Read Tzeltal San Juan 21 Bible Online

San Juan 21 - Tzeltal bible

San Juan 21

¹Ta patil te Jesús la yac' xan sba ta ilel yu'un te jnopojeletic ta ti'mar yu'un Tiberias. Te bin ut'il la yac' sba ta ilel, hich ay:

²Tey sjoc sbahic a te Simón Pedro, Tomás te Dídimo yan sbihil, Natanael te talem ta Caná ay ta Galilea, te snich'nab Zebedeo, soc cheb xan jnopojeletic yu'un.

³La yal te Simón Pedro: Ya xbohon ta tsac-chay, xchi. Conic, ya joquinatcotic, xchihic te yantique. Hich bahtic soc ochic ta barco, pero sjunal ahc'abal mayuc chay la stsaquic.

⁴C'alal yac to nax ta sacubel q'uinal a, c'oht stehc'an sba ta ti'ha' te Jesús, pero te jnopojeletic ma ba la sna'ic teme ha te Jesús.

⁵Joc'obotic yu'un te Jesús: Jnich'nab, ¿ay bal jtebuc we'elil awu'unic? xchi. Mayuc, xchihic.

⁶Otsesahic ta swa'el barco te atsaco-chayic, hich me yac atahic a, xchi te Jesús. Hich la yotsesic, pero ma ba hu' yu'unic sloq'uesel ta scaj yipal te chaye.

⁷Hich te jnopojel te c'ux ta yo'tan Jesús la yalbe te Pedro: ¡Ha te Cajwaltique! xchi. C'alal la ya'iy te Simón Pedro te ha te Cajwaltic, la schuc te smuc'ul-c'u' (como scholojix), la sch'oj ochel sba ta ha'.

⁸Te yantic jnopojeletic talic soc te barco, sjochojic te stsaco-chayic, como ma ba namalix ti'ha' a, ay wan lajunwinic (200) xuhc'ubil[8] snamalil tey a.

⁹C'alal c'ohtic ta ti'ha', la yilic tey tsajuben ac'al a soc tey cajal jcoht chay a, soc ay pan.

¹⁰Hich halbotic yu'un te Jesús: Ich'ahic talel cha'oxcohtuc te chay te la atsaquique, xchi.

¹¹Och ta barco te Simón Pedro, la snit loq'uel ta ti'ha' te stsaco-chay, nojel ta niwac chayetic, ay oxlajuneb swaxacwinic (153) ta coht; aunque bayel, pero ma ba tuch' yu'un te stsaco-chayique.

¹²La yal te Jesús: La' me, we'anic, xchi. Mayuc jtuhluc te jnopojeletic te la sjoc'obe: ¿Mach'ayat a? mayuc mach'a xchi, como spisilic sna'ojic te ha te Cajwaltique.

¹³Tal te Jesús, la stsac te pan, la spucticlambe, ha nix hich la spucticlambe te chaye.

¹⁴Ha yoxebalix buelta a te la yac' sba ta ilel yu'un te jnopojeletic te c'alal cha'cuxajemix tal a.

¹⁵C'alal laj yo'tanic ta we'el, te Jesús la yalbe te Simón Pedro: Simón, snich'anat Jonás, ¿c'ax bal hich c'uxon ta awo'tan a te bin ut'il te yantic ini? xchi. C'ux, Cajwal. Ana'oj te c'uxat ta co'tan, xchi te Pedro. Mac'limbon te bic'tal tuminchijetic cu'un, xchi te Jesús.

¹⁶Cha'joc'obot xan ta schebal buelta: Simón, snich'anat Jonás, ¿c'uxon bal ta awo'tan? xchi. C'ux, Cajwal. Ana'oj te c'uxat ta co'tan, xchi. Canantaybon te tuminchijetic cu'un, xchi te Jesús.

¹⁷Joc'obot xan ta yoxebal buelta: Simón, snich'an Jonás, ¿c'uxon bal ta awo'tan? xchi. Te Pedro la smel yo'tan yu'un te yoxebalix buelta te joc'obot: ¿C'uxon bal ta awo'tan? te xchihe. Ha yu'un hich la yal: Cajwal, ana'oj spisil; ana'oj te c'uxat ta co'tan, xchi. Halbot yu'un te Jesús: Mac'limbon te tuminchijetic cu'une.

¹⁸Tulan sc'oblal ya calbat, te c'alal queremat to a, ha'at nix la alap ac'u', soc ha chican awo'tan banti bahat; pero te c'alal mamalatix a, yac ahach ac'ab, yan mach'a ya ya'batix alap ac'u', soc ya yic'at bahel ta banti ma xac'an ya xbahat, xchi sc'oblal.

¹⁹Hich la yal, yu'un la ya'be sna' te bin lajelil ya ya'iy te ya yac' ta ich'el ta muc' a te Diose. C'alal laj ta halbeyel a, la yal xan: T'unawon, xchi sc'oblal.

²⁰La sut sba te Pedro, la yil t'umbil yu'un te jnopojel te c'ux ta yo'tan Jesús, ha nix te mach'a ay ta nopol stahn Jesús te c'alal we'ic, soc te la sjoc'oy: ¿Mach'a a te ya yac'at ta c'abal, Cajwal? te xchihe.

²¹C'alal ilot yu'un te Pedro, la sjoc'obe te Jesús: Cajwal, ¿haxan ha'i winic ini? xchi.

²²Halbot yu'un te Jesús: Teme ya jc'an te cuxul to a te c'alal ya xtalone, ¿bin awochel a? T'unawon te ha'ate, xchi.

²³Ha yu'un puhc ta halel ta yohlil te yermanotac te ma ba ya xcham stuquel te jnopojele. Pero ma yu'unuc halbot yu'un Jesús te ma ba ya xcham, ha nax la yal: Teme ya jc'an te cuxul to a te c'alal ya xtalone, ¿bin awochel a te ha'ate? xchi nax yu'un.

²⁴Ha te jnopojel te yac yalbel ta testigo-c'op te bintic c'ohtix ta pasel soc ha la sts'ihbay ini. Ya jna'tic te melel bin ya yal ta testigo-c'op.

²⁵Ay to xan tsobol bin la spasticlan te Jesús, te spisiluc la yich' ts'ihbaylanel ta chahpalchahp, ya cal ho'on te ma ba ya x'och ta bahlumilal te librohetic te yacuc yich' ts'ihbayele.