Read Tzeltal San Juan 2 Bible Online

San Juan 2 - Tzeltal bible

San Juan 2

¹Yoxebal c'ahc'al a, ayin nuhpunel ta Caná ay ta sq'uinal Galilea; tey ay a te snan Jesús,

²soc ic'ot ta il-nuhpunel te Jesús soc te jnopojeletic yu'un.

³C'alal laj te vino, hich halbot yu'un snan te Jesús: Mayuquix vino yu'unic, xchi.

⁴¿Bin cocheltic a, ants? Ma to ba stahoj yorahil cu'un, xchi te Jesús.

⁵Te snan la yalbe te a'batetic: Pasahic spisil te bin ya yalbeyex, xchi.

⁶Ay waqueb yawil ha' tey a te pasbilic ta ton, te ya stuhunic te judíohetic scuenta slecubtesel sbahic; cheb oxeb muc'ul q'uib[2] sbahl te jujun yawil ha'.

⁷Te Jesús la yalbe te a'batetic: Nojesahic te yawil ha'etique, xchi. Hich la snojesic c'alal ta sti'il.

⁸Patil halbotic yu'un: Lupahic, ich'beyahic bahel te mach'a scuentahinej te q'uine, xchi. Hich la yich'beyic bahel.

⁹C'alal la spas prueba ya'iy te ha' te c'atp'ujem ta vino te mach'a scuentahinej te q'uin, ma la sna' ban tal, (aunque sna'ojic te a'batetic te la slupic loq'uel te ha'e). La yic' tal te jnuhpunel,

¹⁰hich la yalbe: Spisilic ha nahil ya yaq'uic te lequil vino; te c'alal bayel la yuch'iquix a, ha to ya yac' te banti ma lequil vinohuc; pero ha'at aq'uejoj te lequil vino c'alal ora, xchi.

¹¹Ha shahchibal te señahiletic te la spas Jesús ta Caná te ay ta sq'uinal Galilea, hich la yac' ta ilel te yutsilal; soc hich ch'uhunot yu'un te jnopojeletic yu'une.

¹²Patil co bahel ta Capernaum te Jesús, te snan, te yihts'inab, soc te jnopojeletic yu'une. Ma ba bayel c'ahc'al halajic tey a.

¹³Nopol sta yorahil Q'uin Pascua yu'un te judíohetic, hich mo bahel ta Jerusalén te Jesús.

¹⁴Ta Templo c'oht sta te mach'atic yacalic ta schonel wacaxetic, tuminchijetic, stsuhmutetic, soc tey huculic a te jel-taq'uinetique.

¹⁵Te Jesús la spas chicote ta ch'ajan, la stenticlan loq'uel ta Templo spisil soc te tuminchijetic soc wacaxetic; soc la stuhquiylambe staq'uinic te jel-taq'uinetic soc la sbuchticlambe te smesahique.

¹⁶La yalbe te jchon-stsuhmutetic: Loq'uesahic ini, ma me xac'atp'unic ta mercado te Sna te Jtate, la yut.

¹⁷Te jnopojeletic yu'un tal ta yo'tanic te hich ts'ihbabil: Ya xlajon ya ca'iy yu'un te xut'et co'tan yu'un te anahe, te xchihe.

¹⁸La sjaq'uic te judíohetic: ¿Bin seña yac awac' quilcotic te ay awa'tel ta spasel ini? la yutic.

¹⁹La sjac' te Jesús: Jinahic ha'i templo ini, ta oxeb c'ahc'al ya jcha'pas xan, xchi.

²⁰La yalic te judíohetic: Waqueb yoxwinic (46) ha'bil a hu' ha'i Templo ini, ¿ha'at bal c'an hu'uc awu'un spasel xan ta oxeb nax c'ahc'al? xchihic.

²¹Pero te templo la yale, ha te sbaq'uetal te Jesús.

²²Ha yu'un te c'alal cha'cuxaj tal ta yohlil te mach'atic chamenic, la sna' te jnopojeletic yu'un te hich nix yaloj, hich la sch'uhunic te Shun Dios soc te bin la yal te Jesuse.

²³C'alal ay ta Jerusalén a te Jesús, ta yorahil Q'uin Pascua, tsobol mach'atic la sch'uhunic c'alal la yilbeyic te señahiletic te la spase.

²⁴Pero te Jesús ma ba la smuc'ulin yo'tan, como sna'beyej yo'tan spisilic;

²⁵ma yu'unuc la sc'an te ay mach'a ya yalbe bin ut'il ay yo'tan te ants-winic, como sna'oj stuquel te bin ay ta yo'tan.