Read Tzeltal Romanos 15 Bible Online

Romanos 15 - Tzeltal bible

Romanos 15

¹Ho'otic te ay yip co'tantic ya sc'an te ya xcuhch cu'untic te mach'atic mayuc yip yo'tanic, ma me ha'uc ya jlehtic te bin lec co'tantic yu'un ta jtuqueltic.

²Jujutuhlotic ac'a jlehbetic te bin lec yo'tan yu'un te jpat-xuhctic, ha te bin lec ya xtuhun yu'une, yu'un hich ya yich' yipic a,

³como ha nix hich te Cristo ma ha'uc la sle te bin lec yo'tan yu'un stuquel, hich te bin ut'il ts'ihbabil: Ha c'oht ta jtojol te ixta'c'optayel yu'un te mach'atic ya yixta'c'optayat, xchi.

⁴Como spisil te bintic ts'ihbabil ta nahil, scuenta jp'ijubteseltic te la yich' ts'ihbayel, scuenta yu'un ay smuc'ul co'tantic ta scuenta te bin ya xcuhch cu'untic soc ta scuenta te yip co'tantic ya jtahtic yu'un te bin ts'ihbabile.

⁵Te Dios te ya yac' te ya xcuhch cu'untic soc te ya ya'botic smuc'ul co'tantic, ac'a yac' te jun awo'tan abahic ta scuenta Cristo Jesús,

⁶scuenta yu'un junax awo'tanic soc ac'opic yac awalbeyic yutsil sc'oblal te Dios, te Stat te Cajwaltic Jesucristo.

⁷Ha yu'un talel c'axel xawic' abahic, hich te bin ut'il la yic'otic te Cristo, scuenta yu'un ya xhalbot yutsil sc'oblal te Diose.

⁸Ya calbeyex, te Cristo Jesús tal yac' sba ta a'batinel ta stojol mach'atic yich'ojic circuncisión yu'un ya yac' ta ilel te bin smelelil yu'un Dios, scuenta yu'un ya yac' c'ohtuc ta pasel te bin yaloj ta jamal ta stojol te me'iltatiletic,

⁹soc scuenta yu'un te jyanlumetic ya yalbeyic yutsil sc'oblal Dios yu'un te sc'uxul yo'tan, hich te bin ut'il ts'ihbabil: Ha yu'un ya calbat yutsil ac'oblal ta yohlil te jyanlumetic soc ya jc'ayojtaybat abihil, xchi.

¹⁰Soc hich ya yal: Jyanlumex, tse'eluc me awo'tanic soc te pueblo yu'une, xchi.

¹¹Soc ya yal xan: Halbeyahic wocol te Cajwaltic, spisil jyanlumetic, c'ayojtaybeyahic yutsilal, spisil nacionetic, xchi.

¹²Soc hich ya yal te Isaías: Ya me xcha'col te slohp' Isaí, ha te mach'a ya xhahch scuentahin te jyanlumetic; ha me ya smuc'ulin yo'tanic te nacionetique, xchi.

¹³Te Dios yu'un smuc'ul-o'tanil ac'a snojesbeyex awo'tanic ta tse'el-o'tanil soc lamal-o'tanil ta scuenta te bin ach'uhunejic, scuenta yu'un ay bayel smuc'ul awo'tanic ta scuenta yu'el te Ch'ul Espíritu.

¹⁴Quermanotac, sch'uhunej co'tan te ay bayel yutsil awo'tanic soc te ay bayel bin ana'ojic, hich talel c'axel ya xhu' yac anohptes abahic.

¹⁵Ay nix banti tulan la jts'ihbayex yu'un ya ca'beyex ana'ic xan a, ta scuenta te bin a'bilon yu'un Dios

¹⁶scuenta yu'un ay ca'tel yu'un Jesucristo ta stojol te jyanlumetic, ha te ya ca'telin yalel te lec yach'il c'op yu'un Dios, scuenta yu'un ha mahtanil ya xc'ohtic te jyanlumetic te lec yo'tan Dios yu'un, te ha ch'uhltesbilic yu'un te Ch'ul Espíritu.

¹⁷Ha yu'un ay bin ya jtoy jba yu'un ta scuenta Cristo Jesús yu'un te ca'tel ta stojol Dios,

¹⁸como mayuc yan bin ya cal, ha nax ya cal te bin la spas Cristo ta jcuenta, yu'un ya sch'uhunic mandar te jyanlumetique. Hich la jpas ta scuenta te jc'op soc te ca'tel,

¹⁹ta scuenta yip te señahiletic soc jchahp a'teliletic pasbil ta scuenta yu'el te Espíritu yu'un Dios. Hich c'alal Jerusalén soc ta sjoyobal ha to ta sq'uinal Ilírico, spisil la jnojes ta lec yach'il c'op yu'un Cristo.

²⁰Hich la jco'tantay spuquel te lec yach'il c'op, ma teyuc a ta banti halbilix sc'oblal te Cristo, scuenta yu'un ma ba ya x'a'tejon ta banti hahchemix ya'tel yan,

²¹pero hich te bin ut'il ts'ihbabil: Te mach'atic mayuc bin ora halbotic sc'oblal, ya me yilic; te mach'atic mayuc xya'iybeyic sc'oblal, ya me xc'oht ta yo'tanic, xchi.

²²Ha scuentahil te bayel buelta ay bin la smacon te hich ma ba tal quilex.

²³Pero yo'tic mayuquix lec banti ya xhu' ya x'a'tejon xan li'i, soc te bin ut'il ayix bayel ha'bil te co'tanuc ya xtal quilex,

²⁴ya me xtalon ta banti ayex te c'alal ya xbohon ta España. Co'tanuc ya xc'ax quilex, yu'un ya jmulan te ya joquinex cheb oxeb c'ahc'al, patil yacuc acoltayonic xan bahel ta España.

²⁵Pero yo'tic ya xbohon ta Jerusalén yu'un ya xbaht ca'be scoltayel te mach'atic ch'ultesbilique.

²⁶Como ta Macedonia soc ta Acaya soc yutsil yo'tanic la stsobic mahtanil yu'un scoltayel te pobrehetic te ayic ta yohlil te mach'atic ch'uhltesbilic ta Jerusalén.

²⁷Lec la ya'iyic te hich ya spasic, soc ay sbetic yu'unic, como teme pajal yich'ojic te jyanlumetic te bintic ay yu'un te judíohetic te bintic scuenta sch'uhlelic, ya sc'an te ya scoltayic a te bintic scuenta sbaq'uetalic.

²⁸Ha yu'un te c'alal ya xlaj co'tan ta spasel ini, teme la jca'be ta sc'abic te mahtanile, ya xc'ax quilex te c'alal ya xbohon ta España.

²⁹Ya jna' te c'alal ya xbohon te banti ayex, ya xc'ohon soc bayel bendición yu'un te lec yach'il c'op yu'un Cristo.

³⁰Quermanotac, ya calbeyex wocol ta scuenta te Cajwaltic Jesucristo soc ta scuenta sc'uxul yo'tan te Espíritu, te yacuc acoltayonic ta sc'oponel Dios

³¹te ha'uc libre ya xc'ohon ta sc'ab te mach'atic mayuc sch'uhunel yo'tanic te ayic ta Judea, soc te lecuc yo'tanic yu'un te scoltayel te ya ca'be te mach'atic ch'uhltesbilic ta Jerusalén,

³²scuenta yu'un tse'el co'tan ya xc'ohon ta banti ayex, teme hich ya sc'an Dios, soc te hich pajal lec q'uinal ya ca'iytic a.

³³Ac'a sjoquinex apisilic te Dios yu'un lamal q'uinal. Hichuc.