasel a te bin ts'ihbabil hilel ta Ley yu'unic: Mayuc scuentahil te la sp'ajonic, te xchihe.

²⁶Pero te c'alal ya xtal te Joquinwanej, ha te ya jticombeyex tal ta stojol te Tatil, ha te Espíritu yu'un te bin smelelil te ya xloc' tal ta stojol te Tatile, ha me ya yalbon jc'oblal.

²⁷Ha nix hichex yac awalbonic jc'oblal, como ajoquinejonic c'alal ta shahchibal.