Read Tzeltal Romanos 7 Bible Online

Romanos 7 - Tzeltal bible

Romanos 7

¹¿Ma bal ana'ojic, quermanotac, (ha ya xc'opojon soc te mach'atic ya sna'ic te leyetic), te ley ya scuentahin te winic te jayeb c'ahc'al cuxule?

²Hich c'ohem te bin ut'il ants te nuhpunem te cuentahimbil yu'un smamalal te jayeb c'ahc'al cuxule, pero teme ya xcham te smamalale, libre ya xc'oht yu'un te cuentahinel yu'une.

³Ha yu'un teme cuxul to te smamalal ya x'ic'ot yu'un yan winic, j'antsinel, xchi sc'oblal; yan teme cham te smamalale, hilemix ta libre yu'un te ley abi, teme ya x'ic'ot yu'un yan winic ma j'antsineluquix abi.

⁴Ha nix hichex, quermanotac, chamenex ta stojol te Ley ta scuenta te sbaq'uetal te Cristo, scuenta yu'un yan mach'a yu'un ya xc'ohex, ha te Mach'a cha'cuxaj tal ta yohlil mach'atic chamenic, scuenta yu'un ya sitinotic ta stojol Dios.

⁵Como te c'alal ayotic ta scuenta ch'ich'-baq'uet a, te bin chopol la smulan te jbaq'uetaltic te hachbot yu'un te Ley, ha la spas ya'telic ta jbaq'uetaltic te la yac' sitinuc te lajele.

⁶Pero yo'tic libre ayotiquix yu'un te Ley, te bin ut'il chamenotiquix ta stojol te bin la smosohinotic, scuenta yu'un ya cac' jbahtic ta a'batinel yu'un te bin yach'il yu'un te Espíritu, ma ha'uc yu'un te bin namey ts'ihbabil hilele.

⁷¿Bin ya caltiquix yu'un a hiche? ¿Mulil bal te Ley? ¡Ban c'an hichuc! Te manchuc ay te Ley, ma ba la jna' bin a te mulil te hichuque. Ma ba la jna' bin a te bic'tal-o'tanil te manchuc hich ya yal ta Ley: Ma me xbic'taj awo'tanic, te xchihe.

⁸Pero te mulil la stuhun te mandaril, hich la shachbon ta co'tan spisil ta chahp bic'tal-o'tanil, como teme mayuc Ley, chamen te mulile.

⁹Ta nahilal mayuc Ley a te cuxulone; pero te c'alal tal te mandaril, cuxaj te mulil, ho'on chamon.

¹⁰La jquil te ha nix te mandaril te sc'oblal ya yac' cuxlejal, la yac'on ta lajel,

¹¹como te mulil, te bin ut'il la stuhun te mandaril, la slo'loyon soc la yac'on ta lajel ta scuenta.

¹²Ha yu'un ch'ultesbil stuquel te Ley, soc te mandaril ha ch'ultesbil, toj soc lec.

¹³¿Yu'un bal ha la yac'on ta lajel te bin leque? ¡Ban c'an hichuc! Pero scuenta yu'un ya xchicnaj te ha mulil, la yac'on ta lajel ta scuenta te bin lec, scuenta yu'un ta scuenta te mandaril c'ax chopol c'oht te mulile.

¹⁴Jna'ojtic te Ley ha scuenta espíritu; yan te ho'one ch'ich'-baq'ueton, chombilon ta a'batinel yu'un te mulile.

¹⁵Te bin ya jpas, ma jna'be scuentahil, como ma ha'uc ya jpas te bin ya jc'an, ha ya jpas te bin ya quihlay.

¹⁶Teme ha ya jpas te bin ma jc'an, yu'unix jna'oj a te lec te Ley.

¹⁷Ha yu'un ma ho'uconix te hich ya jpas, ha te mulil te ay ta co'tan te ya ya'bon jpase.

¹⁸Ya jna' te mayuc bin lec ta jtojol, ha ta jbaq'uetal, como co'tanuc ya jpas te bin lec, pero ma xhu' cu'un spasel.

¹⁹Como ma ha'uc ya jpas te bin lec ya jc'an, ha ya jpas te bin ma lecuc te ma jc'ane.

²⁰Teme ha ya jpas te bin ma jc'an, ma ho'ucon ya jpas, ha ya spas te mulil ay ta co'tan.

²¹Ha yu'un, aunque co'tanuc ya jpas te bin lec, ya jta te ley ini: ay ta jtojol te bin chopole.

²²Ta co'tan ya jmulan te ley yu'un Dios;

²³pero ya quil te ay yan ley ta jbaq'uetal te ya scontrahin te ley ay ta co'tan, soc ya yac' te chuculon yu'un te ley yu'un mulil ay ta jbaq'uetale.

²⁴¡C'ux obol jba! ¿Mach'a ya sloq'ueson ta libre yu'un te baq'uet scuenta lajel?

²⁵¡Wocol yal Dios, ta scuenta te Cajwaltic Jesucristo! Ha yu'un te ho'one, ta co'tan ya cac' jba ta a'batinel yu'un te ley yu'un Dios, pero ta jbaq'uetal ya cac' jba ta a'batinel yu'un te ley yu'un te mulile.