Read Tzeltal Hechos 1 Bible Online

Hechos 1 - Tzeltal bible

Hechos 1

¹Teófilo, ta shahchibal hun la jcal spisil bintic hahch spasticlan soc hahch yac'ticlan ta nopel te Jesús

²ha to c'alal ic'ot mohel, ta patil te la spasticlan ta mandar ta scuenta Ch'ul Espíritu te jpuc-c'opetic te tsahbil yu'une.

³C'alal c'axemix swocol a, ta scuxlejal la yac' sba ta ilel ta stojolic soc bayel pruebahetic te jamal la yac' ta ilel te cuxule. Cha'winic (40) c'ahc'al la yac' sba ta ilel yu'unic soc la yalbe ya'iyic sc'oblal te cuentahinel yu'un Dios.

⁴C'alal jun to ayic a, hich la spas ta mandar: Ma me xloq'uex ta Jerusalén, ya me amahliyic te bin yaloj te Tatil te ya ya'beyex, hich te bin ut'il la jcalbeyexe;

⁵como te Juan la yac' ich' ha', yan te ha'exe nopolix yorahil te yac awich'ic te Ch'ul Espíritu, xchi.

⁶Te mach'atic stsoboj sbahic, la sjoc'obeyic te Jesús: Cajwal ¿ora bal yac acha'hach xan te cuentahinel yu'un Israel? xchihic.

⁷La yal te Jesús: Mayuc ta acuentahic sna'el bin ora o bin c'ahc'alil te chapal yu'un te Tatil te ha nax ay ta scuenta stuquel;

⁸pero ya me awich' awu'elic te c'alal ya xtal ta atojolic te Ch'ul Espíritu; testigo ya xc'ohex cu'un ta Jerusalén, ta spisil Judea, Samaria, soc c'alal ta sti'il bahlumilal, xchi sc'oblalic.

⁹C'alal laj yalbel a, q'uelel sitic a ic'ot mohel, potsot ta tocal, ch'ay ta sitic.

¹⁰Yac yilbelic te ch'ulchan te c'alal yac ta mohel bahel a, ay cheb winiquetic tec'ajtic hulel ta sts'ehlic, sac sc'u' spac' slapojic,

¹¹hich la yalic: Winiquetic yu'un Galilea, ¿bin yu'un yac awilbelic te ch'ulchan? Te Jesús te ic'otix bahel ta ch'ulchan la awilique, ha nix hich ya xcha'tal xan te bin ut'il la awilic baht ta ch'ulchan, xchihic.

¹²Hich loq'uic bahel ta wits yu'un Olivohetic sbihil, suhtic ta Jerusalén, nopol yiloj sbahic, hich snamalil te bin ut'il ya xhu' ya xbehenic ta sc'ahc'alel cux-o'tan.[1]

¹³C'alal c'ohtic tey a, mohic bahel ta scha'cajal na ta banti ohlanemic te Pedro, Jacobo, Juan, Andrés, Felipe, Tomás, Bartolomé, Mateo, Jacobo te snich'an Alfeo, Simón te Zelote, soc Judas te snich'an Jacobo.

¹⁴Spisilic jun yo'tan la stsob sbahic ta sc'oponel Dios, soc te antsetic, te María te snan Jesús soc te yihts'inab.

¹⁵Ha yorahil a te Pedro la stehc'an sba ta yohlil te yermanotac (ay wan wacwinic (120) ta tuhl te stsoboj sbahic), hich la yal:

¹⁶Quermanotac, hich la sc'an te ya xc'oht ta pasel te bin ya yal te Shun Dios, te yaloj te Ch'ul Espíritu ta scuenta David sc'oblal te Judas, ha te j'ic'aw yu'un te mach'atic la stsaquic bahel te Jesús,

¹⁷ha te mach'a la sjoquinotic soc te pajal la jquich' ca'teltic soque.

¹⁸Te Judas la sman q'uinal yu'un te stojol te bin chopol la spas; tey cocoltsa' c'oht ta lum a, toj t'ohmel sch'uht soc loc' spisil sbiquil.

¹⁹Puhc sc'oblal ta stojol spisil mach'atic ayic ta Jerusalén, ha yu'un la ya'beyic sbihilin te q'uinal Acéldama ta sc'opic nix, ha Sq'uinal Ch'ich', xchi c'ohem.

²⁰Como hich ts'ihbabil ta shun Salmohetic: Ac'a johchajuc hilel te sna, ma me ayuc mach'a ya xnahin tey a. Soc: Yanuc mach'a ya yich'be ya'tel, xchi.

²¹Ha yu'un ya sc'an ya xweht jtuhluc te mach'a la sjoquinotic te jayeb c'ahc'al behen ta cohliltic te Cajwaltic Jesús,

²²ha te c'alal hahch ta yaq'uel ich'-ha' te Juan ha to c'alal ic'ot mohel ta cohliltic, te pajal testigohotic soc yu'un te cha'cuxaj te Jesús, xchi.

²³Hich la slehic cha'tuhl winiquetic: ha te José, te a'bot sbihil Barsabás, o Justo yan sbihil, soc te Matías.

²⁴Hich la yalic ta sc'oponel Dios: Ha'at, Cajwal, te yac ana'be yo'tan spisilic, ac'a ta na'el mach'a tsahbil awu'un ta schebalic,

²⁵scuenta yu'un ya yich' ya'tel ta jpuc-c'op awu'un, te ha ch'ay yu'un te Judas ta scaj smul, yu'un ya xbaht ta lugar yu'un, xchihic.

²⁶Hich och spasbeyic seña ta na'el, ha c'oht ta scuenta te Matías; hich jun c'oht soc te buluchtuhl (11) jpuc-c'opetique.