Read Tzeltal Hechos 13 Bible Online

Hechos 13 - Tzeltal bible

Hechos 13

¹Ta iglesia ta Antioquía ay jalwanejetic soc maestrohetic, ha te Bernabé, Simón te a'bot sbihil Níger, Lucio te talem ta Cirene, Manaén te pajal coltesbil soc te ajwalil Herodes, soc te Saulo.

²Te c'alal ayic ta yich'el ta muc' Cajwaltic soc scomoj swe'elic a, hich halbotic yu'un te Ch'ul Espíritu: A'bonic ta jcuenta te Bernabé soc Saulo yu'un spasel te a'tel te ha tsahbilic cu'un ta spasel, xchi.

³Hich, te c'alal laj scombel swe'elic soc sc'opombelic Dios yu'un, la scajambe sc'abic ta sjolic soc la sticonic bahel.

⁴Hich baht schebalic, ticombilic bahel yu'un te Ch'ul Espíritu, cohic bahel ta Seleucia, tey ochic ta barco a bahtic ta Chipre.

⁵C'alal c'ohtic ta Salamina, hahchic ta yalel te sc'op Dios ta sinagogahetic yu'un te judíohetique. Ha sjoquinejic te Juan te yac'oj sba ta a'batinel yu'unique.

⁶La sbehentayic spisil sq'uinal Chipre ha to c'alal c'ohtic ta Pafos, tey la stahic jtuhl judío-winic a, Barjesús sbihil, ha jlotil jalwanej soc jna'ojel,

⁷te sjoc sba soc te procónsul Sergio Paulo, te ay sp'ijil yo'tan. Ha la sticon ta iq'uel tal te Bernabé soc te Saulo yu'un yo'tanuc ya ya'iy te sc'op Diose.

⁸Pero te Elimas te jna'ojel (yu'un hich c'asesbil te sbihile), la scom te Saulo soc te Bernabé, la sle bin ut'il ma ba ya sch'uhun Dios te procónsul.

⁹Ha yu'un te Saulo, te Pablo yan sbihil, nojel ta yo'tan te Ch'ul Espíritu, la st'ojan sit yilbel,

¹⁰hich la yalbe: ¡Nojel ta awo'tan lo'loywanej soc spisil bintic chopol, yal-snich'anat pucuj, acontrahinej spisil te bintic stojil ta pasel! ¿Jc'axel bal ma xacom aba ta sjimbeyel te toj be yu'un te Cajwaltique?

¹¹Yo'tic ya scontrahinat te sc'ab Cajwaltic, ts'o'sit ya xc'ohat, hal c'ahc'al ma ba yac awil c'ahc'al, la yut. Ora tal yihc'al q'uinal ta stojol, xjoyet ta slehel mach'a ya xnitot bahel ta sc'ab yu'un.

¹²C'alal la yil te procónsul te bin c'oht ta pasel, la sch'uhun Dios, xcham yo'tan yu'un te nohptesel sc'oblal te Cajwaltique.

¹³Ochic ta barco ta Pafos te Pablo soc te smohloltac, c'ohtic ta loq'uel ta Perge ay ta sq'uinal Panfilia; pero te Juan la yihquitaylan hilel, suht bahel ta Jerusalén stuquel.

¹⁴Te Pablo soc Bernabé c'axic ta Perge, c'ohtic ta Antioquía te ay ta sq'uinal Pisidia. Ta sc'ahc'alel cux-o'tan ochic ta sinagoga, la shuhcan sbahic tey a.

¹⁵C'alal laj ilel te Ley soc te jalwanejetic, te principaletic yu'un te sinagoga la sticonic ta halbeyel te Pablo soc te Bernabé: Quermanotac, teme ay bin yac awalic scuenta ya'beyel yip yo'tan te ants-winiquetic, c'opojanic, xchihic.

¹⁶Hich tehc'aj hahchel te Pablo, la ya'be yil seña ta sc'ab yu'un ya xch'abic, hich la yal: Winiquetic yu'un Israel soc te mach'atic yich'ojic ta muc' te Diose, a'iya me awa'iyic:

¹⁷Te Dios yu'un ha'i pueblo Israel ini la stsa te jme'jtatic, soc la yac' muc'ubuc te pueblo aunque ha jyanlumetic ta sq'uinal Egipto, soc la shach sc'ab, la sloq'ues tal tey a.

¹⁸Ay wan cha'winic (40) ha'bil te cuhch yu'un te Dios te bin yilel stalelic te c'alal ayic ta jochol taquin q'uinal.

¹⁹C'alal la sjin huc-chahp nacionetic ta sq'uinal Canaán, la ya'be yich'ic te sq'uinalique.

²⁰Ay jbahc' soc lajuneb yoxwinic ha'bil (450) te hich c'oht ta pasel, patil la ya'be juecetic ha to c'alal ta yorahil te jalwanej Samuel.

²¹Patil la sc'anic ajwalil, ha yu'un Dios la ya'be Saúl, te snich'an Cis te sts'umbal Benjamín; cha'winic (40) ha'bil ay ta ajwalil.

²²C'alal la sloq'ues te Saúl, ha la yotses ta ajwalil te David, te hich halbil sc'oblal yu'un: La jta jtuhl winic te lec co'tan yu'un, ha te David te snich'an Isaí; ha ya spas spisil te bin ya sc'an co'tan, te xchihe.

²³Ta scuenta sts'umbal David, Dios la schicnajtes te Jesús scuenta Jcoltaywanej yu'un Israel, hich te bin ut'il yaloj.

²⁴C'alal ma to xtal a, te Juan hahch yalbe ya'iy spisil te pueblo yu'un Israel te bin ut'il ay sc'oblal te ich'-ha' scuenta suhtesel-o'tanil.

²⁵Te c'alal nopol ya xlajix ya'tel a te Juan, hich la yal: ¿Mach'a yac acuyonic a? Ma ho'ucon te mach'a ya xtal; pero ay mach'a patil ya xtal cu'un te ma ba ya xtuhunon yu'un te ya jtilbe sc'ab step stuquel, xchi.

²⁶Quermanotac, sts'umbalex Abraham, soc ha'ex te awich'ojic ta muc' te Diose, ticombilix ta halel ta atojolic te bin ut'il ay sc'oblal te colel ini,

²⁷como te mach'atic nahinemic ta Jerusalén soc te jcuentahinwanejetic yu'unic, ma ba la yich'ic ta cuenta mach'a a te Jesús soc te sc'op te jalwanejetic te ya yilic ta jujun sc'ahc'alel cux-o'tan, hich la yaq'uic ta milel.

²⁸Aunque mayuc smul la stahbeyic scuenta lajel, la sc'ambeyic Pilato te ya yich' milel.

²⁹C'alal ts'acal c'ohtix ta pasel yu'unic spisil te bintic ts'ihbabil hilel sc'oblal, la scohtesic ta te', la yaq'uic ta muquenal.

³⁰Pero Dios la scha'cuxajtes tal ta yohlil mach'atic chamenic.

³¹Bayel c'ahc'al la yac' sba ta ilel ta stojol mach'atic pajal loq'uic ta Galilea te bahtic ta Jerusalén soc, te yo'tic ha testigohetic c'ohtic yu'un ta stojol te pueblo.

³²Ha nix hichotcotic ya calbeyexcotic awa'iyic te lec yach'il c'op, ha te bin halbil ta jamal ta stojol te jme'jtatic,

³³ha te bin la yac' c'ohtuc ta pasel te Dios ta jtojoltic ho'otic te yal-snich'anotic, ha te la scha'cuxajtes tal te Jesús; hich te bin ut'il ts'ihbabil ta schebal salmo: Ha'at Jnich'anat, nax to ayinat cu'un, te xchihe.

³⁴Soc te bin ut'il cha'cuxajtesot tal ta yohlil te mach'atic chamenic scuenta yu'un mayuc bin ora ya xc'a' sbaq'uetal, hich la yal: Ya ca'beyex te ch'ul bendicionetic te halbil ya x'a'bot David, te xchihe.

³⁵Soc ha scuentahil te hich ya yal ta yan salmo: Ma ba yac awac' ta c'a'el sbaq'uetal te mach'a ch'ultesbil awu'un, te xchihe.

³⁶Melel te jayeb ha'bil te David la spas te bin lec yo'tan yu'un Dios ta stojol te jcaj ts'umbalil yu'un, cham, mucot ta banti mucul sme'stat, soc c'a' sbaq'uetal stuquel.

³⁷Yan te mach'a cha'cuxajtesot yu'un Dios ma ba ac'ot ta c'a'el stuquel.

³⁸Na'ahic me, quermanotac, te ta scuenta Jesús halbotex sc'oblal te perdón yu'un mulil,

³⁹soc spisil te bin ma xhu' te chahpambil ya xc'ohex yu'un te Ley yu'un Moisés, ha chahpambil ya xc'ohex ta scuenta stuquel.

⁴⁰Ha yu'un tsahtaya me abahic te manchuc ya xc'oht ta atojolic te bin halbil hilel yu'un te jalwanejetic:

⁴¹Ilawilic, ha'ex jlabanwanejex, xiwanic soc ch'ayanic ta q'uinal, yu'un ay bin ya jpas ta yorahil awu'unic te ma ba yac ach'uhunic, aunque ya xhalbotex awa'iyic, te xchihe, xchi te Pablo.

⁴²C'alal loq'uic ta sinagoga yu'un te judíohetic, la yalbeyic wocol te Pablo te ta yan sc'ahc'alel cux-o'tan yacuc xhalbotic xan sc'oblal.

⁴³C'alal la spuc sbahic te mach'atic stsoboj sbahic, tsobol judíohetic soc te mach'atic yac'oj sbahic ta judíohil la st'unic te Pablo soc Bernabé, te la ya'beyic sna'ic te jc'axeluc ya yac' sbahic ta stojol te yutsil yo'tan Dios.

⁴⁴Ta yan sc'ahc'alel cux-o'tan jteb ma spisiluc te pueblo la stsob sbahic ta ya'iyel te sc'op Diose.

⁴⁵Pero c'alal la yilic te judíohetic te tsobol ants-winiquetic, xut'et yo'tanic yu'un, hich la scontrac'optayic soc la yixta'c'optayic te bin yac yalbel te Pablo.

⁴⁶Ha yu'un te Pablo soc Bernabé soc yip yo'tanic hich la yalbeyic: La sc'an te nahil la jcalbeyex awa'iyic te sc'op Dios; pero te bin ut'il la ap'ajic soc ma xac'an yac awich'ic te cuxlejal scuenta sbahtel q'uinal, ya xbohotcotic ta stojol te jyanlumetique,

⁴⁷yu'un hich la spasotcotic hilel ta mandar te Cajwaltic: La jcac'at te ha sacal q'uinal ya xc'ohat ta stojol te jyanlumetic, scuenta yu'un yac awich' bahel te colel c'alal ta sti'il bahlumilal, xchihic.

⁴⁸C'alal hich la ya'iyic te jyanlumetic, tse'el yo'tanic yu'un soc la yalbeyic yutsil sc'oblal te sc'op Cajwaltic; soc la sch'uhunic Dios spisil te mach'atic tsahbilic te ya yich' scuxlejalic sbahtel q'uinal.

⁴⁹Puhc te sc'op Cajwaltic ta spahmal sq'uinal Pisidia.

⁵⁰Pero te judíohetic la stijbeyic yo'tan te antsetic te lec yo'tanic ta stojol Dios soc te ich'bilic ta muc', soc nix te principaletic yu'un te pueblo; hich hahch yuts'inic te Pablo soc Bernabé, la stenic loq'uel ta sq'uinalic.

⁵¹Ha yu'un la stihtinic hilel slumil yoquic ta scontrahic, bahtic ta Iconio.

⁵²Te jnopojeletic mero tse'el yo'tanic soc nojel ta yo'tanic te Ch'ul Espíritu.