Read Tzeltal Romanos 1 Bible Online

Romanos 1 - Tzeltal bible

Romanos 1

¹Pablo, a'bat yu'un Jesucristo, ic'bil ta jpuc-c'op soc tsahbil yu'un yalel te lec yach'il c'op yu'un Dios,

²te ha yaloj ta nahil ta Sch'ul Hun ta scuenta te jalwanejetic yu'une:

³ha te lec yach'il c'op la yalbe sc'oblal te Snich'an, ha te Cajwaltic Jesucristo, te ha sts'umbal David ta scuenta ch'ich'-baq'uet,

⁴soc ta scuenta te Ch'ul Espíritu halot ta jamal te ha Snich'an Dios te ay yu'el, ta scuenta te cha'cuxaj tal ta yohlil mach'atic chamenic.

⁵Ha ta scuenta te Jesucristo te quich'ojcotic yutsil-o'tanil soc a'tel ta jpuc-c'op scuenta yu'un hich ya sch'uhunic Dios a te mach'atic ayic ta spisil nacionetic, ta scuenta yich'el ta muc' te sbihile.

⁶Ha nix hichex ic'bilex scuenta yu'un ha me yu'unex Jesucristo ya xc'ohex.

⁷Ya jpatbeyex awo'tanic ta apisilic te ayex ta Roma, te c'uxex ta yo'tan Dios soc te ic'bilex yu'un ch'ultesbil ya xc'ohex: Yutsil-o'tanil soc lamaluc me q'uinal yac awa'iyic yu'un te Jtatic Dios soc te Cajwaltic Jesucristo.

⁸Ha nahil, ta scuenta te Jesucristo, ya calbe wocol te Dios cu'un ta acuentahic apisilic, yu'un puhquemix ta halel ta swohlol bahlumilal te ay sch'uhunel awo'tanique.

⁹Te Dios, te spisil co'tan ayon ta a'batinel yu'un ta yalel te lec yach'il c'op yu'un te Snich'an, ha testigo cu'un te spisil ora yac jna'belex te c'alal ya jc'opon Dios;

¹⁰ha ya calbe wocol te ayuc bin ut'il ya xhu' ya xbohon ta banti ayex teme hich ya sc'an yo'tan,

¹¹yu'un co'tanuc ya quilex scuenta yu'un ya ca'beyex awich'ic mahtanil yu'un te Espíritu, scuenta yu'un hich ya yich' xan yip awo'tanic a,

¹²ha abi, te pajal ya yich' yip co'tantic te bin ut'il pajal ay sch'uhunel co'tantique.

¹³Quermanotac, ya ca'beyex ana'ic te bayel buelta c'an tal quilex scuenta yu'un ya jtsobe sit ta awohlilic, hich te bin ut'il ta stojol te yantic jyanlumetic, pero ay bin smacojon c'alal ora.

¹⁴Ay jbet yu'un te griegohetic soc te mach'atic ma griegohuc, te mach'atic p'ij yo'tanic soc te mach'atic ma p'ijuc yo'tanic.

¹⁵Ha scuentahil te ay yip co'tan te ha nix hich ya xtal calbeyex te lec yach'il c'op ha'ex te ayex ta Roma.

¹⁶Ma xq'uexawon yu'un te lec yach'il c'op, como ha yu'el Dios yu'un ya xcolic spisil mach'atic ya sch'uhunic, ha nahil te judío soc ha nix hich te griego,

¹⁷como ya xchicnaj ta lec yach'il c'op te stojil ya'tel te Dios, te ha ya xchicnaj ta scuenta sch'uhunel-o'tanil c'alal shahchibal c'alal slajibal, hich te bin ut'il ts'ihbabil: Te mach'a toj yo'tan, ha ya xcuxaj ta scuenta sch'uhunel yo'tan, te xchihe.

¹⁸Ya xchicnaj c'alal ta ch'ulchan te yilimba Dios ta stojol spisil mach'atic ma xyich'ic ta muc' te Dios soc te bintic chopol ya spasic, te ha ta scuenta schopol a'telic ya scomic te bin smelelil,

¹⁹como ya xhu' yu'unic sna'el te bintic ay ta na'el sc'oblal Dios, como Dios nix yac'oj ta na'el.

²⁰Como ta shahchel to bahlumilal, te bintic ay yu'un Dios te ma chicanuc ta ilel, ha te yu'el te sbahtel q'uinal ay soc te bin ut'il stalel Dios stuquel, jamal chican ta ilel ta scuenta te bintic spasoj, hich ma xweht bin ya smac sbahic ta c'op a.

²¹Aunque la sna'beyic sba te Diose, ma ba la yich'ic ta muc' te bin ut'il ha Dios soc ma ba la yalbeyic wocol, pero bohlob spensaric soc ihc'ub te sonso yo'tanique.

²²P'ijic ta sc'opic, pero sonso c'ohtic.

²³Te yutsilal Dios te ma xlaj la sjelic ta sloc'omba winic te ya xlaj, soc ta sloc'omba mutetic, chambahlametic soc chanetic.

²⁴Ha scuentahil te ihquitayotic yu'un Dios ta spasel bintic chopol ya snop ta yo'tanic, hich la sbohlobtes sbaq'uetalic a.

²⁵La sjelic ta lotil te bin smelelil yu'un Dios, la sch'uhuntayic soc la yac' sbahic ta a'batinel yu'un te bintic pasticlambil, ma ha'uc yu'un te Jpaswanej, te ay ta ich'el ta muc' sbahtel q'uinal stuquel. Hichuc.

²⁶Ha scuentahil te ihquitayotic yu'un Dios ta spasel te bin ya sc'an yo'tanic te q'uexlaltic sba ta pasel. Te antsetic yu'unic la syanijtesic te stalelic te bin ut'il ya sjoquin sba soc winic.

²⁷Ha nix hich te winiquetic, la yihquitayic bin ut'il ay stalel te ya sjoquin sbahic soc ants, talel c'axel la smulan sbahic. Q'uexlaltic sba te bin la spasbe sbahic te pajal winiquetic, hich la yich'ic te castigo yu'un te showiyemalique.

²⁸Ta scaj te bin ut'il ma ba la sc'an la sna'beyic sba te Diose, hich ac'otic yu'un Dios te ya xbohlob spensaric, yu'un ya spasic te bin ma hichuc ya sc'an pasele.

²⁹Nojel ta yo'tanic spisil ta chahp te bintic ma stojiluc ta pasel, te bin chopol, bic'tal-o'tanil, bohlobel, nojel ta ti'ti'o'tantaywanej, milaw, hach-c'op, lo'loywanej, le-mulil;

³⁰jwulwul-c'opetic, jp'aj-diosetic, jc'ahc'al-c'opetic, jtoybahetic, jtoybac'opetic, jnop-muliletic, jc'axun-c'opetic,

³¹sonsohetic, ma sc'ohtes ta pasel bin ya yalic, mayuc sc'uxul yo'tanic, mayuc mach'a ya sna'be yo'bolil sba.

³²Aunque sna'ojic te yaloj ta jamal te Dios te ya x'ac'otic ta lajel yu'un te mach'atic hich ya spasic, ma ha'uc nax ya spasic, ha lec yo'tanic yu'un te mach'atic hich ya spasique.