Read Tzeltal Romanos 8 Bible Online

Romanos 8 - Tzeltal bible

Romanos 8

¹Ha yu'un te mach'atic ayic ta stojol te Cristo Jesús, ma ba quechelix ta stojel te smulique, ha te mach'atic ma ba ya'telinejic spasel te bin ya sc'an te sbaq'uetalic, ha ya'telinejic spasel te bin ya sc'an te Espíritu,[1]

²como te ley yu'un te Espíritu te ya yac' cuxlejal ta scuenta Cristo Jesús la yac'onix ta libre yu'un te ley yu'un te mulil soc te lajele.

³Como te bin ma ba hu' yu'un te Ley ta scaj te mayuc yip te ch'ich'-baq'uet, Dios la spas te bin ut'il la sticon tal te Snich'an te hich nix sbaq'uetal te bin ut'il te jmulawil baq'uet, soc ta scaj mulil, hich la yac' ta tojel te mulil ta baq'uet,

⁴scuenta yu'un ts'acal ya xc'oht cu'untic te bin stojil ya yal te Ley, ho'otic te ma ha'uc ya ca'telintic spasel te bin ya sc'an te jbaq'uetaltic, ha ya ca'telintic spasel te bin ya sc'an te Espíritu.

⁵Te mach'atic ayic ta scuenta te ch'ich'-baq'uet ha nax ay ta yo'tanic te bin scuenta ch'ich'-baq'uet; yan te mach'atic ayic ta scuenta Espíritu, ha ay ta yo'tanic te bin ya sc'an te Espíritu.

⁶Te sna'ulanel te bintic scuenta ch'ich'-baq'uet, ha ya x'ac'otic ta lajel yu'un, yan te sna'ulanel bintic scuenta Espíritu, ha me cuxlejalil soc lamal q'uinal.

⁷Como te mach'a ya ya'telin sna'ulanel te bintic scuenta ch'ich'-baq'uet, scontrahinej Dios abi, yu'un ma ba ya yac' sba ta cuentahinel yu'un te Ley yu'un Dios, soc ma ba ya xhu' yu'un;

⁸soc te mach'atic ayic ta scuenta ch'ich'-baq'uet ma ba ya xhu' yu'unic te lec yo'tan Dios yu'unic.

⁹Pero te ha'exe ma ba ayex ta scuenta ch'ich'-baq'uet, ayex ta scuenta Espíritu, teme melel ayinem ta awo'tanic te Espíritu yu'un Dios. Te mach'a ma ba yich'oj te Espíritu yu'un Cristo, ma yu'unuc Cristo stuquel.

¹⁰Yan teme ha ay ta awo'tanic te Cristo, chamenix abaq'uetalic ta scaj mulil, pero cuxul te espíritu awu'unic ta scaj te bintic toj ta pasele.

¹¹Teme ha ayinem ta awo'tanic te Espíritu yu'un te Mach'a la scha'cuxajtes tal ta lajel te Cristo Jesús ta yohlil mach'atic chamenic, ha nix hich ya me scha'cuxajtesbeyex abaq'uetalic ta scuenta te Espíritu yu'un te ayinem ta awo'tanique.

¹²Ha yu'un, quermanotac, ay bin ya sc'an pasel cu'untic, pero ma ha'uc spasel te bin ya smulan te jbaq'uetaltique,

¹³como teme ha yac awa'telinic spasel te bin ya smulan stuquel, ya me xlajex yu'un; yan teme ta scuenta te Espíritu yac awac' ta lajel te ya'tel te jmulawil baq'uet, ya me xcuxajex yu'un.

¹⁴Ha me al-nich'aniletic yu'un Dios spisil mach'atic ayic ta tojobtesel yu'un te Espíritu yu'un Dios,

¹⁵yu'un ma ba awich'ojic te espíritu yu'un mosohinel scuenta yu'un ya xiwex yan buelta, ha awich'ojic te espíritu yu'un al-nich'antayel, te ha ta scuenta ya caltic: ¡Abba, Jtat! xchihotic.

¹⁶Ha nix te Espíritu te ya yal testigo-c'op ta stojol te espíritu cu'untic te ha yal-snich'anotiquix te Diose.

¹⁷Teme al-nich'anilotic, ya x'ac'ot quich'tic te bin ay yu'un Dios soc pajal ya quich'tic soc Cristo, teme pajal ya xc'ax jwocoltic soc, scuenta yu'un pajal ya quich' cutsilaltic soc.

¹⁸Sch'uhunej co'tan te jwocoltic ta ora ini ma pajaluc soc te utsilal te talel yac te ya xchicnaj ta jtojoltic,

¹⁹como spisil te bintic pasticlambil c'ax lec yo'tan yac smahliybel ya xchicnajtesot te al-nich'aniletic yu'un Dios.

²⁰Te bintic pasticlambil ac'ot ta cuentahinel yu'un te bin tojol nax, ma ha'uc nix hich la sc'an, pero ha ta scaj te Mach'a la yac' ta cuentahinel yu'un te bin yac smahliybel.

²¹Como ha nix hich te bin pasbile ya x'ac'ot ta libre yu'un te mosohil yu'un te ya xc'a', yu'un pajal ya yich' yutsilal soc te al-nich'anetic yu'un Dios.

²²Jna'ojtic te yac ta ahcan spisil te bintic pasticlambil, soc c'alal ora yac ta c'axel bayel swocol hich te bin ut'il ants te ya yayintes alal.

²³Ma stuqueluc nax, ha nix hichotic te quich'ojtic te sba sit yu'un te Espíritu, ha nix hich yacotic ta ahcan ta co'tantic te c'alal yacotic ta smahliyel te iq'uel ta al-nich'an yu'un Dios, ha te colel yu'un te jbaq'uetaltic,

²⁴como ha colemotic yu'un te smuc'ul-o'tanil ini; pero te smuc'ul-o'tanil te chican ta ilel, ma ha'uc mero smuc'ul-o'tanil; como te mach'a ay bin yilojix, ¿bin a te ya smahliy?

²⁵Pero teme ya jmahliytic te bin ma ba quilojtic, jun co'tantic ya jmahliytic.

²⁶Ha nix hich ya scoltayotic te Espíritu te bin ut'il mayuc bin ya xhu' cu'untic, como ma jna'tic bin ya jc'ambetic te Diose, pero ha nix ya xc'opoj cu'untic te Espíritu soc ahcan te ma xweht bin ut'il ya yich' halele.

²⁷Te mach'a ya sna'botic co'tantic ya sna' te bin ay ta yo'tan te Espíritu, como hich ya xc'opoj yu'un te mach'atic ch'uhltesbilic te bin ut'il ya sc'an yo'tan te Diose.

²⁸Soc jna'ojtic te lec ya xc'oht ta loq'uel spisil bintic ya xc'oht ta stojol te mach'atic c'ux ta yo'tan Dios, ha te mach'atic ic'bilic yu'un Dios hich te bin ut'il chapal yu'une.

²⁹Como te mach'atic nahil la sna'be sba, ha nix la schahpan te pajal yilel ya xc'ohtic soc te Snich'ane, scuenta yu'un muc'ul banquilal ya xc'oht yu'un tsobol ihts'inaletic.

³⁰Te mach'atic hich chapal yu'un Dios, ha nix la yic'ticlan; te mach'atic la yic'ticlan, ha nix la yal te toj ay; te mach'atic la yal te toj ay, ha nix la yac'ticlambe yutsilalic.

³¹¿Bin ya caltiquix yu'un a ini? Teme lec yo'tan Dios ta jtojoltic, ¿mach'a ya xhu' ya scontrahinotic?

³²Te mach'a la sloq'ues ta yo'tan te mero Snich'an, te la yac' ta c'abal ta jcuentatic jpisiltic, ¿bin ut'il ma ba pajal ya ya'botic spisil soc a?

³³¿Mach'a c'an slehbe smul te mach'atic tsahbilic yu'un Dios? ha nix te Dios te ya yal te toj ay.

³⁴¿Mach'a c'an ya'be stoj smul? ha nix te Cristo te laj, soc xan ha cha'cuxaj, soc ayix ta swa'el-c'ab te Dios, te ha nix ya xc'opoj cu'untic.

³⁵¿Mach'a c'an spitotic loq'uel ta stojol te sc'uxul yo'tan Cristo? ¿Ha bal te contrahinel o wocoletic, uts'inel, wi'nal, teme mayuc c'u'ul-pac'al, te bin chuhcul ya xc'oht ta pasel, o espada?

³⁶Hich te bin ut'il ts'ihbabil: Ha'at ta acuenta te chapal jc'oblalcotic ta milel spisil ora; hichotcotic te bin ut'il tuminchijetic te ochel yac yich'belic milel, te xchihe.

³⁷Ta spisil ini, ho'otic jc'axel ya ca'iytic tsalaw ta scuenta te Mach'a c'ux la ya'iyotic ta yo'tane

³⁸Ha yu'un ni ha'uc te lajel, te cuxlejal, ch'ul a'batetic, principaletic, te bin ay ta ora ini, te bin ya xc'oht ta pasel ta patil,

³⁹te bin toyol ay, te bin c'ubul ay, o biluc a te pasbile, jna'oj te ma xhu' ya spitotic loq'uel ta stojol te sc'uxul yo'tan Dios te ay ta scuenta te Cajwaltic Cristo Jesús.