Read Tzeltal Romanos 10 Bible Online

Romanos 10 - Tzeltal bible

Romanos 10

¹Quermanotac, te bin ya sc'an co'tan soc te yacon ta sc'oponel Dios yu'un, ha te yacuc xcol te Israel.

²Ho'on testigohon yu'unic te bin ut'il ay yip yo'tanic ta sch'uhunel Dios, pero ma hichuc te bin ut'il ay te bin smelelil ay ta na'ele.

³Ma ba sna'ojic bin ut'il Dios ya yac' te toj ayic, ha la slehic bin ut'il ya stahic stuquelic, hich ma ba la yac' yo'tanic a te bin ut'il Dios ya yac' te toj ayic,

⁴como te Cristo la slajimbe sc'oblal te Ley, scuenta yu'un toj ya xc'ohtic ta stojol Dios spisil te mach'atic ya sch'uhunique.

⁵Te Moisés hich la sts'ihbabe sc'oblal te bin ut'il toj ya xc'ohtic ta scuenta te Ley: Te mach'a hich ya spasticlan, hich ya xcuxaj yu'un, xchi.

⁶Pero sc'oblal te toj ya xc'ohtic ta scuenta sch'uhunel-o'tanil, hich ya yal: Ma me xawal ta awo'tan: ¿Mach'a ya xmo bahel ta ch'ulchan? (yu'un ya yic' cohel tal te Cristo),

⁷o: ¿Mach'a ya xco bahel ta xahab? (yu'un ya yic' mohel tal te Cristo ta yohlil mach'atic chamenic), xchi.

⁸Pero ¿bin ya yal? Hich ya yal: Nopol ay ta atojol te c'ope, ay ta awe soc ay ta awo'tan, xchi. Ha te c'op scuenta sch'uhunel-o'tanil ini te yacotcotic ta yalele:

⁹Teme jamal yac awal ta awe te ha Cajwaltic te Jesús soc teme ya sch'uhun awo'tan te Dios la scha'cuxajtes tal ta yohlil mach'atic chamenic, ya me xcolat yu'un,

¹⁰como ta awo'tan yac ach'uhun, hich toj ya xc'ohat, soc yac awal ta jamal ta awe, hich ya xcolat.

¹¹Hich ya yal te Shun Diose: Spisil mach'a ya sch'uhun, ma ba ya sta q'uexlal yu'un, xchi,

¹²como junax sc'oblalic te judíohetic soc te griegohetic, jtuhl nax te Ajwalil yu'unic, soc ha ya ya'be bayel bendición spisil mach'atic ya yalbeyic wocol,

¹³como spisil te mach'atic ya yalbeyic wocol ta scuenta sbihil te Cajwaltic, ya me xcolic, xchi.

¹⁴Pero ¿bin ut'il c'an yalbeyic wocol ta stojol teme ma ba sch'uhunejique? Soc ¿bin ut'il c'an sch'uhunic teme mayuc ya'iybeyejic sc'oblal? Soc ¿bin ut'il c'an ya'iybeyic sc'oblal teme mayuc mach'a ya xhalbotic sc'oblal yu'une?

¹⁵Soc ¿bin ut'il c'an yalbe sc'oblal teme mayuc mach'a ticombil? Hich te bin ut'il ts'ihbabil: ¡C'ax t'ujbil te yoquic te mach'atic ya yalbe sc'oblal te lamal q'uinal, te ya yalbeyic sc'oblal te lec yach'il c'ope! xchi.

¹⁶Pero ma spisiluc la yich'ic ta cuenta te lec yach'il c'op, hich la yal te Isaías: Cajwal, ¿mach'a la sch'uhumbotcotic te bin la jcalcotic? xchi.

¹⁷Ha yu'un ya xtal te sch'uhunel-o'tanil ta scuenta ya'iyel te c'ope, soc te bin ay ta a'iyel ya xtal ta scuenta te sc'op te Cristo.[2]

¹⁸Pero ya cal: ¿Yu'un bal ma ba la ya'iyic? xchihon. Ya'iyejic ta melel: Puhquem ta spahmal bahlumilal te c'op yu'unic, c'alal ta sti'il bahlumilal c'oht te sc'opique, xchi.

¹⁹Soc hich ya cal xan: ¿Yu'un bal ma ba la sna'beyic scuentahil te Israel? xchihon. Ha nahil hich la yal te Moisés: Ya cac' hahchuc awo'tanic ta scuenta mach'atic ma nacionuc; ya cac' ilinuquex ta scuenta jun nación te mayuc bin ya sna', xchi.

²⁰Soc tulan sc'oblal la yal te Isaías: La stahonic te mach'atic ma ba la slehonic, la jcac' sna'bonic jba te mach'atic ma ba la sjoc'oyonic, xchi.

²¹Yan te Israel, hich la yalbe sc'oblalic: Sjunal c'ahc'al la hach jc'ab ta stojol te pueblo te ya sc'axuntay c'op soc te ya stoy sba, xchi.