Read Tzeltal Romanos 16 Bible Online

Romanos 16 - Tzeltal bible

Romanos 16

¹Ya ca'beyex ta acuentahic te quermanatic Febe, te ha diaconisa yu'un te iglesia ta Cencrea.

²Ic'bonic me ta scuenta te Cajwaltic, hich te bin ut'il ay ta pasel yu'un te mach'atic ch'uhltesbilic, soc coltayahic ta bin ya xtuhun yu'un, como bayel mach'atic scoltaylanej, soc ha nix hich la scoltayon.

³Halbon xcoltanuc te Priscila soc te Aquila, te jmohlol ta a'tel ta scuenta Cristo Jesús.

⁴C'an yac' scuxlejalic ta jcuenta. Ma jtuqueluc ya calbe wocol, ha nix hich ya yalbeyic wocol spisil te iglesia yu'un te jyanlumetique.

⁵Soc halbon xcoltanuc te iglesia te ya stsob sba ta sna. Halbon xcoltanuc te Epeneto, te c'ux ta co'tan, te ha nahil la sch'uhun Cristo ta Acaya.

⁶Halbon xcoltanuc te María, te bayel a'tejem ta awohlilique.

⁷Halbon xcoltanuc te Andrónico soc te Junias, te jmohlol-ts'ahquil soc te pajal la jquich' chuquel soc. Ha ich'bilic ta cuenta ta yohlil te jpuc-c'opetic, soc ha nahil cu'un la sch'uhunic Cristo.

⁸Halbon xcoltanuc te Amplias, te c'ux ta co'tan ta scuenta Cajwaltic.

⁹Halbon xcoltanuc te Urbano, te jmohlolcotic ta a'tel ta scuenta Cristo Jesús, soc te Estaquis, te c'ux ta co'tane.

¹⁰Halbon xcoltanuc te Apeles, te chican te jun yo'tan ta stojol Cristo. Halbon xcoltanuc ta sjunal sna te Aristóbulo.

¹¹Halbon xcoltanuc te Herodión, te jmohlol-ts'ahquil. Halbon xcoltanuc ta sjunal sna te Narciso, te ayic ta stojol te Cajwaltique.

¹²Halbon xcoltanuc te Trifena soc te Trifosa, te yacalic ta a'tel ta stojol te Cajwaltique. Halbon xcoltanuc te Pérsida te c'ux ta co'tan, te bayel a'tejem ta stojol te Cajwaltique.

¹³Halbon xcoltanuc te Rufo, te tsahbil yu'un te Cajwaltic, soc te snan, te ha jnan c'ohem.

¹⁴Halbon xcoltanuc te Asíncrito, Flegonte, Hermas, Patrobas, Hermes soc te quermanotactic sjoquinejique.

¹⁵Halbon xcoltanuc te Filólogo, Julia, Nereo soc te yantsilel, te Olimpas soc spisil te mach'atic ch'uhltesbilic te sjoquinejique.

¹⁶Talel c'axel xapatbe aba awo'tanic ta scuenta ch'ul uhts'uyel. Xcoltanuquex laj yu'un spisil te iglesiahetic yu'un Cristo.

¹⁷Quermanotac, ya calbeyex wocol, te yacuc atsahtay abahic ta stojol te mach'atic ya ya'beyex ajat abahic soc te ya yaq'uic c'ohchinojibaletic te ya scontrahinic te nohptesel awich'ojique. Parte me xawac' abahic soc,

¹⁸como te mach'atic hich ya spasic, ma ha'uc yac'oj sbahic ta a'batinel yu'un te Cajwaltic Jesucristo, ha nax ya spasic te bin ya sc'an yo'tanic stuquel. Ta scuenta t'ujbil c'opetic soc te bintic lec ta a'iyel ya slo'loybe yo'tanic te mach'atic ma sna'ic stsahtayel.

¹⁹Puhquem ac'oblalic ta bayuc te yac ach'uhunic mandar, ha yu'un tse'el co'tan awu'unic. Pero ya jc'an te ay sp'ijil awo'tanic ta spasel te bin lec, te ma xana'ic spasel te bin ma lecuque.

²⁰Te Dios yu'un lamal q'uinal nopolix ya ya'beyex ats'o'ic ta teq'uel te Satanás. Ac'a sjoquinex te yutsil yo'tan te Cajwaltic Jesucristo.

²¹Xcoltanuquex laj yu'un te Timoteo, te jmohlol ta a'tel, soc te Lucio, Jasón, Sosípater, te jmohlol-ts'ahquil.

²²Ho'on te Tercio, te la jts'ihbay ha'i hun ini, ya jpatbeyex awo'tanic ta stojol te Cajwaltique.

²³Xcoltanuquex laj yu'un te Gayo te yotsesejon ta sna soc spisil te iglesia. Xcoltanuquex laj yu'un te Erasto, te tesorero yu'un te pueblo, soc nix te quermanotic Cuarto.

²⁴Ac'a sjoquinex te yutsil yo'tan te Cajwaltic Jesucristo. Hichuc.[6]

²⁵Te mach'a ya xhu' ya ya'beyex yip awo'tanic ta scuenta te lec yach'il c'op cu'un soc ta scuenta halbeyel sc'oblal te Jesucristo, ta scuenta te ac'bil ta na'el te bin muquen ay c'alal ta sbahtel q'uinal,

²⁶pero ta ora ini chicanix ta scuenta te bin ts'ihbabil hilel yu'un te jalwanejetic ta scuenta smandar Dios te sbahtel q'uinal ay, te a'bot sna'ic spisil nacionetic scuenta yu'un ya sch'uhunic;

²⁷te Dios te stuquel ay soc te ay sp'ijil yo'tan, ayuc me yutsilal sbahtel q'uinal ta scuenta te Jesucristo. Hichuc.