Read Tzeltal Hechos 2 Bible Online

Hechos 2 - Tzeltal bible

Hechos 2

¹C'alal c'oht sc'ahc'alel q'uin Pentecostés, ta spisilic jun stsoboj sbahic a.

²Repente nax ay bin xju'et c'opoj tal ta ch'ulchan hich bin ut'il tulan ic', hul spuhl sba ta yutil na te ban hucajtique;

³soc la yilic chicnaj hich te bin ut'il yat c'ahc' te la spuc sba ta stojol jujutuhl.

⁴Ta spisilic noj ta yo'tanic te Ch'ul Espíritu, hahchic ta c'op ta yantic c'opiletic, ha chican bin c'opil ac'otic ta c'op yu'un te Espíritu.

⁵Ha yorahil a te ay ta Jerusalén judíohetic te jun yo'tan sch'uhunejic Dios, te talemic ta spisil ta chahp nacionetic ayic ta bahlumilal.

⁶C'alal ay bin xju'et c'opoj la ya'iyic, la stsob tal sbahic te ants-winiquetic; xcham yo'tanic como jujutuhl la ya'iyic te c'opojic ta sc'opic nix.

⁷Xch'ayet soc xcham yo'tanic yu'un, hich la yalic: Ilawil, ¿ma bal galileoheticuc spisil ha'i winiquetic yacalic ta c'op ini?

⁸¿Bin yu'unix a te ya sc'oponotic ta tuhlutuhl ta jc'optic nix?

⁹Ay talemic ta Partia, Media, Elam, soc te mach'atic nahinemic ta Mesopotamia, Judea, Capadocia, Ponto, Asia,

¹⁰Frigia soc Panfilia, Egipto soc te sq'uinal Libia te nopol ay soc Cirene; soc ay talemic ta Roma te li' nahinemic, ha judíohetic soc jyanlumetic te ochemic ta judíohil;

¹¹soc talemic ta Creta soc Arabia, yac yalbelic ca'iytic ta jc'optic nix te yutsil ya'tel te Diose, xchihic.

¹²Xch'ayet soc xcham yo'tanic, talel c'axel la sjoc'obe sbahic: ¿Bin ut'il ay a ini? xchihic.

¹³Ay yantic hahchic ta labanwanej: Yuch'ojic vino, xchihic.

¹⁴Ha yu'un te Pedro la stehc'an sba soc te buluchtuhl (11), tulan hahch ta c'op, hich la yal: judíohetic soc ta apisilic te nahinemex ta Jerusalén, ya ca'beyex ana'ic bin ut'il ay ini; a'iybon awa'iyic te bin ya cale.

¹⁵Te winiquetic ini ma ba yuch'ojic, ma hichuc te bin ut'il acuyojic, como baluneb to nax ora sacubel q'uinal.

¹⁶Ha te bin halbil hilel yu'un te jalwanej Joel:

¹⁷Ta nopol slajibal c'ahc'al, xchi te Diose, ya jmal te Espíritu cu'un ta stojol spisil ants-winiquetic; te ach'ix queremetic awu'unic ya me yalic sc'op-jalwanej; te queremetic awu'unic ay bin ya yilic ta snahalsitic; te mamaletic awu'unic ay bin ya swayichtayic;

¹⁸soc ya jmalbe te Espíritu cu'un ta stojol te a'batetic ants-winiquetic cu'un, soc ya me yalic sc'op-jalwanej.

¹⁹Ya cac' ta ilel muc' jchahp a'teliletic ta sjamalil ch'ulchan, soc señahiletic ta bahlumilal, ch'ich', c'ahc' soc xpaq'uet ch'ahilel;

²⁰ya x'ihc'ub te c'ahc'ale soc ya xc'ataj ta ch'ich' te u, te ma to xc'oht sc'ahc'alel a te Cajwaltic, te ha muc' soc bayel yutsilal.

²¹Soc spisil mach'atic ya sc'oponic te sbihil te Diose, ya me xcolic, xchi.

²²Winiquetic yu'un Israel, a'iya me awa'iyic te c'ope: Te Jesús talem ta Nazaret, ha te winic te Dios la yac' ta ilel ta atojolic te lec sc'oblal; hich la yac' ta ilel ta scuenta jchahp a'teliletic soc señahiletic te Dios la spas ta atojolic ta scuenta, hich te bin ut'il ana'ojique.

²³Te winic ini ac'ot ta c'abal ta scuenta te bin schapoj Dios soc te hich nahil sna'oj, te ta scuenta chopol winiquetic la atsaquic soc la amilic ta cruz.

²⁴Pero cha'cuxajtesot yu'un te Diose, la scoltay loq'uel ta sc'uxul lajel, como ma ba hu' ta chuquel yu'un.

²⁵Como hich la yal te David: La jquil te spisil ora ay ta jtojol te Cajwaltique; te bin ut'il ay ta jwa'el-c'ab, hich ma ba ya xpuch'on.

²⁶Ha scuentahil te ay yutsil co'tan soc tse'el co'tan ya xc'ayojinon; soc ha nix hich te jbaq'uetal ay smuc'ul yo'tan yu'un te bin yac jmahlibel,

²⁷como ma ba yac awac' hiluc ta muquenal te jch'uhlel, soc ma ba yac awac' c'a'uc sbaq'uetal te Mach'a ch'ultesbil awu'une.

²⁸La awa'bonix quil te sbehlal cuxlejal; yac awa'bon stse'elil co'tan ta atojol, xchi.

²⁹Quermanotac, jamal ya calbeyex te cham te jtatic David soc la yich' muquel, soc li' ay te smuquenal c'alal ora.

³⁰Pero te bin ut'il ha jalwanej, sna'oj te halbil ta jamal yu'un Dios te ay sts'umbal te ya xhuhcaj ta shuctajib.

³¹Te bin ut'il nahil la yil, hich la yalbe sc'oblal te ya xcha'cuxaj te Cristo, te ma ba ya x'ihquitayot hilel ta muquenal te sch'uhlel soc te ma x'ac'ot c'a'uc te sbaq'uetale.

³²Ha te Jesús te cha'cuxajtesot yu'un Dios, jpisilcotic testigohotic yu'un.

³³Ha yu'un, te bin ut'il ac'otix ta swa'el-c'ab te Dios soc a'botix yich' yu'un te Tatil te Ch'ul Espíritu te halbot sc'oblal ya yich', hich la yaq'uix tal te bin yac awilbelic soc te yac awa'iybelique.

³⁴Como te David ma ha'uc mo bahel ta ch'ulchan, pero ha nix la yal: Te Cajwaltic la yalbe te Cajwal: Huclan ta jwa'el-c'ab,

³⁵ha to c'alal ya ca'bat atec'tajibin acontratac, xchi.

³⁶Spisil Israel, na'ahic me ta mero melel: Te Jesús te la amilic ta cruz, Dios la yac' te ha Ajwalil soc ha Cristo c'oht, xchi te Pedro.

³⁷C'alal hich la ya'iyic, toj smelbel yo'tanic yu'un; hich la sjoc'obeyic te Pedro soc te yantic jpuc-c'opetic: Quermanotac, ¿bin ya sc'an ya jpascotic? xchihic.

³⁸Halbotic yu'un te Pedro: Suhtesa awo'tanic yu'un amulic soc ac'a abahic ta a'beyel awich'ic ha' ta tuhlutuhl ta scuenta sbihil te Jesucristo scuenta yu'un hich ya spasbeyex perdón yu'un te amulique; amahtanic yac awich'ic te Ch'ul Espíritu,

³⁹como te bin yaloj ta jamal te Diose, ha awu'unic soc ha yu'un te awal-anich'nabic soc spisil mach'atic namal ayic, ha te mach'atic ya x'ic'otic yu'un te Diose, xchi.

⁴⁰Bayel to xan bintic halbotic yu'un soc tsitsotic yu'un, hich la yal: Coltaya loq'uel abahic ta yohlil te chopol jcaj ts'umbalil ini, xchi.

⁴¹Te mach'a la sch'uhumbeyic te sc'ope, ac'ticlambot yich'ic ha'; ta hich ora ay wan p'ohl lajunwinic swaxacbahc' (3,000) ta tuhl.

⁴²La yo'tantayic snopel te p'ijubtesel yu'un te jpuc-c'opetic, soc la yo'tantayic te la sjoquin sbahic, soc ta xet'el te pan soc ta sc'oponel Dios.

⁴³Spisilic xiw yo'tanic yu'un, soc bayel jchahp a'teliletic soc señahiletic la spasic te jpuc-c'opetique.

⁴⁴Spisil mach'atic la sch'uhunic junax la yac' sbahic soc junax sbiluquic.

⁴⁵La schon sq'uinalic soc sbiluquic, la spucticlanic ha chican bin a te ya xtuhun yu'unic ta jujutuhl.

⁴⁶Jujun c'ahc'al la sjoquin sbahic ta Templo, la xeht'ic pan ta snahic, soc la sjoquin sbahic ta we'el soc yutsil yo'tanic soc ta spisil yo'tanic,

⁴⁷la yalbeyic yutsilal te Diose, soc lec sc'oblalic yu'un spisil yantic. Te Cajwaltic jujun c'ahc'al la yic'ticlan tal ta iglesia te mach'atic ya xcolique.