Read Tzeltal Hechos 18 Bible Online

Hechos 18 - Tzeltal bible

Hechos 18

¹Patil loc' bahel ta Atenas te Pablo, baht ta Corinto.

²Tey la sta jtuhl judío-winic a, Aquila sbihil, ha slumal te Ponto, hulel to ta Italia soc Priscila te yihnam, como la spas mandar te Claudio te ya me xloq'uic ta Roma spisil te judíohetique. Te Pablo baht sjoquin.

³Te bin ut'il pajal ya'telic, la sjoquin ta nahinel, yu'un pajal a'tejic ta spasel nahilpac'.

⁴Ta jujun sc'ahc'alel cux-o'tan c'opoj te Pablo ta sinagoga, te yacuc sch'uhunic te judíohetic soc te griegohetique.

⁵C'alal hulic te Silas soc Timoteo te talic ta Macedonia, ya'telinej yalel sc'op Dios a hul stahic te Pablo, yac yalbebel te judíohetic te ha Cristo te Jesús.

⁶Pero te judíohetic la smaquic ta c'op te Pablo soc la yixta'c'optayic, hich te Pablo la slihlin sc'u' spac' te slapoj soc la yalbe: Ac'a c'ohtuc ta ajolic te ach'ich'elique. Mayuquix ta jcuenta; yo'tic ya xbohonix ta stojol te jyanlumetique, la yut.

⁷Hich loc' ta sinagoga te Pablo, och ta sna jtuhl winic, Justo sbihil, yich'oj ta muc' Dios, te slac'oj sba soc sinagoga te snahe.

⁸Te Crispo, te principal yu'un te sinagoga, la sch'uhun te Cajwaltic soc sjunal sna; soc bayel te corintohetic, c'alal la ya'iyic, la sch'uhunic soc la yich'ic ha'.

⁹Ta ahc'abal te Pablo hich halbot yu'un Cajwaltic ta snahalsit: Ma me xiwat, c'opojan, ma me xacom aba,

¹⁰como ho'on joquinejat, mayuc mach'a ya xhu' ya yuts'inat, yu'un ay to tsobol ants-winiquetic cu'un li' ta pueblo ini, xchi.

¹¹Ha yu'un halaj j'ohlil scheb ha'bil tey a, yac yac'bel ta nopel te sc'op Diose.

¹²C'alal ay ta ajwalil ta sq'uinal Acaya a te Galión, te judíohetic la syom sc'opic ta scontrahinel te Pablo, la yiq'uic bahel ta chahpajibal,

¹³hich c'oht yalic: Ha'i winic ini yac yalbebel te ants-winiquetic te ya me sch'uhunic Dios te ma hichuc ya yal ta Ley, xchihic.

¹⁴C'an hahchuc ta c'op te Pablo, pero te Galión la yalbe te judíohetic: judíohetic, te ayuc bin ma lecuc spasoj o te ayuc bin mero chopol spasoje, ya quich'beyex ta cuenta ac'opic te hichuque;

¹⁵pero teme ha nax sc'oblal c'opetic soc bihililetic soc te Ley awu'unique, chahpanahic atuquelic, como ma jc'an ya jchahpan ha'i c'opetic ini, la yut.

¹⁶Hich la stenticlan loq'uel ta chahpajibal.

¹⁷Ha yu'un te griegohetic la scomontsaquic te Sóstenes te principal yu'un te sinagoga, la smajic tey ta stojol te chahpajibal. Pero te Galión mayuc bin la yal yu'un.

¹⁸Bayel c'ahc'al halaj tey a te Pablo. Patil la sc'opon hilel te yermanotac, och ta barco, baht ta sq'uinal Siria, sjoquinej bahel te Priscila soc Aquila. Ta Cencrea te Pablo la yac' ta quits'el sjol yu'un ay bin schapoj ta stojol Dios.

¹⁹C'ohtic ta Éfeso, te Pablo tey la yihquitay hilel a te Priscila soc Aquila; och ta sinagoga stuquel soc c'opoj soc te judíohetique.

²⁰La yalbeyic wocol te yacuc xhalaj xan tey a, pero ma ba la sc'an,

²¹hich la yalbe hilel: Ya sc'an te ayon ta Jerusalén ta spasel te q'uin te nopol ay; teme hich ya sc'an Dios, ya xcha'talon xan, xchi. Hich loc' bahel ta barco ta Éfeso.

²²C'alal hul ta loq'uel ta barco ta Cesarea, mo bahel yu'un ya spatbe yo'tan te iglesia, patil co bahel ta Antioquía.

²³Halaj tey a, patil loc' bahel, xtiq'uet la yocliy bahel te sq'uinal Galacia soc Frigia, la ya'be yich' yip yo'tan spisil te jnopojeletique.

²⁴Ay c'oht ta Éfeso jtuhl judío-winic, Apolos sbihil, ha slumal te Alejandría, ya sna' c'op ta lec soc ya sna' ta lec te Shun Diose.

²⁵A'bibil snop bin ut'il ay te be yu'un te Cajwaltique; ta spisil yo'tan c'opoj soc stojil la yac' ta nopel sc'oblal te Jesús, aunque ha nax la sna'be sc'oblal te ich'-ha' yu'un te Juan.

²⁶Soc yip yo'tan hahch ta c'op ta sinagoga; pero c'alal la ya'iyic te Priscila soc Aquila, jechc'al la yiq'uic bahel, la yalbeyic ta lec bin ut'il ay te be yu'un Dios.

²⁷Te bin ut'il la sc'an ya xc'ax ta Acaya te Apolos, a'bot yip yo'tan yu'un te yermanotac soc la sts'ihbabeyic hun te jnopojeletic tey a te yacuc yiq'uic ta stojolic. C'alal c'oht tey a, bayel la scoltay ta c'op te mach'atic sch'uhunejic ta scuenta yutsil yo'tan Dios,

²⁸como bayel yip la stsal ta c'op ta comonsitil te judíohetic, la yac' ta na'el ta scuenta te Shun Dios te ha nix Cristo te Jesús.