Read Tzeltal San Juan 8 Bible Online

San Juan 8 - Tzeltal bible

San Juan 8

¹Te Jesús baht ta Wits yu'un Olivohetic.

²Ta sab cha'baht xan ta Templo, spisil te pueblo tal ta stojol; la shuhcan sba soc la sp'ijubteslan.

³Te escribanohetic soc fariseohetic la yiq'uic tal jtuhl ants te yac ta antsinel a c'oht ta tahel; la stehc'anic ta ohlil,

⁴hich la yalbeyic te Jesús: Maestro, te ants ini yac ta antsinel a c'oht ta tahel.

⁵Te Moisés la yal ta Ley te ya yich' ch'ojel ta ton te mach'a antsil hich ya spase. ¿Haxan te ha'ate, bin yac awal yu'un? xchihic.

⁶Hich la yalbeyic yu'un ya stsajic, yu'un tey ya stahbeyic smul a. Pero te Jesús la sheht'an sba soc hahch sts'ihbay lum ta yal sc'ab.

⁷Te bin ut'il ma ba laj yo'tanic ta sjoc'obeyel, la stehc'an sba, hich la yalbe: Te mach'a mayuc smul, ha nahil ac'a sch'oj ta ton te antse, xchi.

⁸La scha'heht'an xan sba, la sts'ihbay xan te lume.

⁹C'alal hich la ya'iyic, tuhlutuhl loq'uic bahel, ha nahil te mach'atic mamaliquix, patil te yantique. Stuquel xanix hil Jesús soc te ants teq'uel tey a.

¹⁰La stehc'an xan sba te Jesús, la yil mayuc mach'a tey ayix a, ha xanix te antse, hich la yalbe: Ants, ¿banti ay te mach'atic yac slehbelat amul? ¿Ma bal ayuc mach'a la ya'bat atoj amul? xchi.

¹¹La sjac' te ants: Mayuc, Cajwal, xchi. Ni ho'ucon ya cac'at ta castigo. Bahan, ma me xalehix yan amul, xchi te Jesús.]

¹²Cha'c'oponotic xan yu'un Jesús te ants-winiquetic, hich la yal: Ho'on te sacal q'uinalon yu'un te bahlumilal; te mach'a ya st'unon ma ba ya xbehen ta yihc'al q'uinal, ha ya yich' te sacal q'uinal scuenta cuxlejal, xchi.

¹³La yal te fariseohetic: Ha'at nix yac awalbel ac'oblal; mayuc scuentahil te testigo-c'op awu'une, xchihic.

¹⁴La sjac' te Jesús: Aunque ho'on nix yac calbel jc'oblal, yu'un nix melel a, como jna'oj banti talemon soc banti ya xbohon; pero te ha'exe ma ba yac ana'ic banti talemon soc banti ya xbohon.

¹⁵Ha'ex yac awilbeyic ya'tel yantic ta scuenta ch'ich'-baq'uet; yan te ho'one mayuc mach'a ya quilbe ya'tel.

¹⁶Pero teme ya quilbe ya'tel, stojil me ya jchahpan, como ma jtuquel-o'tanuc ya jpas, ha nix joc te mach'a la sticonon tal, ha te Tatile.

¹⁷Ts'ihbabil hilel ta Ley awu'unic, teme ay cheb testigohetic, ha melel abi.

¹⁸Ho'on yac calbel jc'oblal, soc ha nix yac yalbelon jc'oblal te Jtat te la sticonon tale, xchi.

¹⁹La yalbeyic: ¿Banti ay te Atate? xchihic. La sjac' te Jesús: Ma xana'bonic jba, soc ma xana'beyic sba te Jtate. Te yacuc ana'bonic jba, yac ana'beyic sba te Jtat te hichuque, xchi.

²⁰Ay ta banti ya yich' tsobel smahtan Dios a te hich la yal te Jesús, te c'alal yac ta p'ijubteswanej ta Templo a. Mayuc mach'a tsacot yu'un, como ma to ba stahoj yorahil yu'un a.

²¹Halbotic xan yu'un te Jesús: Ya xbohonix, yac alehonic, pero ay amulic a ya xchamex. Te banti ya xbohon ma xhu' ya xbahex tey a, xchi sc'oblalic.

²²La yalic te judíohetic: ¿Yu'un bal ya smil sba, te hich ya yal: Te banti ya xbohon ma xhu' ya xbahex tey a, te xchihe? xchihic.

²³Hich halbotic yu'un te Jesús: Te ha'exe, ha alumalic te ahlan; te ho'one, ha jlumal te toyole. Te ha'exe, yu'unex te bahlumilal; te ho'one, ma yu'unucon te bahlumilale.

²⁴Ha scuentahil te la jcalbeyex te ay amulic a ya xchamex. Teme ma ba yac ach'uhunic te jtalel ayon, ay amulic a ya xchamex, xchi.

²⁵La yalbeyic te Jesús: ¿Mach'ayat a hiche? xchihic. Halbotic yu'un te Jesús: Ha te bin la jcalbeyex c'alal ta shahchibal.

²⁶Ay to bayel bin ya sc'an ya calbeyex soc te ya quich'ex ta c'op yu'une. Melel te bin ya yal te mach'a sticonejon tal, soc te ho'one, te bin yalbeyejon, hich ya calbe te mach'atic ayic ta bahlumilal, xchi.

²⁷Pero ma ba la sna'ic te la yalbe sc'oblal te Tatile.

²⁸Ha yu'un la yalbe xan: Te c'alal ya yich' toyel hahchel te Nich'anil ay ta scuenta winic, tey to me yac ana'ic a te ho'on nix soc te mayuc bin jtuquel-o'tan nax ya jpas, ha nax ya cal te bin a'bibilon jnop yu'un te Tatile.

²⁹Como sjoquinejon te mach'a la sticonon tale; ma ba spihtesejon te Tatil, como spisil ora ya jpas te bin lec yo'tan yu'un stuquel, xchi.

³⁰Hich yac yalbel a te Jesús, tsobol mach'atic la sch'uhunic.

³¹Te Jesús la yalbe te judíohetic te ch'uhunot yu'une: Teme jun awo'tanic ya x'ayinex ta stojol te jc'ope, mero jnopojelex cu'un ya xc'ohex;

³²soc ya me ana'beyic sba te smelelil c'op, soc ha ya yaq'uex ta libre te smelelil c'ope, xchi.

³³La sjaq'uic: Sts'umbalotcotic Abraham, mayuc mach'a smosohinejotcotic c'alal ora. ¿Bin yu'unix a te hich yac awal: Libre ya xc'ohex? xchihic.

³⁴La sjac' te Jesús: Tulan sc'oblal ya calbeyex, spisil mach'a ya spas mulil, ha mosohimbil yu'un te mulile.

³⁵Te mach'a ay ta mosohil, ma spisiluc ora ya xhil ta na; yan te mach'a al-nich'anil, spisil ora ha xhil stuquel.

³⁶Ha yu'un teme ya yaq'uex ta libre te Nich'anil, yu'un nix libre ya xc'ohex ta melel a.

³⁷Jna'oj te ha sts'umbalex Abraham; pero yac awalbelonic jmilel, como mayuc ta awo'tanic te jc'ope.

³⁸Te ho'one ya cal te bin quiloj ta stojol te Tatile, soc te ha'exe yac apasic te bin awa'iyejic ta stojol te tatil awu'unique, xchi.

³⁹La sjaq'uic te judíohetic: Ha jtatcotic te Abraham, xchihic. La yal te Jesús: Te ha'uc yal-snich'anex te Abraham, ha yac apasic te bin la spas te Abraham te hichuque.

⁴⁰Pero yo'tic yac awalbelonic jmilel, ha te mach'a la yalbeyex te smelelil c'op te yalbeyejon ca'iy te Diose. Ma hichuc la spas te Abraham.

⁴¹Te ha'exe ha yac apasbelic ya'tel te atatique, xchi. La yalbeyic: ¡Te ho'otcotic ma ba yalotcotic j'antsinel-ants! ¡Junax te jtatcotic, ha te Diose! xchihic.

⁴²Halbotic yu'un te Jesús: Te ha'uc atatic te Diose, c'ux yac awa'iyonic te hichuque, como talemon ta stojol te Dios soc li' ayon; ma jtuquel-o'tanuc nax te talemon, ha nix sticonejon tal te Diose.

⁴³¿Bin yu'un te ma xana'beyic scuentahil te jc'ope? Como ma xhu' yac awa'iybonic te jc'ope.

⁴⁴Te ha'exe, ha yu'unex te atatic, ha te pucuje, soc yac apasbeyic te bin ya sc'an yo'tan te atatique. Stalel jmilaw c'alal shahchibal, mayuc bin ora melel te sc'ope, como stalel mayuc smelelil c'op yu'un. C'alal ya ya'iy lot, ha nix sc'op ya yal, como mero jlot stuquel soc ha tatil yu'un lot.

⁴⁵Pero te ho'one, te smelelil bin ya cal, ma ba yac ach'uhunonic.

⁴⁶¿Ay bal jtuhlex te ya xhu' ya yal te ay jmule? Teme smelelil te bin ya cal, ¿bin yu'un ma ba yac ach'uhunonic?

⁴⁷Te mach'a yu'un Dios, ha ya ya'iybe sc'op te Diose; ha scuentahil te ma ba yac awa'iyic, como ma ba yu'unex te Diose, xchi.

⁴⁸La sjaq'uic te judíohetique: ¿Ma bal hichuc la jcalcotic te ha'at samaritanohat soc te ay pucuj ta awo'tan? xchihic.

⁴⁹La sjac' te Jesús: Mayuc pucuj ta co'tan, ha ya quich' ta muc' te Jtate; pero te ha'exe, yac abohlobtesbonic jc'oblal.

⁵⁰Ma ba ya jle te yutsil jc'oblal, pero ay mach'a ha ya sle soc ya ya'iy chahpanwanej stuquel.

⁵¹Tulan sc'oblal ya calbeyex, te mach'a ya scanantaybon te jc'ope, mayuc bin ora ya xcham, xchi.

⁵²La yalic te judíohetic: La jna'cotiquix te ay pucuj ta awo'tan. Cham te Abraham soc te jalwanejetic; pero ha'at yac awal: Te mach'a ya scanantaybon te jc'ope, mayuc bin ora ya xcham, xchihat.

⁵³¿Yu'un bal ha'at toyolat yu'un te jtatic Abraham, te cham? ¡Ha nix hich chamic te jalwanejetic! ¿Mach'a yac acuy aba a te ha'ate? la yutic.

⁵⁴La sjac' te Jesús: Teme ho'on nix ya cac' jba ta ich'el ta muc', mayuc scuentahil ya xc'oht; pero ha te Jtat te ya yac'on ta ich'el ta muc', ha te Dios awu'unic ta ac'opique.

⁵⁵Pero ma xana'beyic sba te Diose. Yan te ho'one, ya jna'be sba. Teme ya cal te ma jna'be sba, yacon ta lot hich te bin ut'il te ha'exe. Pero ya jna'be sba soc jcanantaybeyej te sc'ope.

⁵⁶Te atatic Abraham tse'el yo'tan yu'un te ya yilbon te yorahil cu'un. La yil, soc tse'el yo'tan yu'un, xchi.

⁵⁷La sjaq'uic te judíohetic: Ma to ayuc lajuneb yoxwinic (50) awa'bilal, ¿awiloj bal te Abraham? xchihic.

⁵⁸Halbotic yu'un te Jesús: Tulan sc'oblal ya calbeyex, te c'alal ma to ayuc a te Abraham, jtalel ayon te ho'one, xchi.

⁵⁹Hich la stamticlanic ton yu'un ya sch'ojic a, pero la snac' sba te Jesús, loc' bahel ta Templo, c'ax ta yohlilic, baht.