Read Tzeltal Romanos 3 Bible Online

Romanos 3 - Tzeltal bible

Romanos 3

¹¿Bin ya xloc' a teme ha judío? ¿O bin ya xtuhun a teme yich'oj circuncisión?

²Bayel bin ya xloc' a. Primero, ha a'botic ta scuentahic te sc'op Diose.

³¿Ha xan teme ay mach'atic ma ba sch'uhunejic? Te bin ut'il mayuc sch'uhunel yo'tanic ¿ya bal slajimbe sc'oblal te jun yo'tan ay te Diose?

⁴¡Ban c'an hichuc! Dios spisil ora ya spas te bin smelelil, ha jlotetic spisil ants-winiquetic; como hich ts'ihbabil: Scuenta yu'un ya xchicnaj te toj ayat ta scuenta bintic yac awal, soc te yac awa'iy tsalaw c'alal ya x'ich'otat ta c'op, te xchihe.

⁵Teme ta scuenta te bin ma tojuc ya jpastic hich ya yac' chicnajuc te stojil bin ya spas te Diose, ¿bin xchihotic yu'un? ¿Yu'un bal ma stojiluc bin ya spas Dios te ya ya'botic castigo? (Hich yacon ta c'op te bin ut'il winic.)

⁶¡Ban c'an hichuc! Teme hich ay, ¿bin ut'il c'an ich'otuc ta c'op yu'un Dios te bahlumilale?

⁷Pero teme ta scuenta jlot ya yac' chicnajuc te smelelil c'op yu'un Dios te hich c'axem xan yutsilal a, ¿bin yu'un ich'bilon ta c'op hich te bin ut'il jmulawil?

⁸¿Bin yu'un ma hichuc ya yich' halel (hich te bin ut'il ya slehonic ta c'op soc ya yalic te hich calojcotic): Ac'a jpastic te bin chopol scuenta yu'un ya xtal te bin lec, te xchihe? Te mach'atic hich ya yalic, stojil me ya yich'ic castigo.

⁹¿Bin ut'il ay a hiche? ¿Ho'otic bal lecotic xan a te bin ut'il te yantique? ¡Ban c'an hichuc! Calojtiquix te spisilic ayic ta scuenta mulil, judíohetic soc jyanlumetic.

¹⁰Hich te bin ut'il ts'ihbabil: Mayuc mach'a toj, ni jtuhluc;

¹¹mayuc mach'a ya xc'oht ta yo'tan, mayuc mach'a ya sle te Diose.

¹²Spisilic howiyemic, pajal ma xtuhunic; mayuc mach'a ya spas te bin lec, ni jtuhluc.

¹³Ha jamal muquenal te yoq'uib; ya xlo'loywanic te yaq'uic. Ay svenenohil ti'awal chan ta sti'il yehic;

¹⁴nojel ta ye te bohlc'op soc te bin ch'a.

¹⁵Te yoquic ya suj sba ta smalel ch'ich';

¹⁶jinel soc wocol ay ta behetic yu'unic;

¹⁷ma ba ya sna'beyic sba te sbehlal lamal q'uinal.

¹⁸Ma ba ya xi'ic te Diose, te xchihe.

¹⁹Jna'ojtic te spisil bintic ya yal te Ley, ha ya yalbe te mach'atic ayic ta scuenta te Ley, scuenta yu'un spisilic ya xmahc yehic soc spisil bahlumilal ya xhil ta scuenta ich'el ta c'op yu'un Dios,

²⁰como mayuc jtuhluc ya xhalbot te toj ta stojol Dios ta scuenta spasel te bin ya yal te Ley, como ta scuenta te Ley ya yac' ta na'el te ay mulil.

²¹Pero ta ora ini chicanix bin ut'il toj ya x'ilotic yu'un Dios, ma ha'uc ta scuenta te Ley, ha halbot sc'oblal yu'un te Ley soc yu'un te jalwanejetique:

²²ha te toj ya x'ilotic yu'un Dios ta scuenta sch'uhunel yo'tantic ta stojol Jesucristo, spisil mach'atic ya sch'uhunic, yu'un mayuc mach'a yan yilel,

²³spisilic ay smulic, ma ba yich'beyejic yutsilal te Diose,

²⁴pero ta scuenta yutsil yo'tan Dios ta mahtanil halbotic te toj ayic, ta scuenta stojel mulil ta scuenta Cristo Jesús.

²⁵Dios la yac' te ha la stojbotic jmultic te Jesús teme jch'uhunejtic te la smal sch'ich'el cu'untic. Tey la yac' ta ilel a te stojil bin ya spas, como cuhch yu'un te ma ba la yich' ta cuenta te muliletic ta namey,

²⁶yu'un ya yac' ta ilel ta ora ini te stojil bin ya spas, scuenta yu'un ya xchicnaj te ha toj stuquel soc te ya yal te ha toj te mach'a ya sch'uhun te Jesús.

²⁷Ha yu'un ¿banti ay te toybahil? Mayuc. ¿Banti yich'oj yip, ha bal ta banti sch'uhunel spasel te Ley? Ma'uc, ha yich'oj yip ta banti sch'uhunel-o'tanil.

²⁸Como ya caltic te ha halbil te toj te ants-winic ta scuenta sch'uhunel yo'tan, ma ha'uc ta scuenta spasel bin ya yal te Ley.

²⁹Te Dios, ¿ha nax bal Dios yu'un te judíohetique? ¿Ma bal ha'uc nix Dios yu'un te jyanlumetique? Ha nix Dios yu'un te jyanlumetic,

³⁰como jtuhl nax Dios ay, soc ha me ya yal te toj ay ta scuenta sch'uhunel yo'tanic te mach'atic yich'ojic circuncisión soc ha nix hich ta scuenta sch'uhunel yo'tanic te mach'atic ma ba yich'ojic circuncisión.

³¹¿Yu'un bal ya jlajimbetic sc'oblal te Ley ta scuenta te sch'uhunel-o'tanil? ¡Ban c'an hichuc! Ha ya caltic te ay sc'oblal te Ley.