Read Tzeltal Hechos 25 Bible Online

Hechos 25 - Tzeltal bible

Hechos 25

¹C'alal c'oht te Festo ta sq'uinal Cesarea, oxeb c'ahc'al ta patil mo bahel ta Jerusalén.

²Te principal sacerdotehetic soc te mach'atic ich'bilic ta muc' yu'un te judíohetic, c'oht slehbeyic smul te Pablo ta stojol.

³La yalbeyic wocol te yacuc sticon ta iq'uel tal ta Jerusalén te Pablo, yu'un schapoj sc'opic te ya smilic ta be.

⁴Pero la yal te Festo te ay ta cárcel ta Cesarea te Pablo, soc te nopol ya xbaht tey a. Soc hich la yal:

⁵Ha yu'un te mach'atic yich'oj ya'tel ta awohlilic ac'a sjoquinonic bahel; teme ay smul te winique, ac'a yalic tey a, xchi.

⁶Ay wan waxaqueb c'ahc'al o lajuneb c'ahc'al te halaj xan tey a, patil baht ta Cesarea. Ta schebal c'ahc'al la shuhcan sba ta chahpajibal soc la sticon ta iq'uel tal te Pablo.

⁷C'alal tal te Pablo, te judíohetic talemic ta Jerusalén la sjoytayic, bayel la slehbeyic smul, pero ma ba hu' yu'unic yaq'uel ta ilel teme melele.

⁸Hich la yal te Pablo ta scoltayel sba: Mayuc jtahoj jmul ta stojol te Ley yu'un te judíohetic, o ta stojol te Templo o te César, xchi.

⁹Pero te Festo yo'tan spasbe te bin lec yo'tanic yu'un te judíohetic, ha yu'un la sjoc'obe te Pablo: ¿Ya bal ac'an ya xmohat bahel ta Jerusalén yu'un tey yac awich' chahpanel ta jtojol a? xchi.

¹⁰La yal te Pablo: Ayonix ta chahpanel yu'un César ta banti ya sc'an ya quich' chahpanel. Ana'oj ta lec te mayuc bin chopol la jpasbe te judíohetique.

¹¹Teme ay bin chopol jpasoj te bin scuenta lajel, ma ba ya cal te ma ba ya xlajon yu'un; yan teme mayuc hich jpasoj te bin ya yalbonic, mayuc mach'a ya xhu' ya yac'on ta sc'abic. Ha ya jc'an ya schahpanon te César, xchi.

¹²Ha yu'un te Festo, c'alal la yich'be sc'op te yantic te yich'oj ya'telic soc, hich la yal: La ac'an ya schahpanat te César, ta stojol César ya xbahat, xchi.

¹³Cheb oxeb c'ahc'al ta patil, talic ta Cesarea te ajwalil Agripa soc Berenice yu'un ya spatbeyic yo'tan te Festo.

¹⁴Te bin ut'il bayel c'ahc'al halajic tey a, te Festo la yalbe te ajwalil te bin ut'il ay sc'oblal te Pablo, hich la yal: Ay jtuhl winic hil ta chuquel yu'un te Félix;

¹⁵c'alal c'ohon ta Jerusalén, te principal sacerdotehetic soc te mamaletic yu'un te judíohetic la yalbeyic smul soc la sc'ambeyic slajel.

¹⁶La jcalbeyic te ma hichuc ya spasic te romanohetic te ya yaq'uic ta milel, teme ma nahiluc ya sitin sba ta c'op soc te ya xhu' ya scoltay sba yu'un te smul lehbote.

¹⁷Ha yu'un c'alal hulon tal soc li'i, ma ba la jc'ases bayel c'ahc'al, ta schebal c'ahc'al la juhcan jba ta schahpanel soc la jticon ta iq'uel tal te winique.

¹⁸Pero te c'alal la stehc'an sbahic te jle-muliletic, ma hichuc mulil la yalic te bin ut'il jcuyoj ya yalique.

¹⁹Ha nax smul c'ohem yu'unic te bintic sch'uhunej soc sc'oblal Jesús te laj, pero la yal te Pablo te cuxule.

²⁰Ma la jna' bin ut'il ya jchahpan te c'opetic ini; ha yu'un la joc'obe teme ya sc'an ya xbaht ta Jerusalén yu'un tey ya yich' chahpanel a.

²¹Pero la sc'ambon te Pablo te ha'uc ya xchahpanot yu'un te ajwalil yu'un Roma. Ha yu'un la jcal mandar te ya yich' canantayel ha to c'alal ya jticon bahel ta stojol César, xchi.

²²Ha yu'un te Agripa la yalbe te Festo: Ha nix hichon ya jc'an ya ca'iybe sc'op te winique, xchi. Pajel yac awa'iybe sc'op, xchi te Festo.

²³Ta schebal c'ahc'al tal te Agripa soc Berenice, buen ich'bilic ta muc' a ochic talel ta muc'ul tsahl na soc te comandantehetic soc principaletic yu'un te pueblo. Ta scuenta smandar te Festo ic'ot tal te Pablo.

²⁴Hich la yal te Festo: Ajwalil Agripa, soc apisilic te li' joquinej jbahtic, li' ay te winic yac awilic, spisil te judíohetic la sc'ambonic ta Jerusalén soc li'i, xjuyetic ta aw te ma ba ya xcuxajix.

²⁵Pero te ho'one mayuc smul la jtahbe te ya xhu' ya xlaj yu'un, soc ha nix yaloj te ya sc'an ya xbaht ta stojol te ajwalil yu'un Roma, ha yu'un la jnop te ya jticon bahel ta stojol.

²⁶Te bin ut'il ma xweht cu'un bin ya calbe bahel ta hun te ajwalil cu'un, hich la jquic' tal ta atojolic, soc nix ta atojol, ajwalilat Agripa, scuenta yu'un teme yac ajoc'obe ta lec hich me ya xweht bin ya jts'ihbay.

²⁷Como ma hichuc ya ca'iy te ya jticon bahel jchuquel teme ma ba ya cal bahel te bin a'bibil smulin, xchi.