Read Tzeltal 1 Corintios 15 Bible Online

1 Corintios 15 - Tzeltal bible

1 Corintios 15

¹Yo'tic, quermanotac, ya calbeyex xan te lec yach'il c'op te calbeyejexix awa'iyique, te awich'ojiquix soc te jun awo'tan ach'uhunejique.

²Ta scuenta te lec yach'il c'op ini te colemexix, teme jc'axel yac awac' ta awo'tanic te c'op la jcalbeyexe; teme ma'uque tojol ach'uhunejic.

³Ta shahchibal la jca'beyex anopic te bin a'boton: Ha te laj Cristo ta scuenta jmultic, hich te bin ut'il ts'ihbabil ta Shun Dios;

⁴la yich' muquel, soc cha'cuxaj tal ta yoxebal c'ahc'al, hich nix te bin ut'il ts'ihbabil ta Shun Dios;

⁵la yac' sba ta ilel yu'un te Cefas, patil la yac' sba ta ilel yu'un te lahchaytuhl.

⁶Patil la yac' sba ta ilel yu'un c'axem ta ho'winic scha'bahc' (500) ta tuhl quermanotactic ta junax buelta; ay to tsobol cuxulic ta ora ini, pero ay wayemix sbaq'uetalic.

⁷Patil la yac' sba ta ilel yu'un te Jacobo, soc ta patil yu'un spisil te jpuc-c'opetique.

⁸Ta slajibal la yac' sba ta ilel ta jtojol, ho'on te hichon bin ut'il alal ma ba stahoj yayinab a te ayine.

⁹Te ho'one peq'uel ayon yu'un te yantic jpuc-c'opetic, ma snuhp'uc te jbihilinej jpuc-c'op, yu'un la jcuts'inlan te iglesia yu'un Dios.

¹⁰Pero ta scuenta yutsil yo'tan Dios hich ayon te bin ut'il ayone; soc ma tojoluc te yutsil yo'tan ta jtojol, c'ax hich a'tejemon a te bin ut'il a'tejem spisil te yantic jpuc-c'opetique; pero ma ho'ucon, ha nix te yutsil yo'tan Dios ta jtojol.

¹¹Aunque ho'on, aunque ha te yantic jpuc-c'opetic, hich la jcalcotic sc'op Dios soc hich ach'uhunejic.

¹²Pero teme ya yich' halel te cha'cuxaj tal Cristo ta yohlil mach'atic chamenic, ¿bin yu'un te ay mach'atic ta awohlilic te ya yalic te ma ba ya xcha'cuxajic tal te mach'atic chamenique?

¹³Te yu'unuc ma ba ya xcha'cuxajic tal te mach'atic chamenic, ma ba cha'cuxaj tal Cristo te hichuque.

¹⁴Soc teme ma ba cha'cuxaj tal te Cristo, tojol te sc'op Dios yacotcotic ta yalel soc tojol ach'uhunejic te hichuque.

¹⁵Soc lotil testigohotcotic yu'un Dios te hichuque, como calojcotic ta testigo-c'op te Dios la scha'cuxajtes tal te Cristo; pero ma ba la scha'cuxajtes tal teme melel te ma ba ya xcha'cuxaj tal te mach'atic chamenique.

¹⁶Teme ma ba ya xcha'cuxajic tal te mach'atic chamenic, ma ba cha'cuxaj tal Cristo te hichuque.

¹⁷Teme ma ba cha'cuxaj te Cristo, tojol ach'uhunejic abi, acuchoj to amulic te hichuque.

¹⁸Ha nix hich te mach'atic sch'uhunejic Cristo a te way sbaq'uetalic, jc'axel ch'ayic te hichuque.

¹⁹Te ha'uc nax ay smuc'ul co'tantic ta scuenta Cristo te jayeb c'ahc'al cuxulotic ta q'uinal, c'ax hich obol jbahtic a te bin ut'il spisil yantic ants-winiquetic te hichuque.

²⁰Pero cha'cuxajemix tal Cristo ta yohlil mach'atic chamenic, ha sba sit c'ohem yu'un te mach'atic wayem sbaq'uetalique.

²¹Como te bin ut'il och lajel ta scuenta jtuhl winic, ha nix hich ta scuenta jtuhl winic te ya xcha'cuxaj te mach'atic chamenique.

²²Hich te bin ut'il ta scuenta Adán te ya xcham spisilic, ha nix hich ta scuenta Cristo spisilic ya xcha'cuxajic.

²³Pero xmelmon ya xcha'cuxajic ta tuhlutuhl; Cristo te sba sit, patil te mach'atic yu'un te Cristo.

²⁴Patil ya xtal te slajibal c'ahc'al, te c'alal Cristo ya ya'be ta sc'ab Dios te Tatil te cuentahinel yu'une, te c'alal jc'axel tsalbilix yu'un spisil mach'atic toyol ayic, te mach'atic ay yip ya'telic soc yu'elic.

²⁵Ya sc'an te ay ta ajwalil ha to c'alal la yac' ta ye'tal yoc spisil te scontrataque.

²⁶Te slajibal jcontrahinwanej te ya yich' lajinel, ha te lajele,

²⁷como Dios la yac' ta ye'tal yoc spisil bintic ay. Te bin ut'il ya yal te ac'bilix ta stojol spisil bintic ay, jamal chican te ma ba ochem tey a te Mach'a la ya'be scuentahin spisil.

²⁸Te c'alal spisil ac'bilix ta cuentahinel yu'un, ha nix hich te Nich'anil ya yac' sba ta cuentahinel ta stojol te Mach'a a'bot ta scuenta yu'un spisil bintic ay, scuenta ha yu'un Dios ya xc'oht spisil bintic ay.

²⁹Teme mayuc cha'cuxajel, ¿bin ya spas te mach'atic ya yac' sbahic ta sjelolinel ta ich'-ha' te mach'atic chamenique? Teme melel ma ba ya xcha'cuxajic te mach'atic chamenic, ¿bin yu'un te ya yac' sbahic ta ich'-ha' scuenta sjelol te mach'atic chamenique?

³⁰Soc ¿bin yu'un te spisil ora quechelotcotic ta wocol?

³¹Ya calbeyex, quermanotac, te ta scuenta te yutsil q'uinal ya ca'iy awu'unic ta stojol Cajwaltic Jesucristo, jujun c'ahc'al quechelon ta lajel.

³²Teme ta scuenta ch'ich'-baq'uet la jtsal jba soc ti'awal chambahlametic ta Éfeso, ¿bin ya jta a? Teme ma ba ya xcha'cuxajic te mach'atic chamenic: Ochucotic ta we'el uch'el, como pajel ya xchamotic, xchi ta halel.

³³Ma me xhowiyex; yu'un ay hich ya yich' halel: Te mach'atic chopolic te ya sjoquinotic, ha ya sjimbotic te lequil costumbrehetic cu'untic, xchi.

³⁴Cuxuluc me awo'tanic soc ma me xalehulan amulic, yu'un ay mach'atic ma ba ya sna'beyic sba te Diose. Scuenta aq'uexlalic te hich ya cal.

³⁵Pero ay wan mach'a hich ya sjoc'oy: ¿Bin ut'il ya xcha'cuxajic te mach'atic chamenic? ¿Bin yilel sbaq'uetalic ya xcha'cuxajic soc? xchi wan.

³⁶¡Ma xana' q'uinal! Te bin yac ats'un, ma ba ya xcol tal teme ma nahiluc ya xchame.

³⁷Te bin yac ats'un, ma ha'uc te bin ya xloc' tal ta patil, ha nax sbac' trigo o yan te bin yac ats'une.

³⁸Dios ya ya'be sbaq'uetal, ha chican yo'tan stuquel bin yilel, te jujuchahp awalil ay sbaq'uetal yu'un.

³⁹Ma pajaluc sbaq'uetalic spisil bintic cuxajtic, yan sbaq'uetal ants-winiquetic, yan sbaq'uetal chambahlametic, chayetic, soc mutetic.

⁴⁰Yantic bintic ay ta ch'ulchan, soc yantic bintic ay ta bahlumilal; pero yan yutsilalic a te bintic ay ta ch'ulchan, soc yan yutsilalic a te bintic ay ta bahlumilal.

⁴¹Yan yutsilal a te c'ahc'al, yan yutsilal a te u, yan yutsilal a te eq'uetic; yantic yilel yutsilalic ta jujun chahp.

⁴²Hich nix ay te cha'cuxajel yu'un te mach'atic chamenique. Ya xc'a' te bin ya yich' muquel, pero mayuquix sc'a'emal a te ya xcha'cuxaj tale;

⁴³mayuc sc'oblal a te ya yich' muquel, pero ayix yutsilal a te ya xcha'cuxaj tale; mayuc yip a te ya yich' muquel, pero ayix yip a te ya xcha'cuxaj tale;

⁴⁴ch'ich'-baq'uet a te ya xmucot, pero baq'uet scuenta espíritu te ya xcha'cuxaj tale. Teme ay baq'uet scuenta ch'ich'-baq'uet, ay baq'uet scuenta espíritu.

⁴⁵Hich ts'ihbabil: Te sba winic Adán, a'bot scuxlejal, xchi; te slajibal Adán, ha espíritu te ya yac' cuxlejal.

⁴⁶Ma ha'uc nahil ay te bin scuenta espíritu, ha nahil ay te bin ch'ich'-baq'uet, patil te bin scuenta espíritu.

⁴⁷Te sba winic loq'uem tal ta lum, ha yu'un bahlumilal; te schebal winic, ha te Cajwaltic,[4] talem ta ch'ulchan.

⁴⁸Te bin yilel te mach'a talem ta lum, hich nix yilel te mach'atic ayic ta scuenta bahlumilal; te bin yilel te mach'a talem ta ch'ulchan, hich nix yilel te mach'atic ayic ta scuenta ch'ulchan.

⁴⁹Hich te bin ut'il quich'beyejtic stalel te bin scuenta bahlumilal, ha nix hich ya quich'betic stalel te bin scuenta ch'ulchan.

⁵⁰Pero ya calbeyex, quermanotac, te ch'ich'-baq'uet ma xhu' ya x'a'bot yich' te cuentahinel yu'un Dios, soc te bin scuenta c'a'el ma xhu' ya x'a'bot yich' te bin ma xc'a'e.

⁵¹A'iya awa'iyic, ya calbeyex te bin mayuc mach'a sna'oj: Ma jpisilticuc ya xway jbaq'uetaltic, pero jpisiltic ya xc'atp'ujotic,

⁵²jts'ihn nax, ta muhts' nax ta sitil, ta slajibal yoq'uel corneta, como ya yich' oq'uesinel corneta, te mach'atic chamenic mayuc sc'a'emal a ya xcha'cuxajtesotic tal, soc te ho'otic ya xc'atp'ujotic,

⁵³como te baq'uet te ya xc'a' ya sc'an ya sc'u'in te bin ma ba ya xc'a', soc te baq'uet te ya xlaj ya sc'an ya sc'u'in te bin ma xlaje.

⁵⁴Te baq'uet te ya xc'a', c'alal yich'ojix te bin ma xc'a', soc te baq'uet te ya xlaj, c'alal yich'ojix te bin ma xlaje, hich ya xc'oht ta pasel a te bin ts'ihbabil: Jc'axel tsalbilix te lajele.

⁵⁵Ha'at, lajel, ¿banti ay te ac'uxule? Ha'at, muquenal, ¿banti ay te tsalaw awu'une? xchi.

⁵⁶Como te sc'uxul te lajel ha te mulile, soc te yip te mulil ha te Ley.

⁵⁷Pero wocol yal Dios yu'un te ya yac' ca'iytic tsalaw ta scuenta te Cajwaltic Jesucristo.

⁵⁸Ha yu'un, quermanotac te c'uxex ta co'tan, ayuc me yip awo'tanic soc junuc me awo'tanic, spisil ora behbehuc me ta muc'ubel awu'unic te ya'tel te Cajwaltic, como ana'ojic te ma tojoluc ya xc'oht te awa'telic yu'un te Cajwaltique.