Read Tzeltal San Juan 3 Bible Online

San Juan 3 - Tzeltal bible

San Juan 3

¹Ay jtuhl fariseo, Nicodemo sbihil, principal yu'un te judíohetique.

²Ta ahc'abal tal sc'opon te Jesús, hich la yalbe: Rabí, jna'ojcotic te ha sticonejat tal ta p'ijubteswanej te Diose, como mayuc mach'a ya xhu' yu'un spasel te señahiletic yac apasbel teme ma ba joquimbil yu'un te Diose, xchi.

³Hich halbot yu'un te Jesús: Tulan sc'oblal ya calbat, te mach'a ma ba ya xcha'ayin xan, ma xhu' ya yil te cuentahinel yu'un te Diose, xchi.

⁴La sjac' te Nicodemo: ¿Bin ut'il ya xhu' ya xcha'ayin xan te mach'a mamalixe? ¿Ya bal c'an hu'uc te ya xcha'wolot xan yu'un snan yu'un ya xcha'ayin xan? xchi.

⁵Halbot yu'un te Jesús: Tulan sc'oblal ya calbat, te mach'a ma ba ya x'ayin ta scuenta ha' soc ta scuenta Espíritu ma xhu' ya x'och ta banti ay te cuentahinel yu'un Dios.

⁶Te bin ya x'ayin ta scuenta ch'ich'-baq'uet, ha ch'ich'-baq'uet, yan te bin ya x'ayin ta scuenta te Espíritu, ha espíritu.

⁷Ma me xcham awo'tan yu'un te la jcalbat: Ya sc'an ya xcha'ayinex xan, te xchihone.

⁸Bayuc nax ya xbehen te ic', yac awa'iybe sc'op, pero ma xana' banti ya xtal soc banti ya xbaht. Hich ay spisil te mach'atic ayinemic ta scuenta te Espíritu, xchi.

⁹La sjac' te Nicodemo: ¿Bin ut'il ya xhu' ta pasel ini? xchi.

¹⁰Ha'at maestrohat yu'un Israel, xchi te Jesús, ¿yu'un bal ma xana' bin ut'il ay ini?

¹¹Tulan sc'oblal ya calbat, ha yac calbelcotic te bin jna'ojcotic, soc ha ya calcotic ta jamal te bin quilojcotic, pero ma xawich'ic ta cuenta te bin ya calcotique.

¹²Teme ma xach'uhunic te bin scuenta bahlumilal la jcalbeyex, ¿bin ut'il yac ach'uhunic a teme ha ya calbeyex te bin scuenta ch'ulchan?

¹³Mayuc mach'a mohem ta ch'ulchan, ha nax stuquel te mach'a cohem tal ta ch'ulchan, ha te Nich'anil ay ta scuenta winic.[3]

¹⁴Hich te bin ut'il te Moisés la sjihpan te chan ta jochol taquin q'uinal, ha nix hich ya yich' jihpanel te Nich'anil ay ta scuenta winic,

¹⁵scuenta yu'un spisil te mach'atic ya sch'uhunic, ma ba ya xch'ayic, ay scuxlejalic sbahtel q'uinal.

¹⁶Como hich c'ux ta yo'tan Dios te bahlumilal te la sticon tal te hip jtuhl Snich'an, scuenta yu'un spisil te mach'atic ya sch'uhunic ma ba ya xch'ayic, ay scuxlejalic sbahtel q'uinal yu'un.

¹⁷Te Dios ma ha'uc la sticon tal ta bahlumilal te Snich'an yu'un ya ya'be stoj smulic te mach'atic ayic ta bahlumilal, ha la sticon tal yu'un ya xcolic ta scuenta.

¹⁸Te mach'a ya sch'uhun, ma ba ya x'a'bot stoj smul; yan te mach'a ma ba ya sch'uhun, ya stoj smul stuquel, como ma ba la sch'uhun te hip jtuhl Snich'an te Diose.

¹⁹Hich ay scuentahil te ya stoj smulic: ha te tal ta bahlumilal te sacal q'uinal, pero te ants-winiquetic ha bayel xan la smulanic te yihc'al q'uinal te bin ut'il te sacal q'uinal, como chopol te ya'telique.

²⁰Como spisil te mach'atic ya spasic te bin chopol, ya yihlayic te sacal q'uinal, ma xtalic ta stojol te sacal q'uinal scuenta yu'un ma xchicnaj te ya'telique.

²¹Yan te mach'a ya spas te bin smelelil, ya xtal ta sacal q'uinal scuenta yu'un hich ya xchicnaj a te ha ta scuenta Dios te ya'tele, xchi.

²²Patil tal Jesús ta sq'uinal Judea soc te jnopojeletic yu'un, tey halajic soc a, soc la yac' ich'-ha' tey a.

²³Te Juan ha nix hich yac yac'bel ich'-ha' ta Enón, ta nopol Salim, como ay bayel ha' tey a. Te ants-winiquetic tal yac' sbahic ta a'beyel yich'ic ha',

²⁴como ma to ba ochem ta cárcel a te Juan.

²⁵Te jnopojeletic yu'un Juan la sten sbahic ta c'op soc te judíohetic sc'oblal te lecubtesele.

²⁶Talic ta stojol te Juan, hich la yalbeyic: Rabí, te mach'a la sjoquinat ta jehch Jordán, ha te la awalbe sc'oblal, ha nix hich ayix ta yaq'uel ich'-ha', soc spisilic yaquic ta bahel ta stojol, xchihic.

²⁷La sjac' te Juan: Mayuc bin ya xhu' ya yich' te winic teme ma ha'uc a'bibil tal ta ch'ulchan.

²⁸Ha'ex nix testigohex cu'un te hich la jcal: Ma ho'ucon te Cristohon, ho'on ticombilon tal ta nahil yu'un, te xchihone.

²⁹Te mach'a macbil yu'un te ach'ix, ha nix te querem ya xnuhpun soque; yan te yamigo te querem ya xnuhpun, ha te mach'a ay ta sts'ehl soc yac ya'iybel te sc'op, mero tse'el yo'tan yu'un c'alal ya ya'iybe sc'op te quereme. Ha scuentahil te mero tse'el co'tan yu'un.

³⁰Ya sc'an te ha ya xtohy sc'oblal, soc te ya xpehc'aj jc'oblal te ho'one.

³¹Te mach'a talem ta toyol, ha toyol yu'un spisil bintic ay; te mach'a li' nax ay ta bahlumilal, scuenta nax bahlumilal stuquel, soc sc'oblal nax bahlumilal te bin ya yale. Te mach'a talem ta ch'ulchan, ha toyol yu'un spisil yantic,

³²soc yac yalbel te bin yiloj soc te bin ya'iyej, pero mayuc mach'a ya sch'uhumbe te testigo-c'op yu'une.

³³Pero te mach'a ya sch'uhumbe te testigo-c'op yu'un, ha ya yal te melel bin ya yal te Diose,

³⁴como te mach'a ticombil tal yu'un Dios, ha ya yal te sc'op te Diose, como ma p'isbiluc nax ya yac' te Espíritu te Diose.

³⁵Te Tatil c'ux ya ya'iy ta yo'tan te Nich'anil soc ya'beyej ta sc'ab spisil bintic ay.

³⁶Te mach'a ya sch'uhun te Nich'anil ay scuxlejal sbahtel q'uinal; yan te mach'a ma sc'an ya sch'uhun te Nich'anil, ma ba ya yil te cuxlejal stuquel, ha ayix ta stojol te yilimba Dios, xchi te Juan.