Read Tzeltal San Juan 7 Bible Online

San Juan 7 - Tzeltal bible

San Juan 7

¹Ta patil behen ta Galilea te Jesús, yu'un ma ba la sc'an ya xbaht ta Judea, como te judíohetic schapbeyejic sc'oblal ta milel tey a.

²Nopol sta yorahil q'uin yu'un te judíohetic, ha te Q'uin yu'un Yaxna.

³Te Jesús halbot yu'un te yihts'inab: Ya sc'an ya xloc'at bahel li'i, bahan ta Judea scuenta yu'un ya yilic te jnopojeletic awu'un te a'teliletic yacat ta spasele.

⁴Como mayuc mach'a ya sc'an ya xpuhc sc'oblal te muquen ya x'a'tej. Teme hich yacat ta spasel, ac'a aba ta ilel ta comonsitil ta bahlumilal, xchihic.

⁵Como ni ha'uc ch'uhumbil yu'un te yihts'inabe.

⁶Ha yu'un halbotic yu'un te Jesús: Ma to ba stahoj yorahil cu'un, yan te ha'exe spisil ora lec te yorahil awu'unique.

⁷Ma xhu' ya sp'ajex te mach'atic ayic ta bahlumilal, yan te ho'one ya sp'ajonic, yu'un jamal ya cal te ha chopol te ya'telique.

⁸Bahan, mohanic bahel ta il-q'uin te ha'exe; ma to ba ya xmohon bahel ta q'uin ini, como ma to ba stahoj yorahil cu'un, xchi.

⁹C'alal laj yalbel a, hil ta Galilea.

¹⁰C'alal mohemiquix bahel a te yihts'inab, ha nix hich mo bahel te Jesús ta il-q'uin, pero ma ba la yac' sba ta ilel, muquen och bahel.

¹¹Te judíohetic la slehic ta yorahil te q'uin, hich la yalic: ¿Banti ay te winique? xchihic.

¹²Bayel hahchic wulajanel ta scuenta ta yohlil te ants-winiquetique, ay la yalic: Lequil winic, xchihic; ay yantic la yalic: Ma'uc, ha yac slo'loybel te pueblo, xchihic.

¹³Pero mayuc mach'a la yalbe sc'oblal ta comonsitil ta scaj te xi'ojic te judíohetique.

¹⁴Pero yohlil q'uin a mo bahel ta Templo te Jesús, la ya'iy p'ijubteswanej tey a.

¹⁵Xcham yo'tanic yu'un te judíohetic, hich la yalic: ¿Bin ut'il ay a te bayel bintic ya sna' te ma ba yich'oj p'ijubtesel? xchihic.

¹⁶Hich halbotic yu'un te Jesús: Te nohptesel ma cu'unuc, ha yu'un te mach'a sticonejon tal.

¹⁷Te mach'a ya sc'an ya spas te bin ya sc'an yo'tan te Diose, ya me sna' teme ha nohptesel yu'un Dios o teme jtuquel-o'tan nax ya xc'opojon.

¹⁸Te mach'a stuquel-o'tan nax ya xc'opoj, yac ta slehel yutsil sc'oblal, yan te mach'a ya slehbe yutsil sc'oblal te mach'a ticombil tal yu'une, chican te melel bin ya yal soc ma sna' lo'lowanej stuquel.

¹⁹¿Ma bal ha'uc la ya'beyex te Ley te Moisés? Pero mayuc jtuhluc hu'em awu'unic spasel. ¿Bin yu'un yac achapbelonic jc'oblal ta milel? xchi.

²⁰La sjaq'uic te ants-winiquetic: Ay pucuj ta awo'tan, ¿mach'a yac schapbelat ac'oblal ta milel? xchihic.

²¹La sjac' te Jesús: La jpas jchahp a'telil, apisilic xcham awo'tanic yu'un.

²²Melel te Moisés la ya'beyex circuncisión (aunque ma ha'uc te Moisés, ha to la shachic te namey tatiletic), pero ta sc'ahc'alel cux-o'tan yac awaq'uic circuncisión.

²³Teme ya yich' aq'uel circuncisión ta sc'ahc'alel cux-o'tan scuenta yu'un hich ma xyich' c'axuntayel a te smandar Moisés, ¿ya bal awihlintayonic yu'un te ta sc'ahc'alel cux-o'tan la jlecubtes ta chamel jtuhl winic?

²⁴Ma me xawilbe ya'tel yan ta scuenta nax bin yilel stalel, tojuc me xawa'iyic chahpanwanej, xchi.

²⁵Ay mach'atic ta Jerusalén te hich la yalic: ¿Ma bal ha'uc ini te mach'a yac slehbelic yu'un ya smilic?

²⁶Pero ilawil, yac ta c'op ta comonsitil, mayuc bin ya yalbeyic. ¿Yu'un bal la sna'iquix ta melel te principaletic te ha nix a te Cristohe?

²⁷Pero jna'ojtic banti talem te winic ini; yan te c'alal ya xtal te Cristo, mayuc mach'a ya sna' banti ya xtal stuquel, xchihic.

²⁸Yac ta p'ijubteswanej ta Templo a te Jesús, hich tulan la yal: Ana'beyejonic jba soc ana'ojic ban talemon. Ma jtuquel-o'tanuc talemon, pero te mach'a la sticonon tal ha smelelil, ha te ma xana'beyic sbahe.

²⁹Pero ya jna'be sba te ho'one, como tey talemon a soc ha nix la sticonon tal, xchi.

³⁰Ha yu'un c'an stsaquic, pero mayuc mach'a la stsac, como ma to stahoj yorahil yu'un a.

³¹Pero tsobol ants-winiquetic la sch'uhunic, soc hich la yalic: Te c'alal ya xtal te Cristo, ¿c'ax bal hich señahiletic ya spas a te bin ut'il ya spas te winic ini? xchihic.

³²Te fariseohetic la ya'iyic te hich yac yalbelic te ants-winiquetique. Ha yu'un te principal sacerdotehetic soc te fariseohetic la sticonic policiahetic ta stsaquel te Jesús.

³³La yal te Jesús: Ma ba halix c'ahc'al ya joquinex, patil ya suhtonix bahel ta banti ay te mach'a la sticonon tale.

³⁴Yac alehonic, pero ma ba yac atahonic. Te banti ya x'ayinon ma xhu' ya xbahex tey a, xchi.

³⁵Te judíohetic talel c'axel la sjoc'obe sbahic: ¿Banti ya xbaht te ma ba ya jtahtique? ¿Ya bal xbaht te banti puhquemic bahel judíohetic ta yohlil te griegohetic, ya bal sp'ijubtes te griegohetique?

³⁶¿Bin scuentahil te la yal: Yac alehonic, pero ma ba yac atahonic, soc: Te banti ya x'ayinon ma xhu' ya bahex, te xchihe? xchihic.

³⁷Ta slajibal sc'ahc'alel te q'uin te tulan sc'oblal, la stehc'an sba te Jesús, tulan la yal: Te mach'a taquin yo'tan, ac'a taluc ta jtojol soc ac'a yuch'.

³⁸Te mach'a ya sch'uhunon, hich te bin ut'il ya yal te Shun Dios, ya me x'oquin tal cuxul ha' ta yo'tan, xchi.

³⁹Ha la yalbe sc'oblal te Espíritu te ya x'a'botic te mach'atic ya sch'uhunique. Como ma to ba talem a te Ch'ul Espíritu, yu'un ma to ba ac'ot ta ich'el ta muc' a te Jesuse.

⁴⁰Te c'alal hich la ya'iyic cha'oxtuhl ants-winiquetic, hich la yalic: Melel nix a te ha te Jalwanej, xchihic.

⁴¹Ay yantic la yalic: Ha nix a te Cristo, xchihic. Pero ay yantic la yalic: ¿Ta Galilea bal ya xtal te Cristo?

⁴²¿Ma bal hichuc ya yal te Shun Dios te ta sts'umbal David soc ta Belén, te slumal David, ya xtal te Cristo? xchihic.

⁴³Ha yu'un la sjat sbahic ta scaj Jesús.

⁴⁴Ay mach'atic ya c'an stsaquic, pero mayuc mach'a la stsac.

⁴⁵Te policiahetic suhtic tal ta stojol te principal sacerdotehetic soc te fariseohetic, hich joc'obotic yu'un: ¿Bin yu'un ma ba la awiq'uic tal? xchihic.

⁴⁶La yalic te policiahetic: ¡Mayuc mach'a hich ya xc'opoj a te bin ut'il ya xc'opoj te winic ini! xchihic.

⁴⁷La sjaq'uic te fariseohetic: ¿Ha ni bal hichex la ach'uhunic lo'loyel?

⁴⁸¿Ay bal sch'uhunejix jtuhluc principal o jtuhluc fariseo?

⁴⁹Yan te ants-winiquetic ini te ma ba ya sna'ic te Ley, ha chopol sc'oblalic, xchihic.

⁵⁰Hich halbotic yu'un te Nicodemo, ha te mach'a tal sc'opon Jesús ta ahc'abal, te ha nix smohlolic:

⁵¹Te Ley cu'untic, ¿ya bal yalbe smul jtuhl winic te ma ba nahil ya x'a'iybot sc'op soc te ya xna'ot bin spasoj? xchi.

⁵²La sjaq'uic: ¿Ha nix hich talemat bal ta Galilea? Chola awil, ya me awil te mayuc chicnajem jtuhluc jalwanej ta Galilea, xchihic. [

⁵³[5] Jujutuhl baht ta snahic.