Read Tzeltal Romanos 13 Bible Online

Romanos 13 - Tzeltal bible

Romanos 13

¹Spisilic ac'a yac' sbahic ta cuentahinel yu'un te mach'atic muc' ya'telic, como mayuc mach'atic yich'oj ya'telic te ma ha'uc a'bibilic yu'un Dios.

²Ha yu'un te mach'a ya scontrahin te mach'a ay ya'tel, ha ya scontrahin te bin chahpambil yu'un Dios. Te mach'atic hich ya scontrahinic, ha nix yac slehbel ya'iyic castigo.

³Como te mach'atic ay ya'telic ma yu'unuc ya ya'be xiwel te mach'atic lec bin ya spasic, ha nax te mach'atic chopol bin ya spasique. Teme yac ac'an te ma ba yac axi' te mach'a ay ya'tel, pasa te bin lec, hich ya xhalbotat lec ac'oblal yu'un,

⁴como ha a'bat yu'un Dios yu'un hich lec ya xc'ohat a. Yan teme yac apas te bin chopol, xiwan me yu'un, como ma tojoluc yich'oj te espada, como ha a'bat yu'un Dios, ha ya ya'be castigo te mach'a chopol bin ya spase.

⁵Ha scuentahil te ya sc'an te ya cac' jbahtic ta cuentahinel yu'un, ma ha'uc nax yu'un te ya yac' castigo, pero ha ta scuenta te hich ya yalbat te awo'tane.

⁶Ha scuentahil te yac atoj apatanic, como ha a'batetic yu'un Dios te spisil ora ya xcuentahinwan.

⁷Tojahic me spisil teme ay mach'atic ay abetic yu'un: teme ha patanil, a'beyahic; teme ha spatanil biluc, a'beyahic; te mach'a ay ta ich'el ta cuenta, ich'ahic me ta cuenta; te mach'a ay ta ich'el ta muc', ich'ahic me ta muc'.

⁸Ma me ayuc mach'a ay abetic yu'un, ha nax me abetic te c'ux yac awa'iy abahique, como te mach'a c'ux ya ya'iy ta yo'tan te spat-xuhc, hich hu'em yu'un spasel te bin ya yal te Ley,

⁹como hich ya yal: Ma me xawa'iy antsiwej soc ma me xawac' aba ta antsinel, ma me xawa'iy milaw, ma me xawa'iy elec', ma me xbic'taj awo'tan, xchi, soc te yantic mandariletic, junax sc'oblalic: C'ux me xawa'iy ta awo'tan apat-axuhc, hich te bin ut'il c'ux yac awa'iy aba te ha'ate, xchi.

¹⁰Te sc'uxul-o'tanil ma ba ya spasbe te bin chopol te spat-xuhc; ha yu'un te sc'ohtesel ta pasel te Ley, ha te sc'uxul-o'tanile.

¹¹Ya sc'an te hich ya jpastic, te bin ut'il jna'ojtic bin c'ahc'alil ayotic ini, ha te bin ut'il yorahilix te ya jwic' jsitic te wayalotic, como nopol xan ay te jcoleltic te bin ut'il c'alal hahch jch'uhuntique.

¹²C'uhbenix ahc'abal, nopol ya sacub te q'uinale. Ha yu'un ac'a jch'aytic hilel te bin scuenta te yihc'al q'uinal, ha ac'a jchahpan jbahtic soc te a'tejibaletic yu'un te sacal q'uinale.

¹³Lecuc me ac'a ayinucotic ta q'uinal, hich te bin ut'il ya sc'an ta c'ahc'alel; ma me ha'uc ya xbaht ta co'tantic puro we'el soc yacubel, ma me xca'iytic antsiwej soc ma me xawac' abahic ta antsinel, ma me xca'iytic chijil-o'tanil, ma me xca'iytic hach-c'op soc ti'ti'o'tantaywanej.

¹⁴Ha me xawac' yu'untayex te Cajwaltic Jesucristo, ma me xanopic spasel mulil te ya smulan spasel te abaq'uetalique.