Read Tzeltal Romanos 14 Bible Online

Romanos 14 - Tzeltal bible

Romanos 14

¹Ic'ahic me te mach'atic mayuc yip sch'uhunel yo'tanic, pero ma yu'unuc te yac atijic ta c'op yu'un te bintic ay ta nopel ta o'tanil.

²Yu'un ay mach'a sch'uhunej te lec ta we'el spisil we'elil; yan te mach'a mayuc yip yo'tan, itaj nax ya swe'.

³Te mach'a ya swe' spisil, ma me sp'aj te mach'a ma ba ya swe'e. Ha nix hich te mach'a ma ba ya swe' spisil, ma me xyich'o-c'optay te mach'a ya swe' spisil, como ic'bil yu'un Dios.

⁴¿Mach'a yac acuy aba a te yac awalbe smul te ya'bat te yane? Ha chican stuquel te yajwal teme lec ya yil o teme ma lecuc ya yil te ya'bate. Lec ya xc'oht, como ay yu'el te Cajwaltic te ya yac' te lec ya xc'oht yu'une.

⁵Ay mach'a ay sc'oblal te jun c'ahc'al yu'un te yantic c'ahc'aletic; ay mach'a te pajal sc'oblal ta yo'tan spisil te c'ahc'aleletique. Ya sc'an te jujutuhl mero hich yo'tan te bin snopoje.

⁶Te mach'a ya yich' ta cuenta te jun c'ahc'al, ha ya spas ta scuenta te Cajwaltic, soc te mach'a mayuc ta cuenta yu'un te c'ahc'al, ha ya spas ta scuenta te Cajwaltique.[4] Te mach'a ya swe', ta scuenta Cajwaltic ya swe', como ya yalbe wocol Dios yu'un; soc te mach'a ma swe', ta scuenta Cajwaltic ma ba ya swe', soc ha nix hich ya yalbe wocol Dios yu'un.

⁷Ma jtuquel-o'tanticuc te cuxulotic, soc ma jtuquel-o'tanticuc te ya xchamotique.

⁸Teme cuxulotic, ha ta scuenta Cajwaltic te cuxulotic; teme ya xchamotic, ha ta scuenta Cajwaltic te ya xchamotique. Ha yu'un teme cuxulotic o teme ya xchamotic, ha yu'unotic te Cajwaltique.

⁹Como ha cham Cristo soc cha'cuxaj tal scuenta yu'un ha Ajwalil ya xc'oht yu'un te mach'atic chamenic soc te mach'atic cuxulique.

¹⁰Pero te ha'ate ¿bin yu'un yac awalbe smul te awermano? Ha nix hichat, ¿bin yu'un yac ap'aj te awermano? como jpisiltic ya xc'ohotic ta ich'el ta c'op ta stojol te chapajibal yu'un Cristo.[5]

¹¹Yu'un hich ts'ihbabil: Ho'on cuxulon, xchi te Cajwaltic, spisilic me ya squejan sbahic ta jtojol; soc spisil ehal ya me yalic ta jamal te ho'on Dioson, xchi.

¹²Ha yu'un jujutuhlotic ya xc'oht cac'tic cuenta ta stojol Dios.

¹³Ha yu'un ma me talel c'axeluc ya jlehbe jba jmultic, ha lec ac'a jnoptic bin ut'il ma ba ya ca'betic sc'ohchinojibal o te bin ya xyahlic yu'un te quermanotique.

¹⁴Jna'oj soc hich ay ta co'tan ta scuenta te Cajwaltic Jesús, te mayuc bin bohloben sc'oblal; pero te mach'a ya scuy te bohloben sc'oblale, yu'un nix bohloben sc'oblal ta stojol abi.

¹⁵Teme ta scaj we'elil te ya smel yo'tan te awermano, yu'un nix ma ba ayat ta spasel te bin ya sc'an te sc'uxul-o'tanile. Ma me ha'uc ta scuenta te bin yac awe' te yac awac' ch'ayuc te mach'a cham Cristo yu'une.

¹⁶Ma me xawac' te chopol ya xhalot sc'oblal yu'un te bin lec te yac awalic,

¹⁷como te cuentahinel yu'un Dios ma ha'uc we'el uch'el, ha te bin toj ta pasel, lamal q'uinal soc tse'el-o'tanil ta scuenta te Ch'ul Espíritu,

¹⁸como te mach'a hich ya yac' sba ta a'batinel yu'un Cristo, lec yo'tan Dios yu'un soc lec sc'oblal yu'un ants-winiquetic.

¹⁹Ha yu'un ya me jt'untic bin ut'il ya xlahmaj q'uinal yu'un soc te talel c'axel ya quich'tic quiptic a.

²⁰Ma me xajimbe te ya'tel Dios ta scaj we'elil. Spisil bintic ay, lec sc'oblal, pero ma lecuc teme ay mach'a ya ya'be sc'ohchin sba yantic ta scuenta te bin ya swe'e.

²¹Ha lec te ma ba ya swe' ti'bal o te ma ba ya yuch' vino, o biluc a te ya yac' sc'ohchin sba te awermano.

²²Te bin ach'uhunej, ch'uhuna atuquel ta stojol Dios. Ha bayel yutsil te mach'a ya sna' te ma teyuc ya sta smul a te bin lec ya ya'iy ya spase.

²³Yan te mach'a ya swe' aunque ya sna' te ma lecuc te hich ya spas, tey ya sta smul a, como ma ba ya spas soc sch'uhunel yo'tan; soc spisil te bintic ma ba talem ta scuenta sch'uhunel-o'tanil, ha mulil abi.