Read Tzeltal Romanos 4 Bible Online

Romanos 4 - Tzeltal bible

Romanos 4

¹¿Bin ya caltic yu'un te bin la sta te Abraham, te jtatic ta scuenta ch'ich'-baq'uet?

²Te ha'uc halbil te toj ay te Abraham ta scuenta te ya'tel, ay bin ya stoy sba yu'un te hichuque, pero ma xhu' te hich ya spas ta stojol te Diose;

³como ¿bin ya yal te Shun Diose? Te Abraham la sch'uhun te Diose, hich ac'ot ta cuenta yu'un te toj ay, ¿ma bal xchihuc?

⁴Pero te mach'a ya x'a'tej, ma smahtanuc te stojol ya'tel spasoj, ya sc'an ya xtojbot.

⁵Yan te mach'a ma x'a'tej, teme ya sch'uhun te Mach'a ya yal te ha toj te mach'a chopole, hich ya x'ilot te toj ay ta scuenta sch'uhunel yo'tan.

⁶Hich nix la yal te David te ha bayel yutsil te mach'a ma ta scuentahuc ya'tel te ya xhalbot yu'un Dios te toj aye.

⁷Hich la yal: Ha me bayel yutsilic te mach'atic pasbotic perdón yu'un te bintic chopol spasojic, soc te macbil te smulique.

⁸Ha me bayel yutsil te mach'a ma x'a'bot scuch smul yu'un te Cajwaltique, xchi.

⁹¿Ha nax bal bayel yutsil stuquel te mach'atic yich'ojic circuncisión, o ha ni bal hich te mach'atic ma ba yich'ojic circuncisión? Melel la jcaltiquix, te Abraham toj ilot yu'un Dios te bin ut'il ay sch'uhunel yo'tan.

¹⁰¿Bin ut'il a te ac'ot ta cuenta yu'un? ¿Ha bal te c'alal yich'ojix circuncisión a, o te c'alal ma to ba yich'oj ahe? Pues ma to yich'ojuc circuncisión a te hich c'ohte.

¹¹Ha la yich' circuncisión scuenta seña, ha sello c'oht yu'un te toj ay yu'un te sch'uhunel yo'tan te c'alal ma to ba yich'oj circuncisión a. Ha scuentahil te ha tatil yu'un spisil mach'atic ay sch'uhunel yo'tanic te ma ba yich'ojic circuncisión, scuenta yu'un ha nix hich toj ya x'ilotic yu'un Dios te bin ut'il ay sch'uhunel yo'tanic.

¹²Soc ha nix tatil yu'un te mach'atic ma ha'uc nax yich'ojic circuncisión, te ha ya st'umbeyic te sch'uhunel yo'tan te jtatic Abraham c'alal ma to yich'ojuc circuncisión a.

¹³Ma ha'uc ta scuenta te Ley te halbot yu'un Dios te Abraham soc te sts'umbal te ya x'a'bot yich'ic te bahlumilal, pero ta scuenta bin ut'il ilot te toj ay ta scuenta sch'uhunel yo'tan;

¹⁴yu'un teme ya yich'ic te mach'atic ayic ta scuenta te Ley, tojol te sch'uhunel-o'tanil soc ya xlaj sc'oblal te bin halbil ta jamal te hichuque.

¹⁵Como te Ley ya yac' ilimba; pero te banti mayuc Ley, mayuc bin ya yich' c'axuntayel.

¹⁶Ha yu'un ya xtal ta scuenta sch'uhunel-o'tanil te bin halbil ta jamal, scuenta yu'un ay ta scuenta yutsil-o'tanil soc ma xch'ay ta stojol spisil sts'umbal Abraham, ma ha'uc nax te mach'atic cuentahimbilic yu'un te Ley, ha nix hich te mach'atic ay sch'uhunel yo'tanic hich te bin ut'il Abraham, te ha jtatic ta jpisiltic,

¹⁷hich te bin ut'il ts'ihbabil: La jcac' te tatil ya xc'ohat yu'un tsobol nacionetic, xchi. Ha yu'un ha tatil cu'untic ta stojol Dios, te ha sch'uhunej, ha te Dios te ya ya'be scuxlejal te mach'atic chamenic soc te ya yic'ticlan tal te bintic mayuc te sjel ta aye.

¹⁸Aunque hich yilel te tojol ay bin ya smahliy, la sch'uhun yo'tan te Abraham, ha scuentahil te ha tatil c'oht yu'un tsobol nacionetic, hich te bin ut'il halbot: Hich yipal ya xc'oht ats'umbal, te xchihe.

¹⁹Ma ba pehc'aj sch'uhunel yo'tan yu'un te bin ut'il la sna' te mayuquix yip te sbaq'uetal, (yu'un nopol ya xloc' ho'winic (100) ya'bilal), soc te bin ut'il jma'al te Sara.

²⁰Ma xchebetuc yo'tan yu'un te bin halbot sc'oblal yu'un Dios, la to yich' xan sch'uhunel yo'tan soc la yalbe yutsil sc'oblal te Diose,

²¹yu'un c'ohem ta yo'tan te ay yu'el te Dios ta spasel spisil te bintic yaloje.

²²Ha yu'un, te bin ut'il ay sch'uhunel yo'tan te toj ilot yu'un te Diose.

²³Soc ma stuqueluc nax te Abraham te la yich' ts'ihbayel te ac'ot ta cuentahe,

²⁴ha nix hichotic toj ya x'ilotic yu'un Dios, ho'otic te jch'uhunejtic te Mach'a la scha'cuxajtes tal ta lajel te Cajwaltic Jesús,

²⁵te ac'ot ta lajel ta scuenta jmultic, soc te cha'cuxajtesot tal scuenta yu'un ya xhalbotic te toj ayotique.