Read Tzeltal Hechos 8 Bible Online

Hechos 8 - Tzeltal bible

Hechos 8

¹Te Saulo lec la ya'iy te la yich' milel te Esteban. Ta hich ora hahch bayel uts'inel ta stojol te iglesia te ay ta Jerusalén; spisilic puhquic bahel ta sq'uinal Judea soc Samaria, stuquel xanix hil te jpuc-c'opetique.

²Ay mach'atic jun yo'tan sch'uhunejic Dios te la yich'beyic bahel sbaq'uetal yu'un ya smuquic te Esteban; bayel la yoq'uetayic.

³Yan te Saulo yac yuts'imbel te iglesia; la yochintay ta jujun na, la stsacticlan loq'uel tal antsetic winiquetic soc la yac'ticlan ta cárcel.

⁴Pero te mach'atic puhquic bahel la yalic te lec yach'il c'op ta bayuc banti bahtic.

⁵Hich te Felipe co bahel ta Samaria, la yalbe ya'iyic sc'oblal te Cristo.

⁶Te ants-winiquetic, c'alal la yilic te señahiletic te la spas te Felipe, soc spisil yo'tanic la ya'iyic te bintic la yal,

⁷como tsobol te mach'atic ay bohl espírituhetic ta yo'tanic tulan yac ta aw a loq'uic ta yo'tanic; soc lecubic tsobol mach'atic chamen schihalic soc coxo'etic.

⁸Hich ay bayel tse'el-o'tanil ta pueblo tey a.

⁹Pero ay jtuhl winic, Simón sbihil, te ya'telinej spasel seña tey ta pueblo soc slo'loyejix te ants-winiquetic ta Samaria, yu'un la scuy sba ta muc' sc'oblal.

¹⁰Spisilic yac ya'iybelic sc'op, muc' biq'uitetic, hich la yalic: Ha te smuc'ul yu'el Dios ini, xchihic.

¹¹La sts'ehchiquintayic, yu'un ayix ora te lo'loybil yo'tanic yu'un te señahiletic la spase.

¹²Pero te c'alal la sch'uhumbeyic sc'op te Felipe, te la smelbe ya'iyic te lec yach'il c'op yu'un te cuentahinel yu'un Dios soc te sbihil te Jesucristo, la yich'ic ha' winiquetic soc antsetic.

¹³Ha nix hich te Simón la sch'uhun soc a'bot yich' ha', soc spisil ora la sjoquin te Felipe; xcham yo'tan yu'un te jchahp a'teliletic soc señahiletic te yac spasticlambel te Felipe.

¹⁴C'alal la ya'iyic te jpuc-c'opetic te ayic ta Jerusalén te la sch'uhuniquix te sc'op Dios te mach'atic ayic ta Samaria, la sticonic bahel te Pedro soc Juan.

¹⁵C'alal c'ohtic tey a la sc'opombeyic Dios te yacuc yich'ic te Ch'ul Espíritu,

¹⁶como ma to ba cohem tal ta stojolic; ha nax yich'ojic ha' ta scuenta sbihil Jesús.

¹⁷Ha yu'un te Pedro soc Juan la scajambe sc'abic ta sjolic, hich la yich'ic te Ch'ul Espíritu.

¹⁸C'alal la yil te Simón te ta scuenta scajambeyel sc'abic te jpuc-c'opetic te hich a'bot yich'ic te Ch'ul Espíritu, c'an ya'be taq'uin yu'un,

¹⁹hich la yal: A'bon cu'el ec, scuenta yu'un teme ay mach'a ya jcajambe jc'ab ta sjol ya me yich' te Ch'ul Espíritu, xchi.

²⁰Hich halbot yu'un te Pedro: ¡Pajal lajan soc te ataq'uine, yu'un la acuy te ay ta manel ta taq'uin te mahtanil yu'un Dios!

²¹Mayuc awa'tel ta spasel ini soc ma acuentahuc, como ma tojuc awo'tan ta stojol Dios.

²²Suhtesa awo'tan yu'un achopolil, c'ambeya Dios te yacuc spasbat perdón yu'un bin anopoj ta awo'tan,

²³yu'un ya quil te xut'xon q'uinal yac awa'iy soc schucojat te bin chopol, la yut.

²⁴La sjac' te Simón: C'opombonic Cajwaltic te manchuc ya xc'oht ta jcuenta te bin la awalique, xchi.

²⁵C'alal laj yo'tanic ta yalel testigo-c'op soc ta yalel te sc'op Dios, suhtic bahel ta Jerusalén te Pedro soc Juan, ay tsobol pueblohetic yu'un Samaria banti la yalic te lec yach'il c'ope.

²⁶Ay jtuhl ch'ul a'bat yu'un Cajwaltic te hich la yalbe te Felipe: Hahchan, bahan ta stojol sur ta be te ya xloc' tal ta Jerusalén soc ya xco bahel ta Gaza, ha te ya xc'ax ta jochol taquin q'uinal, xchi.

²⁷Hich hahch bahel te Felipe. Yac ta behel a, la sta sba soc jtuhl eunuco-winic talem ta Etiopía, yich'oj tulan ya'tel ta scuentahimbeyel spisil sc'uhlejal te Candace te ajwalil-ants yu'un Etiopía, soc talem ta Jerusalén ta sch'uhuntayel Dios.

²⁸Yac ta suhtel bahel hucul ta scarreta, yac yilbel te shun jalwanej Isaías.

²⁹Te Ch'ul Espíritu la yalbe te Felipe: Nohpojan bahel ta carreta, joquina bahel, xchi.

³⁰Hich te Felipe ahnimal c'oht sta te carreta; la ya'iy yac ta yilel te shun jalwanej Isaías, hich la sjoc'obe: ¿Ya bal ana'be scuentahil te bin yac awilbel? xchi.

³¹¿Bin ut'il c'an jna'be scuentahil, ha to te ayuc mach'a ya ya'bon jnop? xchi. Hich la yalbe wocol te Felipe te yacuc xmo soc ya shuhcan sba soc.

³²Te bin yac ta yilel ta Shun Dios hich ay: Hich ic'ot bahel te bin ut'il tuminchij ya x'ic'ot bahel ta milel; soc hich bin ut'il jcolel tuminchij te ya x'uma'ub ta stojol te mach'a ya sloq'uesbe stsotsel, ha nix hich ma ba la sjam ye.

³³La yich' pehc'anel, ma stojiluc chahpanot. ¿Mach'a c'an yalbe sc'oblal sts'umbal? como lajimbot scuxlejal ta q'uinal, xchi.

³⁴Te eunuco-winic la sjoc'obe te Felipe: Awocoluc, halbon ca'iy, ¿mach'a hich sc'oblal la yalbe te jalwanej, ha ni bal sc'oblal o yan bal mach'a sc'oblal a? xchi.

³⁵Hich te Felipe, tey nix ta sc'op Dios hahch yalbe ya'iy te lec yach'il c'op yu'un Jesús.

³⁶Yacalic ta behel bahel ta be a, la stahic ha', la yal te eunuco-winic: Ay ha' li'i, ¿bin ya smacon teme ya quich' ha'e? xchi.

³⁷La sjac' te Felipe: Teme spisil awo'tan yac ach'uhun, ya xhu', xchi. Ya jch'uhun te ha Snich'an Dios te Jesucristo, xchi te eunuco-winique.[3]

³⁸Hich la yac' ta comel ta behel te carreta, co bahel schebalic ta ha', te Felipe la ya'be yich' ha' te eunuco-winique.

³⁹C'alal loq'uic tal ta ha', te Espíritu yu'un Cajwaltic ora la yic' bahel te Felipe, te eunuco-winic ma ba la yilbeyix xan sit; tse'el yo'tan behen bahel.

⁴⁰Yan te Felipe chicnaj ta Azoto; c'ax bahel ta pueblohetic ta yalel te lec yach'il c'op, ha to c'alal c'oht ta Cesarea.