Read Tzeltal San Juan 4 Bible Online

San Juan 4 - Tzeltal bible

San Juan 4

¹C'alal la sna' te Jesús te ya'iyejiquix te fariseohetic te c'ax hich ay jnopojeletic yu'un soc te c'ax hich yac yac'bel ich'-ha' a te bin ut'il te Juan,

²(aunque ma ha'uc yac yac'bel ich'-ha' te Jesús, ha te jnopojeletic yu'un te yac yac'belic ich'-ha'),

³ha yu'un loc' bahel ta Judea, baht yan buelta ta Galilea.

⁴La sc'an te ya xc'ax ta sq'uinal Samaria.

⁵Hich c'oht ta jun pueblo, Sicar sbihil, nopol ta sq'uinal Jacob te la ya'be hilel te snich'an, ha te José.

⁶Tey ay a te pozo yu'un Jacob. La shuhcan sba ta ti'poso te Jesús yu'un luhbenix ta behel. Ohlil c'ahc'al a.

⁷Tal jtuhl Samaritana-ants ta sloq'uesel ha'; hich halbot yu'un te Jesús: A'bon cuch' ha', xchi.

⁸(Te jnopojeletic yu'un bahemic ta pueblo ta smanel swe'elic.)

⁹La sjac' te Samaritana-ants: ¿Bin yu'un te ha'at judío-winicat yac ac'ambon awuch' ha' te samaritana-antson? xchi. (Como te judíohetic ma ba ya sc'opon sbahic soc te samaritanohetique.)

¹⁰Te Jesús la yalbe te antse: Te yacuc ana'be sba te mahtanil yu'un Dios soc te mach'a a te hich ya yalbat: A'bon cuch' ha', te xchihe, ha'at la ac'ambe awuch' ha', soc ha ya ya'bat awuch' te cuxul ha' te hichuque, xchi.

¹¹Tatil, mayuc bin yac alic loq'uel tal a, como c'ubul te pozo. ¿Banti ay awu'un te cuxul ha'?

¹²¿Ha'at bal muc' xan ac'oblal a te bin ut'il te jtatic Jacob, te la ya'botcotic hilel te pozo ini te banti la yuch' ha' soc snich'nab soc schansbahlam? xchi te antse.

¹³La sjac' te Jesús: Te mach'a ya yuch' ha'i ha' ini, ya xcha'taquij xan yo'tan.

¹⁴Yan te mach'a ya yuch' te ha' te ho'on ya ca'be, mayuc bin ora ya xtaquij xan yo'tan. Te ha' te ho'on ya ca'be, hich ya xc'oht te bin ut'il sloq'uib ha' te ya x'oquin scuenta cuxlejal sbahtel q'uinal, xchi.

¹⁵Tatil, a'bon te ha' yac awale, scuenta yu'un ma xtaquijix co'tan soc ma xtalonix ta sloq'uesel ha' li'i, xchi te antse.

¹⁶Bahan, ic'a tal te amamalal, xchi te Jesús.

¹⁷Mayuc jmamalal, xchi te antse. Melel te bin la awal: Mayuc jmamalal, te xchihate,

¹⁸como ho'ebix winic c'axemat a, soc te winic ajoc ta ora ini, ma amamalaluc. Melel te bin la awale, xchi te Jesús.

¹⁹La sjac' te antse: Tat, jalwanejat ya quil.

²⁰Te me'iltatiletic cu'uncotic li' la yich'ic ta muc' Dios ta wits ini, pero ha'ex yac awalic ta Jerusalén ya sc'an ya x'ich'ot ta muc' te Diose, xchi.

²¹Halbot yu'un te Jesús: Ants, ch'uhuna te ya me sta yorahil te ma li'uc ta wits ini o ta Jerusalén te yac awich'ic ta muc' te Tatile.

²²Te ha'ex ma xana'beyic sba; yan te ho'otcotic ha ya quich'cotic ta muc' te mach'a ya jna'becotic sba, como tey ya xtal ta stojol te judíohetic te colele.

²³Pero ya me sta yorahil, soc yorahilix ini, te mach'atic smelelil ya yich'ic ta muc', ya me yich'ic ta muc' te Tatil ta scuenta espíritu soc ta scuenta smelelil, como te Tatil yac slehbel te mach'atic hich ya x'ich'ot ta muc' yu'une.

²⁴Ha Espíritu te Diose, ha yu'un te mach'atic ya yich'ic ta muc', ya sc'an ya yich'ic ta muc' ta scuenta espíritu soc ta smelelil, xchi.

²⁵La yal te antse: Jna'oj te talel yac te Mesías, (ha te Cristo sbihil). Te c'alal ya xtal, ya me yalbotic ca'iytic spisil, xchi.

²⁶Ho'on abi, te yac sjucbelat ta c'op, xchi te Jesús.

²⁷Hich yac yalbel a, c'oht te jnopojeletic yu'un, xcham yo'tanic yu'un te yac ta c'op soc jtuhl ants; pero mayuc mach'a la sjoc'obe: ¿Bin yac ajoc'obe? o: ¿Bin yac awalbe? mayuc mach'a xchi.

²⁸Hich te ants la yihquitay hilel te sq'uib, baht ta pueblo, hich c'oht yalbe te winiquetic:

²⁹La'ic, ilawilic jtuhl winic te la yalbon spisil te bin jpasoje. ¿Ma bal ha'uc te Cristo? xchi.

³⁰Hich loq'uic tal ta pueblo, c'ohtic ta banti ay te Jesús.

³¹Te c'alal bahemix a te antse, te jnopojeletic la yalbeyic te Jesús: We'an, Rabí, xchihic.

³²Ay jwe'el te ma xana'ic bin ut'il ay, xchi te Jesús.

³³Talel c'axel la yalbe sbahic: ¿Ay bal mach'a la yich'be tal swe'el? xchihic.

³⁴Hich halbotic yu'un te Jesús: Ha jwe'el te ya jpas te bin ya sc'an yo'tan te mach'a la sticonon tal soc te ya hu'tesbe te ya'tel.

³⁵¿Ma bal hichuc yac awalic: Ay to sc'an chaneb u te ya yich' tsobel sit te ts'unubil, ma bal xchihuquex? Pero ya calbeyex, hacha asitic, ilawilic te bintic ts'umbil ta q'uinal, syijilix yu'un ya yich'ix tsobel.

³⁶Te mach'a ya stsob, ya yich' tojel soc ya stsobe sit scuenta cuxlejal sbahtel q'uinal, scuenta yu'un hich pajal tse'el yo'tan te mach'a la ya'iy awal soc te mach'a la stsobe sit.

³⁷Como smelelil te hich halbil: Yan mach'a ya ya'iy awal, yan mach'a ya stsobe sit, te xchihe.

³⁸Ho'on la jticonex ta stsobel tey ta banti ma ba a'tejemex; yan mach'atic a'tejic, ha'ex yac atsobeyic te sit te ya'telique, xchi.

³⁹Tsobol te samaritanohetic ta pueblo tey a la sch'uhunic Jesús ta scuenta sc'op te ants te hich la yal: La yalbon spisil te bin jpasoj, te xchihe.

⁴⁰Ha yu'un talic ta banti ay Jesús te samaritanohetic, la yalbeyic wocol te yacuc xhalaj tey a; hich halaj cheb c'ahc'al tey a.

⁴¹Tsobol xan yantic mach'atic la sch'uhunic Jesús yu'un te bin la yal stuquel.

⁴²Hich la yalbeyic te antse: Ma ha'uc xanix la jch'uhuncotic yu'un te bin la awal, como ho'otcotic nix la jca'iycotic soc la jna'cotiquix te melel ha te Cristo, te Jcoltaywanej yu'un spisil mach'atic ayic ta bahlumilal, xchihic.

⁴³Cheb c'ahc'al ta patil loc' bahel tey a te Jesús, baht ta Galilea,

⁴⁴como ha nix la yal te mayuc ta ich'el ta muc' ta slumal nix te jalwanej.

⁴⁵C'alal c'oht ta Galilea, ic'ot yu'un te galileohetic, como yilojic spisil te bintic la spasticlan ta Jerusalén ta yorahil q'uin, como ha'ic nix c'ohtic ta il-q'uin tey a.

⁴⁶Te Jesús cha'baht xan ta Caná ta sq'uinal Galilea, ta banti la sc'ahtajtes ta vino te ha'e. Ta Capernaum ay jtuhl swinic ajwalil te ay ta chamel te snich'ane.

⁴⁷C'alal la ya'iy te hahch tal ta Judea soc te hulemix ta Galilea te Jesús, baht yalbe wocol te yacuc xco bahel soc yacuc slahmajtes ta schamel te snich'an chamelixe.

⁴⁸Hich halbot yu'un te Jesús: Te manchuc yac awilic señahiletic soc jchahp a'teliletic, ma ba yac ach'uhunic te hichuque, xchi.

⁴⁹Tatil, cohan bahel ta ora te ma to xcham a te jnich'ane, xchi te swinic ajwalil.

⁵⁰Halbot yu'un te Jesús: Bahan, cuxul te anich'ane, xchi. Te winic la sch'uhun te bin halbot yu'un te Jesús, hich baht ta ora.

⁵¹Te c'alal yac ta cohel bahel a, tal ta tahel yu'un te a'batetic yu'un te hich la yalbeyic: Cuxul te anich'ane, xchihic.

⁵²La sjoc'obe bin ora hahch ta lecubel te snich'ane. La yalic: Wojey ta huqueb ora a quehchaj te sc'ahc'ale, xchihic.

⁵³Hich te stat la sna' te hich ora halbot yu'un Jesús: Cuxul te anich'an, te xchihe. La sch'uhun Jesús te winic soc spisil mach'atic ay yu'un ta sna.

⁵⁴Ha schebal señahil te la spas Jesús te c'alal hahch tal ta Judea, te hul ta Galilea.