Read Tzeltal San Juan 19 Bible Online

San Juan 19 - Tzeltal bible

San Juan 19

¹Ha yu'un te Pilato la yic' bahel te Jesús, la yac' ta majel.

²Te soldadohetic la sjalic ch'ix, la ya'beyic ta sjol te Jesús soc la ya'beyic slap chi'in-yaxal muc'ul-c'u'ul,

³soc hahch slabanic: ¡Viva, Ajwalil yu'un judíohetic! xchihic, soc la spaq'uic ta majel.

⁴Hich te Pilato loc' xan tal, hich la yalbe te judíohetique: Ilawilic, ya quic'beyex loq'uel tal scuenta yu'un ya me ana'ic te mayuc smul la jtahbe, xchi.

⁵Hich loc' talel te Jesús, scoronahinej ch'ix soc slapoj te chi'in-yaxal muc'ul-c'u'ul. Li' ay te winique, xchi te Pilato.

⁶C'alal la yilic te Jesús te principal sacerdotehetic soc te policiahetic, hahchic ta aw: ¡Mila ta cruz! ¡Mila ta cruz! xchihic. La yal te Pilato: Ic'ahic bahel, milahic ta cruz te ha'exe, como mayuc smul la jtahbe te ho'one, xchi.

⁷La sjaq'uic te judíohetic: Ay ley cu'uncotic, tey ya yal a te ya me xlaj, como la yal sba te ha Snich'an Dios, xchihic.

⁸Bayel xiw yu'un te Pilato te c'alal hich la ya'iy.

⁹Cha'och xan bahel ta palacio, la sjoc'obe xan te Jesús: ¿Banti talemat? xchi. Pero ma ba la sjac' te Jesús.

¹⁰La yal te Pilato: ¿Ma bal yacuc ajac'bon jc'op? ¿Yu'un bal ma ba yac ana' te ay ca'tel yu'un ya cac'at ta lajel ta cruz o te ya jcoltayat bahele? xchi.

¹¹Jesús la yalbe: Mayuc awa'tel ta jtojol te manchuc a'bilat ta toyol. Ha yu'un te mach'a la yac'on ta ac'ab c'ax hich smul a stuquel, xchi.

¹²Ha yu'un te Pilato tey c'an scoltay bahel a te Jesús, pero te judíohetic xjuyetic hahchel ta aw: Teme yac acoltay bahel ha'i winic ini, yu'un nix ma ba jun awo'tan aba soc te César. Te mach'a ya scuy sba ta ajwalil, ha scontrahinej te César, xchihic.

¹³C'alal hich la ya'iy te Pilato, la sloq'ues tal te Jesús, soc la shuhcan sba ta chahpajibal ta jun lugar Limbil Pehchel Ton sbihil, Gábata, xchi ta hebreo.

¹⁴Ha yorahil a te ya schahpan sbahic yu'un te Q'uin Pascua, nopol ya sta ohlil c'ahc'al a. Te Pilato la yalbe te judíohetic: ¡Ilawil te Ajwalil awu'unique! xchi.

¹⁵Pero la yalic ta aw: ¡Loc'uc! ¡Loc'uc! ¡Ac'a yich' milel ta cruz! xchihic. Halbotic yu'un te Pilato: ¿Ha bal ya cac' ta milel ta cruz te Ajwalil awu'unique? xchi. La sjac' te principal sacerdotehetic: Mayuc yan ajwalil cu'uncotic, ha nax stuquel te César, xchihic.

¹⁶Hich te Pilato la ya'be ta sc'abic te Jesús scuenta yu'un ya yich' milel ta cruz. Hich la yiq'uic bahel te Jesús.

¹⁷Te Jesús sq'uechoj bahel scruzil, baht ta jun lugar Baqueljolal sbihil, Gólgota, xchi ta hebreo.

¹⁸Tey c'oht sjihpanic ta cruz soc cha'tuhl winiquetic, jujutuhl ta jujujehch, ta ohlil ay te Jesús.

¹⁹Ay bin la yac' ta ts'ihbayel te Pilato te la yich' lap'el ta sjol te cruz, te hich la yal: JESÚS NAZARENO, AJWALIL YU'UN JUDÍOHETIC, xchi.

²⁰Tsobol judíohetic la yilic te bin ts'ihbabil, como te banti jihpanot ta cruz Jesús nopol ay ta ti'pueblo, soc ay ta hebreo, ta griego soc ta latín te bin ts'ihbabil.

²¹Te principal sacerdotehetic yu'un te judíohetic la yalbeyic te Pilato: Ma me hichuc xats'ihbay: Ajwalil yu'un judíohetic, ma me xchihucat, hich me yac ats'ihbay: Yaloj: Ho'on Ajwalilon yu'un te judíohetic, xchi ya sc'an, la yutic.

²²La sjac' te Pilato: Te bin la jts'ihbay, la jts'ihbayix, xchi.

²³C'alal laj sjihpambelic ta cruz a te Jesús, te soldadohetic la yich'beyic te sc'u' spac', chaneb la sloq'uesic a, jujulihc ta jujutuhl. Soc la yich'beyic te snahtil-c'u' te mayuc sts'isbenal, te jlihc nax ta jalel.

²⁴Hich la yalbe sbahic: Ma me jchi'tic, ha lec ya jpasbetic seña ta na'el te mach'a ya xc'oht ta scuenta, xchihic. Hich c'oht ta pasel scuenta yu'un ya xc'oht ta pasel te bin ya yal te Shun Dios: La spuc sbahic ta jc'u' jpac', soc la spasic seña ta na'el ta scuenta te jc'u'e, xchi. Hich la spasic te soldadohetique.

²⁵Ta ye'tal te cruz yu'un Jesús tey tec'ajtic a te snan soc te yihts'in te snane, te María yihnam te Cleofas, soc María Magdalena.

²⁶C'alal Jesús la yil te snan soc te jnopojel te c'ux ta yo'tan te tey ay a, hich la yalbe te snane: Ants, tey ay te awale, xchi;

²⁷soc la yalbe te jnopojele: Tey ay te anane, xchi. Tey ora te jnopojel la yic' sjoquin ta nahinel.

²⁸Patil, te bin ut'il sna'oj Jesús te spisil hu'emix ta pasel, la yal: Taquin co'tan, xchi, scuenta yu'un hich ya xc'oht ta pasel a te bin ya yal te Shun Diose.

²⁹Ay vasija tey a nojel ta vinagre; ha yu'un la smulic ta vinagre jun esponja, la scats'anic ta sni'il hisopo-te', la ya'beyic ta ye.

³⁰C'alal laj sts'u'ts'uybel a te vinagre te Jesús, hich la yal: Hu'ix, xchi. Hich la sts'ohyan sjol, la yac' loc'uc sch'uhlel.

³¹Te bin ut'il yorahil schahpanel te Pascua, scuenta yu'un ma ba ya xhilic ta cruz te sbaq'uetalic, (como ha sc'ahc'alel cux-o'tan te bayel sc'oblal), te judíohetic la yalbeyic wocol te Pilato te yacuc yich' wac'ticlambeyel yacanic soc te yacuc yich'ic cohtesel te sbaq'uetalic.

³²Hich bahtic te soldadohetic, la swac'ticlambeyic yacan te jtuhle, soc nix te yan te pajal jipilic ta cruz soc.

³³Pero c'alal c'ohtic ta banti jipil te Jesús, la yilic te chamenix, ha yu'un ma ba la swac'beyic yacan stuquel.

³⁴Pero ay jtuhl soldado te la slowbe smochbaquel ta lanza, ora loc' ch'ich' soc ha'.

³⁵Te mach'a la yil yac yalbel ta testigo-c'op, soc mero melel te bin ya yal ta testigo-c'op; sna'oj te melel bin ya yal, scuenta yu'un hich nix yac ach'uhunic a te ha'exe.

³⁶Hich c'oht ta pasel scuenta yu'un ya xc'oht ta pasel te bin yal te Shun Dios: Ma ba ya yich' wac'beyel sbaquel stuquel, te xchihe.

³⁷Soc ay yan ta Shun Dios banti hich ya yal: Ya me yilic te mach'a la slowic, te xchihe.

³⁸Ta patil, te José talem ta Arimatea, te ha jnopojel yu'un Jesús, pero muquen sch'uhunej yu'un la xi' te judíohetic, ha la sc'ambe te Pilato te yacuc yich'be bahel sbaq'uetal te Jesús; te Pilato la ya'be. Hich la yich'be bahel te sbaq'uetal te Jesús.

³⁹Ha nix hich te Nicodemo, ha te xtaluc sc'opon te Jesús ta ahc'abal, yich'oj tal mirra capal soc áloes, c'axem ta lajuneb scha'winic (30) kilo yalal.

⁴⁰La yich'beyic bahel sbaq'uetal te Jesús, la spotsbeyic ta pac' soc ta bin sumet yic', hich te bin ut'il stalel te judíohetic te ya smuc sbahique.

⁴¹Ay awal-ts'unubil ta banti la yich' jihpanel ta cruz, soc ay yach'il muquenal tey a te ma to ayuc mach'a muhquem a.

⁴²Tey la ya'beyic hilel sbaq'uetal a te Jesús, yu'un yorahil yac schahpambel te Pascua yu'un te judíohetic, soc yu'un tey nopol ay a te muquenale.