Read Tzeltal Romanos 12 Bible Online

Romanos 12 - Tzeltal bible

Romanos 12

¹Ha yu'un, quermanotac, ya calbeyex wocol ta scuenta te sc'uxul yo'tan Dios te yacuc awac' abaq'uetalic scuenta cuxul chic'bil mahtanil, te ch'ultesbil soc te lec yo'tan Dios yu'un, te hich ya sc'an ch'uhuntayel awu'unic te Diose.

²Ma me xapajbeyic stalel te bahlumilal, yanuc awilelic ta scuenta yach'ubtesel te snopojibal awu'unic, scuenta yu'un hich yac ana'ic a te bin ya sc'an yo'tan te Dios, te ha ay yutsil soc te c'ax leque.

³Ta scuenta te bin a'bilon yu'un Dios, ya calbeyex ta apisilic te ma me c'ax hich muc' yac acuy abahic a te bin ut'il ya sc'ane, yich'ojuc me scuentahil te yac ap'is abahic, ha chican hich smuc'ul sch'uhunel awo'tan a'botex yu'un Dios ta jujutuhlex.

⁴Hich te bin ut'il ay bayel ta chahp te ay ta jbaq'uetaltic, pero ma junuc nax ya'telic ta spisilic,

⁵ha nix hichotic, aunque tsobolotic, junax jbaq'uetaltic ta scuenta Cristo, junax c'ohemotic.

⁶Ha yu'un ay chahpalchahp mahtaniletic cu'untic, ha chican bin a'bibilotic yu'un Dios: te mach'a ha smahtan yalel sc'op-jalwanej, pasa chican hich smuc'ul sch'uhunel yo'tan;

⁷teme a'batinel, ac'a yac' sba ta a'batinel; te mach'a ya xp'ijubteswan, ac'a ya'iy p'ijubteswanej;

⁸te mach'a ya yac' yip-o'tanil, ac'a yac' yip o'tanil; te mach'a ya xmahtanteswan, junuc me yo'tan ac'a yac'; te mach'a ya xtsobawan, spisiluc me yo'tan ac'a spas; te mach'a ya ya'iy c'uxultaywanej, tse'eluc me yo'tan ac'a spas.

⁹Ma me babac'opuc te sc'uxul awo'tanic. Ihlayahic te bin chopol, t'una me te bin leque.

¹⁰Talel c'axel c'ux me xawa'iy abahic te bin ut'il awermano abahic; talel c'axel me xawich' abahic ta muc'.

¹¹O'tantaya spasel te bin ya sc'an pasel, ma me xch'ajubex; ayuc yip awo'tanic ta a'batinel ta stojol te Cajwaltique.

¹²Tse'eluc awo'tanic ta smahliyel, cuhchuc me awu'unic wocol, ma me xquehchajex ta sc'oponel Dios.

¹³A'beyahic bin ya xtuhun yu'un te mach'atic ch'uhltesbilic; ic'ahic ochel ta ana te mach'atic yan banti talemic.

¹⁴Halbeyahic lec sc'oblal te mach'atic ya yuts'inex; halbeyahic lec sc'oblal, ma me xabohlobtesbeyic sc'oblal.

¹⁵Tse'eluc me awo'tanic soc te mach'atic tse'el yo'tanic; oc'anic me soc te mach'atic ya x'oq'uic.

¹⁶Junuc me awo'tan abahic. Ma me xatoy abahic, joquinahic te mach'atic peq'uel ayique. Ma me p'ijuc xacuy abahic.

¹⁷Ma me xasutbeyic ta bin chopol te mach'a chopol bin ya spasbeyex; pasahic te bin lec ta stojol spisil ants-winiquetic.

¹⁸Ta ban c'alal ya xhu' awu'unic, lamaluc me awo'tanic soc spisil ants-winiquetic.

¹⁹Quermanotac te c'uxex ta co'tan, ma me xapac ac'abalic, ac'a a'tejuc te yilimba Dios, como hich ts'ihbabil: Ho'on cu'un suhtesbeyel spacol; ho'on ya ca'be stoj, xchi te Cajwaltique.

²⁰Ha yu'un teme ay swi'nal te acontra, a'beya swe'el; teme taquin yo'tan, a'beya bin ya yuch', como teme hich yac apase, sjel ta yac abusambe c'ahc'al ac'al ta sjol.

²¹Ma me xawac' stsalat te bin chopol, ha'at me xatsal ta bin lec te bin ma lecuque.